Odisha Train Tragedy I কৰমণ্ডলকাণ্ডত ব্যথিত মোডী! জৰুৰীকালীন বৈঠক আহ্বান

ওড়িশাত (Odisha Train Tragedy) ৩ খনকৈ ৰে’ল দুৰ্ঘটনাত পতিত হোৱাত মৃত্যুৰ সংখ্যা তীব্ৰ গতিত বৃদ্ধি পাইছে। সমগ্ৰ ঘটনাক লৈ চিন্তিত প্ৰধানমন্ত্ৰী নৰেন্দ্ৰ মোডী (PM Modi)। শনিবাৰে প্ৰধানমন্ত্ৰীয়ে জৰুৰী বৈঠক আহ্বান কৰি পৰিস্থিতি পুনৰীক্ষণ কৰে। শুকুৰবাৰে সন্ধিয়া চেন্নাই অভিমুখী কৰমণ্ডল এক্সপ্ৰেছ আৰু বেংগালুৰু-হাওৰা ছুপাৰফাষ্ট এক্সপ্ৰেছৰ মাজত দুৰ্ঘটনা সংঘটিত হয়। একে সময়তে এখন মালবাহী গাড়ীও দুৰ্ঘটনাত পতিত হয়।

এই ৩ খন ৰে’ল দুৰ্ঘটনাৰ বাবেই ওড়িশাৰ বালাশ্বৰ এতিয়া মৃতুপুৰী। সূত্ৰ অনুসৰি, প্ৰধানমন্ত্ৰীয়ে হয়তো ৰেʼল দুৰ্ঘটনাত উদ্ধাৰৰ কাম, আহতসকলৰ চিকিৎসাৰ বিষয়ে আলোচনাত মিলিত হʼব পাৰে। এই দুৰ্ঘটনাটো সঠিকভাৱে কেনেকৈ সংঘটিত হয় সেয়া এতিয়াও স্পষ্ট হোৱা নাই। ইতিমধ্যে এই ঘটনা সন্দৰ্ভত উচ্চ পৰ্যায়ৰ তদন্তৰ নিৰ্দেশ দিছে ৰে’লৱেই।

চৰকাৰৰ মুৰব্বী হিচাপে উদ্বিগ্ন প্ৰধানমন্ত্ৰীয়ে এই পৰিস্থিতিত সভা আহ্বান কৰে।সংবাদ সংস্থা পিটিআইৰ বাতৰি অনুসৰি, শনিবাৰে পুৱালৈকে মৃত্যুৰ সংখ্যা ২৩৩ জন। আহত ৯০০ৰো অধিক। অৱশ্যে শনিবাৰে পুৱালৈকে মৃত্যু হোৱা লোকৰ সংখ্যা ২৩৮ জন বুলি ৰেʼলৱেই প্ৰকাশ কৰিছে। আহত ৬৫০ জনতকৈ অধিক।

আহতসকলৰ বাবে ৰক্তদানৰ বাবে বহু লোকে শাৰী পাতিছে। গণেশ নামৰ এজন স্থানীয় বাসিন্দাই সংবাদ সংস্থা এএনআইক জনাইছে, “দুৰ্ঘটনা সংঘটিত হোৱাৰ সময়ত মই ওচৰতে আছিলো। আমি প্ৰায় ২০০-৩০০ লোকক উদ্ধাৰ কৰিছো।” উদ্ধাৰৰ কাম জোৰদাৰভাৱে চলি আছে। প্ৰত্যক্ষদৰ্শীসকলেও আশংকা কৰিছে যে উদ্ধাৰ অভিযান আগবাঢ়ি যোৱাৰ লগে লগে মৃত আৰু আহত লোকৰ সংখ্যা আৰু বৃদ্ধি পাব। এতিয়াও বহু যাত্ৰী ৰে’লখনত আবদ্ধ হৈ আছে বুলি প্ৰত্যক্ষদৰ্শীয়ে জানিবলৈ দিয়ে।