Uttar Pradesh Gang Rape I ঘৰত প্ৰৱেশ কৰি লুণ্ঠনৰ পিছত মাতৃ-কন্যাক দলবদ্ধ ধৰ্ষণ!

উত্তৰ প্ৰদেশত (Uttar Pradesh) পুনৰ দলবদ্ধ ধৰ্ষণৰ (Gang Rape) অভিযোগ। এগৰাকী মহিলা আৰু তেওঁৰ ১৪ বছৰীয়া কন্যাক দলবদ্ধ ধৰ্ষণৰ অভিযোগ। পিছত মহিলাগৰাকীৰ স্বামীয়ে আৰক্ষীৰ কাষ চাপে। অভিযোগ অনুসৰি, ৩ জন অচিনাক্ত যুৱকে তেওঁৰ ঘৰত প্ৰৱেশ কৰি নগদ ধন আৰু মোবাইল ফোন লুট কৰে।

ইয়াৰ পিছত তেওঁক বান্ধি থয় আৰু তাৰ পিছত পত্নী আৰু কন্যাক দলবদ্ধ ধৰ্ষণ কৰা বুলি অভিযোগ কৰে। এই ঘটনা উত্তৰ প্ৰদেশৰ ৰামপুৰ জিলাৰ সৌফনি গাঁৱৰ। আৰক্ষীৰ তথ্য অনুসৰি, যোৱা দেওবাৰে প্ৰথমে যুৱকজনে নিজৰ মোবাইল ফোন আৰু ৫ হাজাৰ টকা চুৰিৰ কথা জনায়। তাৰ কিছু সময়ৰ পাছত পুনৰ থানালৈ গৈ দলবদ্ধ ধৰ্ষণৰ অভিযোগ দিয়ে। লোকজনে দাবী কৰিছে যে শনিবাৰে নিশা পত্নী আৰু কন্যাক দলবদ্ধ ধৰ্ষণ কৰা হৈছিল।

আৰক্ষী অধীক্ষক অশোক কুমাৰ শুক্লাই (Ashok Kumar Shukla) কয়, “যুৱকজনৰ ২টা অভিযোগৰ স্বৰূপ সন্দেহজনক। তথাপিও আমি তদন্ত কৰি আছো।” কাইফ নামৰ এজন অভিযুক্তক গ্ৰেপ্তাৰ কৰা হৈছে। তদন্তত আৰক্ষীয়ে জানিব পাৰে যে কিছুদিন পূৰ্বে অভিযোগকাৰীয়ে কাইফৰ লগত কাজিয়া কৰিছিল। আৰক্ষীৰ সূত্ৰ অনুসৰি, এই ঘটনা তেওঁৰ বাবে হৈছেনে নাই তদন্ত চলি আছে।

ইফালে এই ঘটনাত সমাজবাদী পাৰ্টীৰ নেতা অখিলেশ যাদৱে (Akhilesh Yadav) ৰাজ্যৰ বিজেপি চৰকাৰক আক্ৰমণ কৰে। ৰাজ্যৰ আইন-শৃংখলাক লৈ তেওঁ প্ৰশ্ন উত্থাপন কৰে। উত্তৰ প্ৰদেশত উন্নাও, লখিমপুৰৰ খেৰী, হাথৰাছৰ দৰে মহিলাৰ ওপৰত হোৱা কেইবাটাও হিংসাৰ ঘটনা সংঘটিত হোৱাৰ বাবে বিগত সময়ত বাতৰিৰ শিৰোনাম দখল কৰি আহিছে। ৰাজ্যখনত মহিলাৰ সুৰক্ষাৰ বিষয়টো বিৰোধীয়ে বাৰে বাৰে উত্থাপন কৰি আহিছে।