ৰাইফল, মেচিনগান, বোমাবৰ্ষণৰ পিছত এইবাৰ সংঘৰ্ষত বিধ্বস্ত মণিপুৰত (Manipur) ক্ষেপণাস্ত্ৰ আক্ৰমণ। বিষ্ণুপুৰ জিলাৰ মৈৰাঙৰ ফিৱাংবাম লেইকাই অঞ্চলৰ প্ৰাক্তন মুখ্যমন্ত্ৰী মৈৰেম্বম কৈৰেং সিঙৰ ঘৰৰ চৌহদত ক্ষেপণাস্ত্ৰৰ আঘাতত শুকুৰবাৰে বিয়লি প্ৰায় ৩.৩০ বজাত আৰ ৰে ৰাবেই (৭০) নামৰ এজন বৃদ্ধ পুৰোহিতৰ মৃত্যু হয়।
আহত হয় আনকেইজনমান। সেনাই কয় যে দেশত এনেধৰণৰ ক্ষেপণাস্ত্ৰ আক্ৰমণৰ কোনো নজিৰ নাই। ক্ষেপণাস্ত্ৰ বিস্ফোৰণ হোৱা ঠাইত ধৰ্মীয় অনুষ্ঠানৰ প্ৰস্তুতি চলি আছিল।
ক্ষুব্ধ জনতাই মৃত লোকজনৰ মৃতদেহ নিবলৈ আৰক্ষীক বাধা দিয়ে। মন্ত্ৰী তথা স্থানীয় বিধায়ক এল শচীন্দ্ৰ আহি প্ৰতিবাদৰ সন্মুখীন হ’বলগীয়া হয়। ইয়াৰ পূৰ্বে পুৱা তেৰাখোংছানবি গাঁৱত একেদৰেই ৰকেটৰ দ্বাৰা দুটা ঘৰ ধ্বংস কৰা হয়। অৱশ্যে এই ঘটনাত কোনো লোক আহত হোৱা নাই। ইফালে মেইটেইসকলে দাবী কৰে যে কুকি উগ্ৰপন্থীয়ে ক্ষেপণাস্ত্ৰ নিক্ষেপ কৰিছিল।
আৰক্ষীৰ মতে, স্থানীয়ভাৱে নিৰ্মিত হ’লেও এই উন্নত প্ৰযুক্তিৰ ক্ষেপণাস্ত্ৰই ৩ কিলোমিটাৰ গতি কৰি আঘাত কৰিব পাৰে। কিন্তু কুকিসকলে মেইটেইলৈ কেইবাটাও ভিডিঅ’ প্ৰেৰণ কৰি দাবী কৰিছে যে আৰম্বাই টেংগল বাহিনীয়ে নিক্ষেপ কৰা ক্ষেপণাস্ত্ৰই লক্ষ্য হেৰুৱাই মেইটেই অঞ্চলত আঘাত হানে।
ঘটনাৰ পিছৰে পৰা ৰাজ্যত উত্তেজনা বৃদ্ধি পাইছে। মেইটেই বাহিনী আৰু আৰক্ষীয়ে কুকি অঞ্চল দখল কৰিবলৈ পূৰ্ণ গতিত অভিযান চলাইছে। ফলত কুকিসকলে অঞ্চলটোৰ পৰা পলায়ন কৰিছে। আনহাতে, আজি চৰকাৰী আৰু বেচৰকাৰী সকলো বিদ্যালয় বন্ধ কৰাৰ নিৰ্দেশ দিছে চৰকাৰে।
মেইটেই যুটীয়া মঞ্চ কোকোমিয়ে লগে লগে জৰুৰীকালীন অৱস্থা ঘোষণা কৰে। ইফালে ইম্ফলৰ ৰাজপথত এই আক্ৰমণৰ প্ৰতিবাদত বহু ছাত্ৰ-ছাত্ৰীকে ধৰি হাজাৰ হাজাৰ লোকে মানৱ শৃংখল গঠন কৰে। কোকোমিয়ে ৫ দিনৰ ভিতৰত কুকিসকলক দমন নকৰিলে ৰাজ্যৰ পৰা কেন্দ্ৰীয় বাহিনী প্ৰত্যাহাৰ কৰাৰ দাবী জনায়।
