মণিপুৰত সংঘটিত হিংসাত্মক (Manipur Violence) ঘটনাৰ তদন্তৰ বাবে ২৯ গৰাকী মহিলা বিষয়াসহ মুঠ ৫৩ গৰাকী বিষয়াক নিযুক্তি (53 officers, including 29 women officers, have been appointed for investigation) দিয়া হৈছে। বৃহস্পতিবাৰে চিবিআইৰ সূত্ৰই (CBI sources) এই সন্দৰ্ভত অৱগত কৰে। তদন্তকাৰী দলটোত ডিআইজি পৰ্যায়ৰ তিনিগৰাকী মহিলা বিষয়াক ‘পৰ্যবেক্ষক’ হিচাপে অন্তৰ্ভুক্ত কৰা হৈছে। সমগ্ৰ তদন্ত প্ৰক্ৰিয়াৰ তদাৰক কৰিব চিবিআইৰ যুটীয়া সঞ্চালক ঘনশ্যাম উপাধ্যায়ে।
সংস্থাটোৰ এক সূত্ৰই জনোৱা মতে, চিবিআইৰ ইতিহাসত কেতিয়াও কোনো ঘটনাৰ তদন্তৰ বাবে ইমান বৃহৎ সংখ্যক বিষয়া নিয়োগ কৰা হোৱা নাই।চিবিআইৰ তদন্তকাৰী দলটোত অতিৰিক্ত দুগৰাকী ছুপাৰ আৰু ডেপুটি ছুপাৰ ৰেংকৰ ছয়গৰাকী মহিলা বিষয়াও আছে। উচ্চতম ন্যায়ালয়ৰ নিৰ্দেশ অনুসৰি মণিপুৰত মহিলাৰ ওপৰত হোৱা হিংসাৰ গোচৰৰ তদন্তৰ বাবে চিবিআইৰ এই ‘কাৰ্যকলাপ’ বুলি ধাৰণা কৰা হৈছে।
উল্লেখযোগ্য যে ২০ জুলাইত মণিপুৰৰ কাংপোকপিত দুগৰাকী মহিলাক বিবস্ত্ৰ কৰি ৰাজপথত পেৰেড কৰা ভিডিঅʼ আৰু দলবদ্ধ ধৰ্ষণৰ অভিযোগৰ ওপৰত উচ্চতম ন্যায়ালয়ে তীব্ৰ প্ৰতিক্ৰিয়া প্ৰকাশ কৰে। ইয়াৰ পিছতে যোৱা ৮ আগষ্টত মণিপুৰৰ হিংসাৰ তদন্ত আৰু হিংসাৰ বলি হোৱা লোকসকলৰ সকাহ আৰু পুনৰ সংস্থাপনৰ ওপৰত নজৰ ৰাখিবলৈ মুখ্য ন্যায়াধীশৰ বিচাৰপীঠে উচ্চ ন্যায়ালয়ৰ তিনিজন অৱসৰপ্ৰাপ্ত ন্যায়াধীশৰ নেতৃত্বত এখন সমিতি গঠন কৰে।
একে সময়তে উচ্চতম ন্যায়ালয়ে কয় যে মণিপুৰত সংঘটিত হিংসাত্মক ঘটনাৰ তদন্তৰ লগত জড়িত ৪২টা বিশেষ তদন্তকাৰী দলক (এছআইটি) অন্য ৰাজ্যৰ ডিআইজি ৰেংকৰ আৰক্ষী বিষয়াই নিৰীক্ষণ কৰিব। এজন ডিআইজিয়ে ছখন আসন নিৰীক্ষণ কৰিব।
