শিৱসাগৰ (Sivsagar)ত সংঘটিত শোকাৱহ দুৰ্ঘটনা। সোণগুটি বুটলিবলৈ যোৱাৰ পৰত দিয়া বজ্ৰপাতৰ (Lightning) ফলত দুগৰাকী কৃষক থিতাতে নিহত (farmer killed in lightning strike) হোৱাৰ লগতে আন ৫ গৰাকী কৃষক গুৰুত্বৰভাৱে আঘাতপ্ৰাপ্ত (5 farmers seriously injured) হয়। নিহত দুই কৃষক হৈছে শিৱসাগৰ চহৰখনৰ পৰা ১৫ কিলোমিটাৰ নিলগত থকা সদৰ আৰক্ষী থানাৰ অন্তৰ্গত পান বেচা লৰাপোতা চেনীমাৰা মিচিং গাঁৱৰ অজয় য়েইন আৰু দিগন্ত মিলি।এই ঘটনাত আহত ব্যক্তি সকল হৈছে বিক্ৰম সিং য়েইন, ৰূমী মিলি ( ১৯), গণেশ মিলি (২২) ,পুতলা য়েইন আৰু উৰ্মিলা য়েইন।
স্থানীয় ৰাইজে আঘাতপ্ৰাপ্তসকলক ততাতৈয়াকৈ জৰুৰী সেৱাৰ সহায়ত শিৱসাগৰ অসামৰিক চিকিৎসালয়ত ভৰ্তি কৰে যদিও ইয়াৰে এগৰাকীৰ অৱস্থা গুৰুত্বৰ বুলি জানিবলৈ দিয়ে চিকিৎসকে৷ প্ৰাপ্ত বাতৰি মতে, শিৱসাগৰ চহৰৰ পৰা বহু নিলগৰ চেনীমৰা লৰাপোতা মিচিং গাঁৱৰ ৰাইজৰ বাবে কৃষি হৈছে মূল জীৱিকা ৷ বছৰটোত দুটাকৈ খেতি কৰা ৰাইজে এইবাৰো তেনেদৰে খেতি কৰিছিল। বহুদিন ধৰি খৰাং হৈ আছিল কিন্তু শেহতীয়াকৈ ক’লা মেঘে আৱৰি পৰাৰ ফলত এটা সপ্তাহৰ পুৰ্বে ঘৰৰ সমীপতে থকা পথাৰত ধান দাই শুকাবলৈ মেলি থৈ অহা ধানৰ মুঠি সমূহ সংগ্ৰহ কৰিবৰ বাবে আজি পুৱা অজয় য়েইন, দিগন্ত মিলিকে ধৰি গাওঁখনৰ একাংশ পুৰুষ-মহিলা পথাৰলৈ গৈছিল ৷
সেই সময়ছোৱাত উক্ত পথাৰত বজ্ৰপাত পৰাৰ লগে লগেই ধানৰ মুঠি সংগ্ৰহ কৰি থকা অজয় য়েইন আৰু দিগন্ত মিলি ঠিতাতে নিহত হোৱাৰ লগতে আন পাঁচ গৰাকী যুৱক – যুৱতী গুৰুত্বৰ ভাৱে আহত হয়। ইফালে ভয়ংকৰ প্ৰাকৃতিক দূৰ্যোগৰ খবৰ লাভ কৰি দুৰ্যোগ প্ৰশমণ বিভাগ, আৰক্ষী, দণ্ডাধীশ তথা শীঘ্ৰে শিৱসাগৰ সমষ্টিৰ বিধায়ক অখিল গগৈ ঘটনাস্থলীত উপস্থিত হয়।
বিধায়ক গৰাকীয়ে লগে লগেই জিলা প্ৰশাসনক আহত সকলৰ উন্নত চিকিৎসাৰ ব্যৱস্থাৰ বাবে প্ৰশাসন- অসামৰিক চিকিৎসালয় কৰ্তৃপক্ষক নিৰ্দেশ দিয়াৰ লগতে চিকিৎসাৰ সকলো ব্যয় বহণ কৰাৰ আশ্বাস দিয়ে ৷নিহত দুয়োটা পৰিয়ালৰ বাস গৃহত দীৰ্ঘ সময় কটোৱা অখিল গগৈয়ে নিজা খৰচত নিহতৰ মৰণোত্তৰ পৰীক্ষা আৰু অন্ত্যোষ্টি ক্ৰিয়াৰ বাবে যাৱতীয় ব্যৱস্থা গ্ৰহণ কৰাৰ উপৰিও মৃতকৰ আত্মাৰ সদগতিৰ বাবে মিচিং সম্প্ৰদায়ে অনুষ্ঠিত কৰা ডবুৰ পূজাৰ বাবেও কিছু নগদ ধন দুয়োটা পৰিয়ালক আদায় দিয়ে ৷
বিধায়কগৰাকীয়ে আন বিভাগীয় মন্ত্ৰীগৰাকীকো দুয়োটা দুৰ্ভগীয়া পৰিয়ালক যথা সম্ভৱ ক্ষতিপুৰণ শীঘ্ৰে আদায় দিবলৈ আহব্বান জনায়।উল্লেখ্য যে, নিহত অজয় য়েইনে পত্নীসহ দুগৰাকী কন্যা আৰু এটা ল’ৰা এৰি থৈ যোৱাৰ বিপৰীতে দিগন্ত মিলিয়ে পত্নীৰ লগতে এটি তিনিমহীয়া নৱজাতক এৰি থৈ গৈছে।
