দেশত যেন এটাৰ পিছত আন এটাকৈ সংঘটিত হ’ব ধৰিছে নাৰী নিৰ্যাতন আৰু ধৰ্ষণৰ ঘটনা । এইবাৰ নগাঁৱৰ ধিঙত সংঘটিত হৈছে এক জঘন্য কাণ্ড (Dhing Rape Case)। তিনি দুৰ্বৃত্তই এগৰাকী নাবালিকাক ধৰ্ষণ কৰি পথৰ কাষতে পেলাই থৈ যোৱৰ শিহৰণকাৰী অভিযোগ উত্থাপন হৈছে। আনহাতে, এই ঘটনাৰ প্ৰতিবাদ ইতিমধ্যে আৰম্ভ হৈছে। ইয়াৰ প্ৰতিবাদত আছুই অনিৰ্দিষ্টকালৰ বাবে ধিং বন্ধ ঘোষণা কৰিছে।
এই জঘন্য কাণ্ড ধিঙৰ ভকত গাঁৱত সংঘটিত হয়। অভিযোগ অনুসৰি, নাবালিকাগৰাকী টিউচনৰ পৰা ঘৰলৈ উভতি আহি থকাৰ সময়তে তিনি দুৰ্বৃত্তই এই জঘন্য কাণ্ড সংঘটিত কৰে। একাংশই দাবী কৰা মতে, নাবালিকাগৰাকীক ধৰ্ষণ কৰি অতি শোচনীয় অৱস্থাত শ্মশানৰ কাষত পেলাই থৈ যায়।
ইফালেসেই পথটোৰে অহা কোনো লোকে উলংগ অৱস্থাত নাবালিকাগৰাকীক পৰি থকা দেখি আৰক্ষীক খবৰ দিয়াত আৰক্ষী গৈ ঘটনাস্থলীত উপস্থিত হয়। আৰক্ষীয়ে তেওঁক উদ্ধাৰ কৰি ধিং স্বাস্থ্য কেন্দ্ৰলৈ প্ৰেৰণ কৰে যদিও উন্নত চিকিৎসাৰ বাবে তাৰ পৰা ভুক্তভোগীক নগাঁও চিকিৎসা মহাবিদ্যালয়লৈ প্ৰেৰণ কৰা হয়।
নগাঁও আৰক্ষীয়ে ঘটনা সন্দৰ্ভত বৃহস্পতিবাৰে নিশাৰে পৰা অভিযুক্তৰ সন্ধানত অভিযান আৰম্ভ কৰিছে যদিও এতিয়ালৈকে ধৰ্ষণকাৰীক গ্ৰেপ্তাৰ কৰিবলৈ সক্ষম হোৱা নাই।
আনহাতে, মুখ্যমন্ত্ৰী ডঃ হিমন্ত বিশ্ব শৰ্মাই এই ঘটনাক তীব্ৰ গৰিহণা দিছে। কোনো কাৰণতে দোষীক ৰেহাই দিয়া নহ’ব বুলি উল্লেখ কৰি মুখ্যমন্ত্ৰীয়ে আৰক্ষীক দোষীক শীঘ্ৰে বিচাৰি উলিয়াবলৈ কঠোৰ নিৰ্দেশ দিছে।
সামাজিক মাধ্যমত দিয়া এক পোষ্টত মুখ্যমন্ত্ৰীয়ে লিখিছে, “ধিঙৰ কিশোৰীৰে সংঘটিত ভয়ানক ঘটনাটো মানৱতাক ভূলুণ্ঠিত কৰা অপৰাধ আৰু এই ঘটনাই আমাৰ বিবেক তথা প্ৰতিজন সভ্য মানুহক আঘাত কৰিছে। আমি যেতিয়ালৈকে অপৰাধীক মহামান্য আইনৰ আওতাৰ ওচৰলৈ লৈ যাব নোৱাৰোঁ তেতিয়ালৈকে আমি জিৰণি নলওঁ। মই অসম আৰক্ষীৰ সঞ্চালকপ্ৰধানক এই বিষয়টো সম্পূৰ্ণ তদাৰক কৰিবলৈ নিৰ্দেশনা দিছোঁ আৰু এনে নাৰকীয় কাণ্ডৰ সৈতে জড়িত দানৱৰ বিৰুদ্ধে দ্ৰুত তথা কঠোৰ ব্যৱস্থা গ্ৰহণ কৰিবলৈ নিৰ্দেশনা প্ৰদান কৰিছোঁ৷” ইতিমধ্যে ঘটনাৰ অনুসন্ধানৰ বাবে অসম আৰক্ষীৰ ডিজিপি জি পি সিং ধিঙত উপস্থিত হৈছে।
