ASSAM TIMES POST
নগাঁও : নগাঁও চহৰকে ধৰি জিলাখনত ড্ৰাগছৰ বৃহৎ সাম্ৰাজ্য গঢ়ি তোলা ইন্টাজ আলী নামৰ এটা দুধৰ্ষ মাফিয়াক আজি আৰক্ষীয়ে গ্ৰেপ্তাৰ কৰে । নগাঁৱৰ ম’হখুলিৰ আজিমউদ্দিনৰ পুত্ৰ ইন্টাজৰ বিৰুদ্ধে নগাঁও সদৰ আৰক্ষী থানাত দুটা গোচৰ ( নং ৩১৭৩/১৯ , ৩২৪০/১৯ ) আৰু কচুৱা আৰক্ষী থানাত ( নং ২৪২ / ১৯ ) এটা গোচৰ পঞ্জীভূত হৈ আছিল । ড্ৰাগছ ব্যৱসায়ৰ লগত জড়িত নেকিবুৰ ৰহমান নামৰ আমিনপট্টিৰ আন এটা ড্ৰাগছ ব্যৱসায়ীকো আৰক্ষীয়ে আজি গ্ৰেপ্তাৰ কৰে । উল্লেখ্য , নগাঁও আৰক্ষীয়ে কামপুৰ আৰক্ষীৰ সৈতে যুটীয়া অভিযান চলাই ২৪ অক্টোবৰৰ নিশা জিলাখনৰ কচুৱাৰ পৰা বৃহৎ পৰিমানৰ নিচাযুক্ত সামগ্ৰীৰ সৈতে এগৰাকী মহিলাক আটক কৰিছিল।
আটকাধীন নুৰনেচা খাটুন নামৰ মহিলা গৰাকীৰ বাসগৃহৰ পৰা আৰক্ষীয়ে নিচাযুক্ত সামগ্ৰীখিনি জব্দ কৰে।আৰক্ষীক নুৰনেচাই জনাইছিল যে নগাঁৱৰ মহখুলিৰ ইন্টাজ আলি নামৰ এজন লোকে এই নিচাযুক্ত সামগ্ৰীখিনি মহিলাগৰাকীৰ ঘৰত ৰাখিছিল। আৰক্ষীয়ে ঘটনা সম্পৰ্কত গোচৰ ৰুজু কৰি ইন্টাজ আলিক কৰায়ত্ব কৰিবলৈ অভিযান আৰম্ভ কৰিছিল। ইফালে এই বাতৰি সংবাদ পত্ৰত প্ৰকাশ হোৱা বাবে ইন্টাজ আলীয়ে নগাঁৱৰ এজন জ্যেষ্ঠ সাংবাদিকক ফোনযোগে মানহানিৰ গোচৰ তৰাৰ ভাবুকি দিছিল ।
সাংবাদিকজনে এই সম্পৰ্কত নগাঁৱৰ আৰক্ষী অধীক্ষক শংকৰব্ৰত ৰায়মেধিক অৱগত কৰাত অধীক্ষক জনে ‘ ম’ষ্ট ৱান্টেড ‘ দুধৰ্ষ ড্ৰাগছ ব্যৱসায়ীটোক শীঘ্ৰে কৰায়ত্ব কৰাৰ বাবে আৰক্ষীক নিৰ্দেশ দিয়ে । আৰক্ষী অধীক্ষকৰ নিৰ্দেশ পাই আৰক্ষীৰ দল ইন্টাজ আলীৰ সন্ধানত নামি পৰে । আজি ইন্টাজ আলীক গ্ৰেপ্তাৰৰ পিছত নগাঁৱত চলি থকা অবৈধ ড্ৰাগছ ব্যৱসায়ৰ বহু নতুন তথ্য উদ্ধাৰ হোৱাৰ আশা আছে । নগাঁও চহৰত দপদপাই ফুৰা এই ড্ৰাগছ মাফিয়াটোৰ লগত আৰক্ষীৰ তলৰ পৰ্যায়ৰ কোনো বিষয়াৰ গোপন সম্পৰ্ক থকাৰ সন্দেহ কৰিছে একাংশ লোকে ।
