১৯ এপ্ৰিলত দেশত অনুষ্ঠিত হ’ব প্ৰথম পৰ্যায়ৰ লোকসভা নিৰ্বাচন (Loksabha Election) । প্ৰথম পৰ্যায়ত ২১খন ৰাজ্য আৰু কেন্দ্ৰীয়শাসিত অঞ্চলৰ ১০২খন আসনৰ বাবে ভোট গ্ৰহণ অনুষ্ঠিত হ’ব। আনহাতে, এই নিৰ্বাচনত ভাগ্য পৰীক্ষা কৰিবলৈ সাজু হৈছে আঠগৰাকী কেন্দ্ৰীয় মন্ত্ৰী, দুগৰাকী প্ৰাক্তন মুখ্যমন্ত্ৰী আৰু এগৰাকী প্ৰাক্তন ৰাজ্যপালে।
কেন্দ্ৰীয় পথ আৰু পৰিবহণ মন্ত্ৰী নীতিন গাডকাৰীয়ে নাগপুৰৰ সমষ্টিনৰ পৰা বিজয়ৰ হেট্ৰিক অর্জনৰ বাবে অৱতীৰ্ণ হ’ব। ২০১৪ চনত তেওঁ ৭ বাৰৰ সাংসদ বিলাস মুত্তেমৱাৰক ২.৮৪ লাখ ভোটৰ ব্যৱধানত পৰাস্ত কৰাৰ বিপৰীতে ২০১৯ চনত বৰ্তমানৰ মহাৰাষ্ট্ৰ কংগ্ৰেছৰ সভাপতি নানা পাটোলেক ২.১৬ লাখ ভোটত পৰাস্ত কৰিছিল।
অৰুণাচল পশ্চিমৰ আসনৰ পৰা প্ৰতিদ্বন্দ্বিতা আগবঢ়াইছে কেন্দ্ৰীয় মন্ত্ৰী কিৰেন ৰিজিজুৱে। ২০০৪ চনৰ পৰা তিনিবাৰকৈ সমষ্টিটোক প্ৰতিনিধিত্ব কৰা ৫২ বছৰীয়া ৰিজিজুয়াৰ মূল প্ৰতিদ্বন্দ্বী হৈছে প্ৰাক্তন মুখ্যমন্ত্ৰী তথা অৰুণাচল প্ৰদেশ কংগ্ৰেছৰ বৰ্তমানৰ সভাপতি নবাম টুকি।
আনহাতে, অসমৰ ডিব্ৰুগড় সমষ্টিৰ পৰা পূবৰ লোকসভালৈ ঘূৰি আহিবলৈ বিচাৰিছে কেন্দ্ৰীয় বন্দৰ, জাহাজ আৰু জলপথ মন্ত্ৰী সৰ্বানন্দ সোণোৱালে। কেন্দ্ৰীয় পেট্ৰ’লিয়াম আৰু প্ৰাকৃতিক গেছৰ ৰাজ্যিক মন্ত্ৰী ৰামেশ্বৰ তেলীৰ স্থানত সমষ্টিটোৰ পৰা ৰাজ্যসভাৰ সদস্য সৰ্বানন্দ সোণোৱালক টিকট দিয়া হৈছে।
একেদৰে মুজাফ্ফৰ নগৰত কেন্দ্ৰীয় মন্ত্ৰী সঞ্জীৱ বালিয়ান নিৰ্বাচনত অৱতীৰ্ণ হৈছে।
দুবাৰৰ সাংসদ তথা প্ৰধানমন্ত্ৰী নৰেন্দ্ৰ মোদীৰ কেবিনেটৰ কনিষ্ঠ মন্ত্ৰী জিতেন্দ্ৰ সিঙে উধামপুৰত হেট্ৰিকৰ লক্ষ্যৰে অৱতীৰ্ণ হৈছে।
টিকট বঞ্চিত সাংসদ বালক নাথৰ ঠাইত কেন্দ্ৰীয় মন্ত্ৰী তথা ৰাজ্যসভাৰ সদস্য ভূপেন্দ্ৰ যাদৱে ৰাজস্থানৰ আলৱাৰ জিলাৰ মৎস্য অঞ্চলৰ অন্তৰ্গত আৰু যাদৱ জনগোষ্ঠীৰ সমৰ্থন লাভ কৰা কংগ্ৰেছ বিধায়ক ললিত যাদৱৰ বিৰুদ্ধে প্ৰতিদ্বন্দ্বিতা কৰিছে।
ৰাজস্থানৰ বিকানেৰ সংসদীয় সমষ্টিৰ পৰা কংগ্ৰেছৰ প্ৰাক্তন মন্ত্ৰী গোবিন্দ ৰাম মেঘৱলৰ বিৰুদ্ধে প্ৰতিদ্বন্দ্বিতা কৰিছে কেন্দ্ৰীয় আইন মন্ত্ৰী অৰ্জুন ৰাম মেঘৱালে।
তামিলনাডুৰ নীলগিৰি লোকসভা সমষ্টিত বৰ্তমানৰ ডি এম কেৰ সাংসদ তথা প্ৰাক্তন টেলিকম মন্ত্ৰী এ ৰাজা আৰু কেন্দ্ৰীয় মীন ৰাজ্য মন্ত্ৰী বিজেপিৰ এল মুৰুগানৰ মাজত তীব্ৰ প্ৰতিদ্বন্দ্বিতা হোৱাৰ আশা আছে। মধ্যপ্ৰদেশৰ পৰা ৰাজ্যসভালৈ নিৰ্বাচিত হোৱা মুৰুগানে ইয়াৰ পৰা প্ৰথমবাৰৰ বাবে প্ৰতিদ্বন্দ্বিতা কৰিব।
শিৱগংগাৰ সাংসদ কাৰ্তি চিদাম্বৰমে বিজেপিৰ টি দেৱনাথন যাদৱ আৰু এআইএডিএমকেৰ জেভিয়াৰ দাসৰ বিৰুদ্ধে প্ৰতিদ্বন্দ্বিতা কৰি পিতৃয়ে ৭ বাৰ জয়ী হোৱা আসনৰ পৰা পুনৰ নিৰ্বাচনৰ লক্ষ্য লৈছে।
তামিলনাডুৰ কইম্বাটুৰত নিৰ্বাচনী ৰণত অৱতীৰ্ণ হৈছে তামিলনাডু বিজেপিৰ সভাপতি কে আন্নামলাই। তেওঁ ডিএমকে নেতা গণপতি পি ৰাজকুমাৰ আৰু এআইএডিএমকেৰ চিংগাই ৰামচন্দ্ৰনৰ বিৰুদ্ধে যুঁজিব।
শেহতীয়াকৈ তেলেংগানাৰ ৰাজ্যপাল আৰু পুডুচেৰীৰ উপ-ৰাজ্যপালৰ পদৰ পৰা পদত্যাগ কৰি সক্ৰিয় ৰাজনীতিলৈ ঘূৰি অহা তামিলিছাই সৌন্দৰাৰাজনে চেন্নাই দক্ষিণ লোকসভা সমষ্টিৰ পৰা প্ৰতিদ্বন্দ্বিতা আগবঢ়াইছে। প্ৰবীণ কংগ্ৰেছ নেতা কুমাৰী অনন্তৰ কন্যা সৌন্দৰৰাজনে ২০১৯ চনৰ লোকসভা নিৰ্বাচনত ডিএমকেৰ কানিমোঝিৰ বিৰুদ্ধে প্ৰতিদ্বন্দ্বিতা কৰিছিল যদিও থুথুকুডিত বিপুল ব্যৱধানত পৰাস্ত হৈছিল।
কংগ্ৰেছ নেতা তথা মধ্যপ্ৰদেশৰ প্ৰাক্তন মুখ্যমন্ত্ৰী কমল নাথৰ পুত্ৰ নকুল নাথে পুনৰ ছিণ্ডৱাৰা সমষ্টি লাভৰ বাবে নিৰ্বাচনত অৱতীৰ্ণ হৈছে। ১৯৮০ চনৰ পৰা ৯ বাৰকৈ এই আসনখন দখল কৰা কমল নাথৰ হাতত আসনখন দৃঢ়তাৰে আছে।২০১৯ চনৰ নিৰ্বাচনত বিজেপিয়ে ৰাজ্যখনৰ ২৯খন আসনৰ ভিতৰত ২৮খন আসন লাভ কৰিছিল যদিও ছিণ্ডৱাৰাত পৰাস্ত হৈছিল। এই সমষ্টিটোত নকুলে বিজেপিৰ প্ৰাৰ্থীক ৩৭,৫৩৬ ভোটত পৰাস্ত কৰি ৰাজ্যখনৰ একমাত্ৰ কংগ্ৰেছ সাংসদ হিচাপে জয়ী হৈছিল।
ত্ৰিপুৰাৰ লোকসভা সমষ্টি দুটাৰ ভিতৰত ১৯ এপ্ৰিলত প্ৰথম পৰ্যায়ত ভোটদান হ’বলগীয়া পশ্চিম ত্ৰিপুৰা সমষ্টিত প্ৰাক্তন মুখ্যমন্ত্ৰী বিপ্লৱ কুমাৰ দেৱ আৰু ৰাজ্যিক কংগ্ৰেছৰ সভাপতি আশীষ কুমাৰ সাহাৰ মাজত হাই ভল্টেজৰ সংঘৰ্ষ হ’ব।
আনহাতে, অসমৰ কলিয়াবৰ সমষ্টিৰ পৰা ২০১৪ চনৰ পিছত দুবাৰকৈ লোকসভা নিৰ্বাচনত জয়ী হোৱা তথা লোকসভাত কংগ্ৰেছৰ উপ-নেতা তথা প্ৰাক্তন মুখ্যমন্ত্ৰী তৰুণ গগৈৰ পুত্ৰ গৌৰৱ গগৈয়ে যোৰহাটত প্ৰাৰ্থী হিচাপে অৱতীৰ্ণ হৈছে। এই সমষ্টিটোত বিজেপিৰ তপন কুমাৰ গগৈয়ে ২০১৯ চনত জয়লাভ কৰিছিল।
মণিপুৰৰ আইন আৰু শিক্ষা মন্ত্ৰী বসন্ত কুমাৰ সিং কংগ্ৰেছ প্ৰাৰ্থী বিমল আকোইজামৰ বিৰুদ্ধে থিয় দিছে। মেইটেই সম্প্ৰদায়ৰ অন্তৰ্গত সিং অটল বিহাৰী বাজপেয়ীৰ নেতৃত্বত এনডিএ চৰকাৰত ক্ৰীড়া, যুৱ পৰিক্ৰমা, সংস্কৃতি আৰু খাদ্য প্ৰক্ৰিয়াকৰণৰ কেন্দ্ৰীয় ৰাজ্যমন্ত্ৰী হিচাপে কাৰ্যনিৰ্বাহ কৰা থৌনাওজাম চাওবা সিঙৰ পুত্ৰ।
উত্তৰ ৰাজস্থানৰ বিজেপিৰ দুৰ্গ চুৰুত দুবাৰৰ পেৰালিম্পিকৰ স্বৰ্ণ পদক বিজয়ী জেভেলিন থ্ৰ’ৱাৰ বিজেপি প্ৰাৰ্থী দেৱেন্দ্ৰ ঝাঝাৰিয়া আৰু কংগ্ৰেছৰ ৰাহুল কাছৱানৰ মাজত এক আকৰ্ষণীয় যুঁজৰ বাবে সাজু হৈছে।
উল্লেখযোগ্য যে ১৮ সংখ্যক লোকসভা নিৰ্বাচনৰ বাবে ৫৪৩খন আসনৰ বাবে ভোটগ্ৰহণ ৭টা পৰ্যায়ত অনুষ্ঠিত হ’ব। ৪ জুনত ভোট গণনা কৰা হ’ব।
