গুৰুতৰভাৱে অসুস্থ আবকাৰী দুৰ্নীতিৰ গোচৰত কাৰাগাৰত (Jail in corruption case) থকা দিল্লীৰ প্ৰাক্তন উপ-মুখ্যমন্ত্ৰী মনীষ ছিছোদিয়াৰ পত্নী সীমা (Manish Sisodia’s wife Seema)। তেওঁক ব্যক্তিগত চিকিৎসালয়ত ভৰ্তি কৰোৱা হয়। বৰ্তমান তেওঁ তাত চিকিৎসাধীন হৈ আছে। মনীষ, সীমাৰ একমাত্ৰ পুত্ৰই বিদেশত পঢ়ে।
মঙলবাৰে সীমাক সংকটজনক অৱস্থাত দিল্লীৰ ইন্দ্ৰপ্ৰস্থ অঞ্চলৰ এখন ব্যক্তিগত চিকিৎসালয়ত ভৰ্তি কৰোৱা হয়। তেওঁ এক জটিল দুৰাৰোগ্য ৰোগত আক্ৰান্ত। চিকিৎসালয়ৰ সূত্ৰ অনুসৰি, সীমাৰ শাৰীৰিক অৱস্থা ক্ৰমশ বেয়ালৈ গৈ আছে। সেয়ে কোনো ধৰণৰ ৰিস্ক নোলোৱাকৈ তেওঁক ততাতৈয়াকৈ চিকিৎসালয়লৈ লৈ যোৱা হয়।
ফেব্ৰুৱাৰী মাহত চিবিআয়ে আপ নেতা তথা তদানীন্তন দিল্লীৰ উপ-মুখ্যমন্ত্ৰী চিছোদিয়াক গ্ৰেপ্তাৰ কৰিছিল। তেওঁ তেতিয়াৰ পৰাই জে’লত আছে। জে’ললৈ যোৱাৰ পিছত ইডিয়ে দ্বিতীয়বাৰৰ বাবে গ্ৰেপ্তাৰ কৰে চিছোদিয়াক। তদন্তকাৰী সংস্থাটোৱে দাবী কৰিছে যে আবকাৰী দুৰ্নীতিৰ গোচৰত চিছোদিয়া জড়িত।
যদিও অৰবিন্দ কেজৰিৱালৰ আপে আৰম্ভণিৰে পৰা দাবী কৰি আহিছে যে কেন্দ্ৰীয় সংস্থাটোৰ দাবীৰ আঁৰত ৰাজনীতিৰ খেল আছে। দিল্লীৰ শাসকীয় দলে চিছোদিয়াৰ সমৰ্থনত ওলাই আহিছে। কিন্তু চিছোদিয়াই এতিয়াও জামিন লাভ কৰা নাই। ইয়াৰ মাজতে তেওঁৰ পত্নীক অসুস্থতাৰ বাবে চিকিৎসালয়ত ভৰ্তি কৰোৱা হয়। উল্লেখযোগ্য যে চিছোদিয়াক গ্ৰেপ্তাৰ কৰাৰ পিছত দিল্লীৰ মুখ্যমন্ত্ৰী কেজৰিৱাল আৰু পঞ্জাবৰ মুখ্যমন্ত্ৰী ভগৱন্ত সিং মানে সীমাৰ ঘৰত উপস্থিত হৈ সীমাৰ কাষত থিয় হোৱাৰ কথা কয়।
কেজৰিৱালে কয়, “সীমা অতি জটিল ৰোগত আক্ৰান্ত হৈছে। শুনা মতে এই ৰোগত মগজুৱে লাহে লাহে শৰীৰৰ ওপৰত নিয়ন্ত্ৰণ হেৰুৱাই পেলায়। সীমা অকলে ঘৰত থাকিবলগা হৈছিল। আন সময়ত মনীষে তেওঁক চোৱা-চিতা কৰিছিল। কিন্তু এতিয়া তেওঁ তেনেকুৱা কৰিব নোৱাৰে। তেওঁলোকৰ এজনে পুত্ৰ। তেওঁ বিদেশত পঢ়ি আছে।”
