Pakistan’s spy agency ISI arrested I উত্তৰ প্ৰদেশত গ্ৰেপ্তাৰ আইএছআইৰ চোৰাংচোৱা

উত্তৰ প্ৰদেশত আইএছআইৰ ( ISI Agent) হৈ চোৰাংচোৱাগিৰি কৰাৰ অভিযোগত এজন যুৱকক গ্ৰেপ্তাৰ। সন্ত্ৰাসবাদ বিৰোধী স্কোৱাডে গ্ৰেপ্তাৰ কৰে যুৱকজনক। অভিযুক্ত যুৱকজনৰ নাম মহম্মদ ৰইছ  (Mohammed Raees)। অভিযোগ অনুসৰি, ৰইছে ভাৰতীয় সেনাৰ গুৰুত্বপূৰ্ণ তথ্য পাকিস্তানলৈ সৰবৰাহ কৰিছিল। তাৰ বিনিময়ত মোটা অংকৰ ধন পাইছিল। দেওবাৰে এই মন্তব্য কৰে উত্তৰ প্ৰদেশ এটিএছে।

এটিএছৰ সূত্ৰ অনুসৰি, ৰইছ উত্তৰ প্ৰদেশৰ গোণ্ডা জিলাৰ তাৰাৱগঞ্জ অঞ্চলৰ বাসিন্দা। মুম্বাইত কাম কৰি থাকোঁতে তেওঁ আৰমান নামৰ এজন যুৱকক লগ পায়। আৰক্ষীৰ জেৰাত ৰইছে কয় যে আৰমানেই তেওঁক এই চোৰবৃত্তিৰ বাবে ইন্ধন যোগাইছিল।

জেৰাৰ সময়ত ৰইছে এইটোও দাবী কৰে যে তেওঁ আৰমানক আৰৱ আমিৰশ্বাহীত চাকৰি বিচাৰি দিবলৈ কৈছিল। কিন্তু আৰমানে তেওঁক বিপুল পৰিমাণৰ ধনৰ বাবে চোৰাংচোৱাগিৰি কৰিবলৈ প্ৰলোভিত কৰে। এটিএছৰ মতে, ইয়াৰ পিছতেই যোৱা বছৰ হুছেইন নামৰ এজন ব্যক্তিৰ পৰা ৰইছলৈ ফোন আহে। তেওঁ নিজকে পাক চোৰাংচোৱা বুলি পৰিচয় দিয়ে। হুছেইনেই ভাৰতীয় সামৰিক ঘাটিৰ তথ্য সৰকোৱাৰ দায়িত্বও ৰইছক দিছিল। বিনিময়ত ১৫ হাজাৰ টকা ৰইছলৈ প্ৰেৰণ কৰা হয়। ইয়াৰ পিছত ৰইছে নিজৰ কিছুমান বন্ধুক ব্যৱহাৰ কৰি চোৰাংচোৱাগিৰি আৰম্ভ কৰে।

উত্তৰ প্ৰদেশ এটিএছে জনাইছে যে গোপন সূত্ৰৰ পৰা তথ্য লাভ কৰাৰ পিছত দীৰ্ঘদিন ধৰি ৰইছৰ ওপৰত চোৰাংচোৱাগিৰি চলি আছিল। ইয়াৰ পিছতে তেওঁক সোধা-পোছাৰ বাবে লক্ষ্ণৌস্থিত এটিএছৰ মুখ্য কাৰ্যালয়লৈ মাতি অনা হয়। তাতেই তেওঁক গ্ৰেপ্তাৰ কৰা হয়।

এই পৰিপ্ৰেক্ষিতত উত্তৰ প্ৰদেশৰ বিশেষ ডিজি (আইন-শৃংখলা) প্ৰশান্ত কুমাৰে কয়, “এটিএছৰ দ্বাৰা গ্ৰেপ্তাৰ হৈছে ৰইছ নামৰ এজন যুৱক। তেওঁ গোণ্ডাৰ বাসিন্দা। তেওঁক এটিএছৰ মুখ্য কাৰ্যালয়লৈ মাতি অনা হয়। জেৰাৰ সময়ত তেওঁ চোৰাংচোৱাগিৰিৰ সৈতে জড়িত বুলি স্বীকাৰ কৰে।”