গৰ্ভধাৰণৰ ৩২ সপ্তাহৰ পিছত শিশুটিক ৰখাৰ সিদ্ধান্ত এলাহাবাদ উচ্চ ন্যায়ালয়ে (Allahabad High Court) মানি লৈ কয় যে ছোৱালীজনীয়ে প্ৰসৱৰ পিছত শিশুটিক দত্তক লোৱাৰ বাবে দিব পাৰে। এই সন্দৰ্ভত ছোৱালীজনীৰ সিদ্ধান্ত ৰাজ্যই মানি ল’ব। ২৪ জুলাইত এলাহাবাদ উচ্চ ন্যায়ালয়ে ১৫ বছৰীয়া কিশোৰীৰ গৰ্ভপাতৰ আবেদনৰ শুনানিৰ সময়ত এই ৰায় প্ৰদান কৰে।
ন্যায়াধীশ শেখৰ বি চাৰাফ আৰু মনজীৱ শুক্লাৰ বিচাৰপীঠে কয় যে ৩২ সপ্তাহত গৰ্ভপাতৰ আশংকা ছোৱালীজনী আৰু পৰিয়ালক বুজাই দিয়াৰ পিছত কেৱল সংশ্লিষ্ট মহিলাগৰাকীয়েহে শিশুটিক ৰখা বা সন্তানৰ গৰ্ভপাত (Keeping the child or aborting the child)ৰ দৰে গুৰুত্বপূৰ্ণ সিদ্ধান্ত (Important decisions) ল’ব পাৰে। ইয়াত তেওঁৰ ব্যক্তিগত সিদ্ধান্তইহে প্ৰাধান্য পাব, আন কাৰোবাৰ মতামত নহয়।
২৪ জুলাইৰ আদেশত লগতে কোৱা হৈছে, “যদি ছোৱালীজনীয়ে গৰ্ভধাৰণ অব্যাহত ৰাখিব বিচাৰে তেন্তে ছোৱালীজনীৰ সিদ্ধান্ত গ্ৰহণ কৰা আৰু যিমান পাৰি গোপনীয়তা বজাই ৰখাটো ৰাষ্ট্ৰৰ দায়িত্ব। ইয়াৰ সমান্তৰালকৈ শিশুটিক যাতে দেশৰ নাগৰিক হিচাপে স্বীকৃতি দিয়া হয় আৰু সংবিধানত সন্নিৱিষ্ট মৌলিক অধিকাৰৰ পৰা বঞ্চিত নহয় তাৰো লক্ষ্য ৰাখিব লাগিব।”
উল্লেখযোগ্য যে ভুক্তভোগী কিশোৰী স্কুলীয়া ছাত্ৰী। ককাকৰ ঘৰত থকা সময়ত এজন লোকে প্ৰলোভিত কৰি অপহৰণ কৰি কেইবাবাৰো ধৰ্ষণ কৰাৰ অভিযোগ। প্ৰথম অৱস্থাত ভাৰতীয় দণ্ডবিধিৰ ৩৬৩ ধাৰাৰ (পহৰণ) অধীনত এজাহাৰ দাখিল কৰা হৈছিল যদিও ছোৱালীজনীক উদ্ধাৰ কৰাৰ পিছত ধৰ্ষণৰ অভিযোগৰ ভিত্তিত POCSO আইনৰ অধীনত গোচৰ ৰুজু কৰা হৈছিল। আদালতত গৰ্ভপাতৰ আবেদন জনোৱাৰ সময়ত তেওঁ গৰ্ভৱতী আছিল ২৯ সপ্তাহ।
তিনিজন পৃথক চিকিৎসকৰ দলে প্ৰাথমিক পৰীক্ষাৰ অন্তত কয় যে শিশুটিক ৰাখিব বিচৰাটোৱে ভুক্তভোগীৰ মানসিক স্বাস্থ্যৰ ওপৰত প্ৰভাৱ পেলাব। কিন্তু এই পৰ্যায়ত গৰ্ভপাত কৰাটো অতি বিপদজনক। ছোৱালীজনীৰ মৃত্যুৰ আশংকা আছে। ইয়াৰ পিছতো ছোৱালীজনীৰ পিতৃ-মাতৃয়ে গৰ্ভপাতক লৈ অটল আছিল।
শেষত আবেদনকাৰী ছোৱালীজনী আৰু তেওঁৰ পিতৃ-মাতৃয়ে ইয়াৰ লগত জড়িত শাৰীৰিক বিপদসমূহ বিবেচনা কৰি গৰ্ভাৱস্থা অব্যাহত ৰাখিবলৈ সন্মতি দিয়ে।
