দুৰ্নীতিৰ বিৰুদ্ধে শূন্য সহনশীলতা নীতি অৱলম্বন কৰাৰ প্ৰতিশ্ৰতি প্ৰদান কৰা খোদ বিজেপি দলৰে এগৰাকী বিজেপি নেতৃৰ দুৰ্নিতীৰ কাহিনীয়ে সমগ্ৰ পাহাৰীয়া জিলা কাৰবি আংলঙত সম্প্ৰতি বিশেষ চৰ্চাৰ বিষয় হৈ পৰিছে৷ বিগত কেইবা দিন ধৰি এই বিষয়লৈ পাহাৰীয়া জিলাখন উত্তপ্ত হৈ পৰিছে৷
অভিযোগ অনুসৰি চিইএম, বিধায়কৰ নামলৈ চাকৰি দিয়াৰ প্ৰলোভনেৰে নেত্ৰী মুন ইংতিপীয়ে (Moon Intipi) একাংশ লোকৰ পৰা সংগ্ৰহ কৰিছিল বহু কোটি টকা।
এইলৈ কাৰবি আংলং জিলা (Karbi Anglong Dist.) বিজেপি কৃষাণ মৰ্চাৰ সম্পাদিকা মুন ইংতিপী (Moon Ingtipi, secretary of Karbi Anglong BJP Kisan Morcha) আৰু চেমিয়ন তেৰাং (Semyon Terang) নামৰ আন এগৰাকী প্ৰৱঞ্চকক ভুক্তভোগীৰ এজাহাৰৰ ভিত্তিত প্ৰৱঞ্চনাৰ গোচৰত কালি নিশা ডিফু আৰক্ষীয়ে গ্ৰেপ্তাৰ (Diphu police arrested) কৰে ৷
অভিযোগ অনুসৰি চেমিয়ন তেৰাং আৰু মুন ইংতিপীয়ে কাৰবি আংলং জিলাৰ একাংশ যুৱক-যুৱতীক চাকৰি দিয়াৰ প্ৰলোভনেৰে সংগ্ৰহ কৰিছিল ১ কোটি, ৫২ লাখ ৫০ হাজাৰ টকা৷ বুধবাৰে লাংহিনত এক সংবাদমেলত এই কেলেংকাৰীৰ তথ্য ফাদিল কৰিছিল ভুক্তভোগীসকলৰ লগতে যুৱ সংগঠনৰ নেতৃত্বতই৷
মুন ইংতিপী শাসক বিজেপি দলৰ নেত্ৰী হোৱাৰ বাবে মুখ্যমন্ত্ৰী, পৰিষদৰ মুখ্য কাৰ্যবাহী সদস্য, কাৰ্যবাহী সদস্য, বিধায়ক বিদ্যাছিং ইংলেঙৰ অতি ঘণিষ্ঠ আছিল৷ এই সম্পৰ্কৰ আলমতে তেওঁ চাকৰি দিম বুলি বিভিন্নজনৰ পৰা ধন সংগ্ৰহ কৰিছিল৷
নাম লৈছিল নেতাসকলৰ৷ আনকি বহিঃৰাজ্যত বিজেপিৰ হৈ নিৰ্বাচনী প্ৰচাৰ চলাবলৈও এইসকল নেতাৰ লগত প্ৰায়ে যায় মুন ইংতিপী৷ বুধবাৰে সংবাদমেল কৰাৰ পিছতে কালি ভুক্তভোগীসকলে ডিফু থানাত এটি প্ৰৱঞ্চনাৰ গোচৰ তৰে ৷
ইফালে, সংবাদমেলৰ পিছতে ৰাজনৈতিক মহলত ধুমুহাৰ সৃষ্টি হয় ৷ কালি নিশা ডিফু থানাৰ ৫৭/২০২৩ নম্বৰৰ গোচৰৰ ভিত্তিত ৪০৬/৪২০/৩৪ ভাৰতীয় দণ্ডবিধি আইনৰ ধাৰাত মুন ইংতিপীক আৰক্ষীয়ে গ্ৰেপ্তাৰ কৰে৷ ইয়াৰ পিছতে বিজেপি দলে মুন ইংতিপীক বিজেপি দলৰ পৰা বহিস্কাৰ (Moon expelled from the Intipic BJP party) কৰে৷
বিগত দুবছৰ ধৰি এই নেত্ৰীগৰাকীয়ে কেইবাগৰাকী লোকৰ পৰা ঠিকা, প্ৰৱেশ গেট প্ৰদান কৰাৰ নামত ৪ কোটি টকা সংগ্ৰহ কৰা বুলি অভিযোগ উত্থাপন হৈছে৷
আজি দুপৰীয়া মুন ইংতিপীক আদালতলৈ নিয়াৰ সময়ত তেওঁ চিঞৰি চিঞৰি কয় যে মোক ফচাই দিছে ডাঙৰ মানুহসকলে৷
মোক অকলে ধৰিলে নহ’ব আৰক্ষীয়ে তেওঁলোককো ধৰক ৷ মুন ইংতিপীয়ে একে অপৰাধৰ তালিকাত স্বাধীন কিলিঙৰ লগতে ডাঙৰ মানুহবোৰে তেওঁক ফচোৱা বুলি মন্তব্য কৰে৷
ইয়াৰোপৰি ইংতিপীয়ে পাটৰ উপাধিৰ এগৰাকী ব্যক্তিৰ নামো উচ্ছাৰণ কৰে ৷ ডিফু থানাৰ ভাৰপ্ৰাপ্ত আৰক্ষী বিষয়া এছ খুবুঙে আৰক্ষীয়ে অধিক জেৰাৰ বাবে তিনিদিনৰ আৰক্ষী জিম্মাত বিছৰা বুলি কয় ৷ অৱশ্যে এই বাতৰি লিখাৰ পৰলৈকে আদালতে মুন ইংতিপীক কেইদিনৰ জিম্মাত দিছে জানিব পৰা হোৱা নাই৷ মুন ইংতিপীৰ গ্ৰেপ্তাৰে বিজেপি দলৰ ভিতৰত জোকাৰণিৰ সৃষ্টি কৰিছে৷
ধৃত নেত্ৰীগৰাকীৰ মুখৰ পৰা কোনো তথ্য সদৰী নোহোৱাৰ স্বাৰ্থত ডিফু আৰক্ষীয়ে মুন ইংতিপীক সংবাদ মাধ্যমৰ পৰা আতৰত ৰখা কাৰ্যই বিশেষ তাৎপৰ্য বহন কৰিছে। মুন ইংতিপীয়ে সংগ্ৰহ কৰা কোটি কোটি টকাৰ ভাগ কোন কোন নেতাই লাভ কৰিছিল সেয়া পোহৰলৈ আহিব নে বুলিও চৰ্চা লাভ কৰিছে।