২৮ মে’ত উদ্বোধন প্ৰধানমন্ত্ৰীয়ে উদ্বোধন (PM inaugurates on May 28) কৰিব নতুন সংসদ ভৱন (New Parliament Building)। এই অনুষ্ঠানত আন এক ঐতিহাসিক ঘটনাৰ সংযোগ ঘটিব। নতুন সংসদ ভৱনত স্থান লাভ কৰিব ঐতিহাসিক সোণালী ৰাজদণ্ড ‘ছেংগল’-এ । প্ৰধানমন্ত্ৰী নৰেন্দ্ৰ মোডীয়ে লোকসভাৰ অধ্যক্ষৰ আসনৰ কাষত স্থাপন কৰিব এই ৰাজদণ্ড।
ব্ৰিটিছ শাসনৰ পৰা মুক্তিলাভৰ প্ৰতীক হিচাপে দেশৰ প্ৰথম প্ৰধানমন্ত্ৰী জৱাহৰলাল নেহৰুৰ হাতত এই ৰাজদণ্ড তুলি দিয়া হৈছিল।তামিল শব্দ ‘ছেংগল’ৰ অৰ্থ হৈছে ‘ন্যায়’। ব্ৰিটিছশাসিত ভাৰতৰ অন্তিমজন ভাইচৰয় লৰ্ড মাউণ্টবেটেনে এই ৰাজদণ্ড জৱাহৰলাল নেহৰুৰ হাতত অৰ্পণ কৰিছিল। ভাৰতে স্বাধীনতা লাভ কৰাৰ পিছত ক্ষমতা হস্তান্তৰৰ প্ৰতীক হিচাপে এই ৰাজদণ্ড মাউণ্টবেটেনে জৱাহৰলাল নেহৰুক প্ৰদান কৰিছিল।
উল্লেখযোগ্য যে এই ৰাজদণ্ড নিৰ্মাণৰ আঁৰৰ ব্যক্তিজন আছিল দেশৰ অন্তিমজন ৰাজ্যপাল জেনেৰেল চি ৰাজগোপালাচাৰী।তেওঁ তামিলনাডুৰ ৰাজপৰিয়ালৰ ঐতিহ্যৰ কথা উল্লেখ কৰি এই ৰাজদণ্ডৰ ঐতিহ্যৰ বিষয়ে কৈছিল। তামিলনাডুৰ তদানীন্তন ৰজাঘৰৰ প্ৰথা আছিল নতুন ৰজাক ৰাজদণ্ড প্ৰদান কৰাটো। চোল ৰজাৰ ৰাজত্বকালৰ পৰা এই পৰম্পৰা আৰম্ভ হৈছিল।
উক্ত প্ৰথা অনুসৰিয়ে ৰাজগোপালাচাৰীয়ে নেহৰুক ইংৰাজৰ হাতৰ পৰা ৰাজদণ্ড লʼবলৈ পৰামৰ্শ দিছিল।
ৰাজদণ্ড নিৰ্মাণৰ দায়িত্ব দিয়া হৈছিল তামিলনাডুৰ তিৰুৱদুথুৰাই আথিনাম মঠক।আনহাতে, তিৰুৱদুথুৰাই আথিনামে উক্ত দায়িত্ব পুনৰ সেই সময়ৰ মাদ্ৰাজৰ গহনা বিক্ৰেতা ভূমিদি বাংগাৰু চেট্টাৰৰ হাতত অৰ্পণ কৰে। বাংগাৰুৱেই উক্ত সোণৰ ৰাজদণ্ডডাল নিৰ্মাণ কৰিছিল।
পাঁচ ফুট ওখ ছেংগলৰ মূৰত আছে এটা ‘নন্দী’ মʼহ। ই ন্যায়ৰ প্ৰতীক সূচায়। ৰাজদণ্ড নিৰ্মাণৰ পিছত তাক মাউণ্টবেটেনৰ হাতত অৰ্পণ কৰা হয়। আনহাতে, ১৯৪৭ চনৰ ১৫ আগষ্টত মাজনিশাৰ পোন্ধৰ মিনিট পূৰ্বে ছেংগল নেহৰুৰ হাতত অৰ্পণ কৰে মাউণ্টবেটেনে।
বৰ্তমান এলাহাবাদৰ সংগ্ৰহালয়ত থকা এই ছেংগলে অহা ২৮ মে’ৰ পৰা দেশৰ নতুন সংসদৰ শোভাবৰ্ধন কৰিব।
