‘RRR’, ‘বাহুবলি’ আদি বৃহৎ ছবিৰে দৰ্শকক মোহিত কৰাৰ পিছত ছবি নিৰ্মাতা এছএছ ৰাজামৌলিয়ে ( S S Rajamouli) আন এখন মহাকাব্যিক ছবি উপহাৰ দিবলৈ সাজু হৈছে। সমালোচকৰ দ্বাৰা উচ্চ প্ৰশংসিত পৰিচালকগৰাকীয়ে ভাৰতীয় ছবিৰ কাহিনীৰে এখন নতুন ছবি নিৰ্মাণৰ দিশত কাম কৰি আছে। ‘মেড ইন ইণ্ডিয়া’ শীৰ্ষক এই বায়োপিকখন প্ৰযোজনা কৰিছে ৰাজামৌলিৰ পুত্ৰ এছ এছ কাৰ্তিকেয়া আৰু বৰুণ গুপ্তাই।
বায়োপিকখনৰ নেতৃত্ব দিব নীতিন কক্কাৰে। ৰাম চৰণ আৰু জুনিয়ৰ এন টি আৰৰ ‘আৰ আৰ আৰ’ৰ বিশ্বজনীন সফলতাৰ পিছত এছ এছ ৰাজামৌলিয়ে আন এক মাষ্টাৰপিছ উলিয়াবলৈ সাজু হৈছে। ডেডলাইনৰ এক প্ৰতিবেদন অনুসৰি, ছবি নিৰ্মাতাগৰাকীয়ে ‘ভাৰতীয় চিনেমাৰ জন্ম আৰু উত্থান’ৰ কাহিনী বৰ্ণনা কৰিবলৈ আগ্ৰহী। ৰাজামৌলিৰ প্ৰতিনিধিৰ মতে, ছবিখনে ‘বিপুল পৰিসৰ আৰু কেনভাছত এক মহান কৃতি’ৰ প্ৰতিশ্ৰুতি বহন কৰিছে। অৱশ্যে ৰাজামৌলিৰ ছবিখন পৰিচালনা কৰাৰ কোনো পৰিকল্পনা নাই।
ছাচপেন্স আৰু হাইপ সৃষ্টি কৰাৰ পিছত টুইটাৰযোগে এক ভিডিঅʼৰ জৰিয়তে এই কথা ঘোষণা কৰে ছবি নিৰ্মাতাগৰাকীয়ে। তেওঁ টুইট কৰি কয়, “যেতিয়া মই প্ৰথমবাৰৰ বাবে কাহিনীটো শুনিছিলো, ই মোক আৱেগিক কৰি তুলিছিল। বায়োপিক নিৰ্মাণ কৰাটো এনেই কঠিন, কিন্তু ভাৰতীয় চলচ্চিত্ৰৰ পিতৃৰ বিষয়ে এটা ধাৰণা কৰাটো আৰু অধিক প্ৰত্যাহ্বানজনক। আমাৰ দলটো ইয়াৰ বাবে সাজু হৈছে অপৰিসীম গৌৰৱেৰে। উপস্থাপন কৰিব মেড ইন ইণ্ডিয়া।”
উল্লেখযোগ্য যে শেহতীয়াকৈ অনুষ্ঠিত ৯৫ সংখ্যক একাডেমী বঁটাত ‘আৰ আৰ আৰ’-এ ডাঙৰ জয়লাভ কৰে। ‘নাটু নাটু’ৰ বাবে শ্ৰেষ্ঠ মৌলিক গীতৰ অস্কাৰ লাভ কৰে। ফুট টেপিং নম্বৰত ছবিখনৰ মুখ্য অভিনেতা ৰাম চৰণ আৰু জুনিয়ৰ এন টি আৰ। গীতটিৰ সুৰকাৰ এম এম কীৰাভানীয়ে গীতিকাৰ চন্দ্ৰ বসুৰ সৈতে ট্ৰফী হাতত তুলি লয়। এই গীতটোৱে শ্ৰেষ্ঠ মৌলিক গীতৰ গ’ল্ডেন গ্লোব বঁটাও লাভ কৰে।
