অমৃত ভাৰত ৰে’লষ্টেচন উন্নীতকৰণ আঁচনিৰ (Amrit Bharat Railway Station Upgradation Scheme) যোগেদি উত্তৰ-পূৰ্বাঞ্চলৰ উন্নীতকৰণ হ’বলগীয়া ৰে’লষ্টেচন তালিকাৰ ভিতৰত ডিফু ৰে’লষ্টেচন অন্তৰ্ভূক্ত (Diphu railway station included) হোৱাৰ পিছত সমগ্ৰ কাৰবি আংলঙৰ লগতে ডিফুবাসীও আনন্দত উল্লাসিত হৈ পৰিছে৷ এই উপলক্ষে আজি পুৱাৰ ভাগতে ডিফু মিউনিচিপাল্টি বোৰ্ডৰ অধ্যক্ষৰ নেতৃত্বত ৱাৰ্ড কমিচনাৰসকল আৰু চাফাই কৰ্মচাৰীসকলে হাতে-হাতে ঝাড়ু টুকৰীলৈ ডিফু ৰে’লষ্টেচন চৌহদত চাফাই অভিযান (Cleanliness drive at Diphu railway station premises) চলায় ৷
উল্লেখযোগ্য যে বিগত কেইবা বছৰ ধৰি ডিফু ৰে’লষ্টেচন উন্নীতকৰণকলৈ সৰৱ চৰ্চা চলি থকাৰ মাজতে যোৱাকালি তিনি পাৰ্বত্য জিলাৰ একমাত্ৰ সাংসদ হৰেণছিং বে’ই ডিফু ৰেলষ্টেচনক অমৃত ভাৰত ৰে’লষ্টেচন উন্নীতকৰণ আঁচনিৰ মাধ্যমেৰে এক বিশ্বমানৰ আৰু অত্যাধুনিক ষ্টেচনলৈ ৰূপান্তৰিত কৰাৰ কথা সামাজিক মাধ্যমযোগে প্ৰকাশ কৰাৰ পিছতে ডিফুবাসী ৰাইজৰ সপোন সাৰ্থক হবলৈ অগ্ৰসৰ হৈছে৷
দেওবাৰে পুৱা ৯-৩০ বজাৰ পৰা প্ৰধানমন্ত্ৰী নৰেন্দ্ৰ মোদী (Narendra Modi)য়ে ভিডিঅ কনফাৰেন্সৰ জৰিয়তে ভাৰ্চুৱেলি উত্তৰ-পূৰ্বাঞ্চলৰ ৫০৮টা ৰেলষ্টেচনৰ লগতে ডিফু ৰেলষ্টেচনৰো আধাৰশিলা স্থাপন (Foundation stone of 508 railway stations in north-east virtually laid) কৰাকলৈ ডিফু ৰেলষ্টেচন চৌহদত এক আকৰ্ষণীয় অনুষ্ঠানৰ আয়োজন কৰা হৈছে৷
স্ক্ৰীণৰ জৰিয়তে প্ৰধানমন্ত্ৰীৰ দ্বাৰা ভাৰ্চ্যুৱেলি স্থাপন হবলগীয়া আধাৰশিলা কাৰ্যসূচীৰ বাবে ডিফু ৰেলষ্টেচন কৰ্তৃপক্ষই পূৰ্ণগতিত প্ৰস্তুতি চলাইছে ৷ প্ৰায় ৩২ কোটি ব্যয় সাপেক্ষে উন্নীতকৰণ হবলগীয়া ডিফু ৰেলষ্টেচনৰ বিশ্বমানৰ অত্যাধুনিক ৰূপান্তৰে পাৰ্বত্য জিলাখনত বহুদিনীয়া অভাৱ পূৰণ হব বলি কৈ প্ৰধানমন্ত্ৰী নৰেন্দ্ৰ মোদীক শলাগ লয় সম্পাদকগৰাকীয়ে।
উক্ত অনুষ্ঠানত সাংসদ হৰেণছিং বে’কে ধৰি কাৰবি আংলং স্বায়ত্তশাসিত পৰিষদৰ মুখ্য কাৰ্যাবহী সদস্য তুলিৰাম ৰংহাঙৰ লগতে প্ৰায় দুই সহস্ৰাধিক লোকে অংশগ্ৰহণ কৰিব বুলি কয় পূব কাৰবি আংলং বিজেপিৰ সম্পাদক ছিমন ফাংচৱে৷
আনহাতে ডিফু মিউনিচিপাল্টি বোৰ্ডৰ অধ্যক্ষ ৰাহ ক্ৰ’ই সাংবাদিকৰ আগত কয় যে ডিফু ৰেলষ্টেচনে বিশ্বমানৰ ষ্টেচনৰ মৰ্যদা পোৱাত সন্তুষ্ট হৈ আমি ডিফু ৰেলষ্টেচনত চাফাই অভিযান চলাইছো৷
উল্লেখযোগ্য যে, ভাৰত চৰকাৰে বিশ্বমানৰ ষ্টেচন আৰু অমৃত ভাৰত ষ্টেচন আঁচনিৰ অধীনত অসমৰ ৫০টা ষ্টেচনকে ধৰি উত্তৰ-পূব ৰাজ্যসমূহৰ ৰেলৱে আন্তঃগাঁথনিৰ পুনৰ উন্নয়ন আৰু উন্নীতকৰণৰ বাবে ১০,২৬৯ কোটি টকাৰ পুঁজি আবণ্টন দিছে ৷ সাংসদ হৰেণছিং বেই সামাজিক মাধ্যমত প্ৰকাশ কৰা অনুসৰি অমৃত ভাৰত ষ্টেচন আঁচনিৰ অধীনত মুঠ ₹ ৯২২ কোটি টকা বিনিয়োগ কৰি বৰ্তমান অসমৰ ৩২টা ষ্টেচনৰ ভিতৰত ডিফু ৰেলৱে ষ্টেচনো ইয়াৰ উন্নীতকৰণৰ বাবে নিৰ্বাচিত হৈছে। প্ৰধান মন্ত্ৰী নৰেন্দ্ৰ মোডীয়ে ৬ আগষ্ট, ২০২৩ তাৰিখে সমগ্ৰ ভাৰতৰ ৫০৮টা ৰেলৱে ষ্টেচনৰ পুনৰ উন্নয়নৰ আধাৰশিলা স্থাপন কৰিব সামাজিক মাধ্যমযোগে জানিব পৰা গৈছে৷
