আমেৰিকা আৰু ইজিপ্ত ভ্ৰমণ কৰি দেশলৈ উভতি অহাৰ পিছত প্ৰধানমন্ত্ৰী নৰেন্দ্ৰ মোডী (Narendra Modi)ক মণিপুৰৰ সাম্প্ৰতিক পৰিস্থিতিৰ বিষয়ে অৱগত কৰে কেন্দ্ৰীয় গৃহমন্ত্ৰী অমিত শ্বাহে (Home Minister Amit Shah)। যদিও এই সন্দৰ্ভত আনুষ্ঠানিকভাৱে একো ঘোষণা কৰা হোৱা নাই, তথাপিও চৰকাৰী সূত্ৰৰ জৰিয়তে এই খবৰ পোৱা গৈছে।
তিনিদিনীয়া আমেৰিকা আৰু দুদিনীয়া ইজিপ্ত ভ্ৰমণ সমাপ্ত কৰি দেওবাৰে উভতি আহে প্ৰধানমন্ত্ৰীগৰাকী। আনহাতে, দেওবাৰেও মণিপুৰৰ পৰা হিংসাত্মক ঘটনা (Manipur Violence) সংঘটিত হোৱাৰ খবৰ পোৱা গৈছে। দেওবাৰে সন্ধিয়া শ্বাহে ৰাজ্যখনৰ মুখ্যমন্ত্ৰী এন বীৰেণ সিঙৰ সৈতে বৈঠকত মিলিত হয়।
শনিবাৰে বিয়লি দিল্লীত অনুষ্ঠিত সৰ্বদলীয় বৈঠকত সভাপতিত্ব কৰে শ্বাহে। শ্বাহী বৈঠকৰ অন্তত এটা টুইটত বীৰেনে কয়, “মণিপুৰৰ পৰিস্থিতি চম্ভালিবলৈ কেন্দ্ৰীয় চৰকাৰ আৰু ৰাজ্য চৰকাৰ ‘সক্ষম’।” তেওঁৰ বক্তব্যৰ সমৰ্থনত বীৰেণ সিঙে লগতে কয়, “১৩ জুনৰ পৰা ৰাজ্যখনত হিংসাত্মক পৰিস্থিতিৰ বাবে কোনো লোকৰ মৃত্যুৰ খবৰ পোৱা নাই।”
পিছত সংবাদ মাধ্যমৰ সন্মুখত মণিপুৰৰ মুখ্যমন্ত্রীগৰাকীয়ে কয়, “ৰাজ্যৰ সকলো বিধায়ক, ৰাজনৈতিক দলৰ প্রতিনিধি, নাগৰিক মঞ্চৰ সৈতে কথা পতাৰ এয়া আদৰ্শ সময়।” লগতে মণিপুৰৰ পৰিস্থিতিৰ সৈতে মোকাবিলা কৰিবলৈ কেন্দ্ৰীয় গৃহমন্ত্ৰীয়ে নিজৰ চৰকাৰৰ কাষত থিয় দিয়াৰ আশ্বাস দিছে বুলিও তেওঁ কয়।
বীৰেণ সিঙে ৰাজ্যৰ সাম্প্ৰতিক পৰিস্থিতিৰ বিষয়েও বিশদ প্ৰতিবেদন শ্বাহক অৰ্পণ কৰে।সূত্ৰ অনুসৰি, অমিত শ্বাহে মণিপুৰৰ হিংসা ৰোধৰ বাবে কেন্দ্ৰই গ্ৰহণ কৰা পদক্ষেপৰ বিষয়ে বিতংভাৱে প্ৰধানমন্ত্ৰীক অৱগত কৰে।
