অহা ১৪ এপ্ৰিলত অসমে (Assam) এক ইতিহাস সৃষ্টি কৰিবলৈ গৈ আছে। উক্ত ঐতিহাসিক মুহূৰ্তত উপস্থিত থাকিব প্ৰধানমন্ত্ৰী (PM) নৰেন্দ্ৰ মোদী (Narendra Modi)। উল্লেখ্য, ১৪ এপ্ৰিলত সৰুসজাই ষ্টেডিয়ামত প্ৰায় ১০,০০০ বিহুৱা আৰু নাচনীয়ে বিহু প্ৰদৰ্শন কৰি বিশ্ব ৰেকৰ্ড (World Record) গঢ়িব। উক্ত অনুষ্ঠানত উপস্থিত থাকিব মোদী। আনহাতে, প্ৰধানমন্ত্ৰীয়ে একেদিনাই সৰ্বভাৰতীয় চিকিৎসা বিজ্ঞান প্ৰতিষ্ঠান চমুকৈ এইমছ গুৱাহাটীৰো উদ্বোধন কৰিব।
আনহাতে, একেটা দিনতে প্ৰধানমন্ত্ৰীৰ আছে আৰু কেইবাটাও কাৰ্যসূচী। মুঠতে এক ব্যস্ততাপূৰ্ণ কাৰ্যসূচীৰে প্ৰধানমন্ত্ৰী অসমলৈ আহিব। ১৪ এপ্ৰিলত প্ৰধানমন্ত্ৰীৰ বিভিন্ন কাৰ্যসূচীসমূহ আৰম্ভ হ’ব এনেদৰে :
১৪ এপ্ৰিলৰ পুৱা ১১.৩০ বজাত গুৱাহাটীৰ গোপীনাথ বৰদলৈ বিমানবন্দৰত উপস্থিত হ’ব প্ৰধানমন্ত্ৰী। তাৰ পৰা তেওঁ হেলিকপ্টাৰেৰে আইআইটি-গুৱাহাটীলৈ উৰা মাৰিব। তাৰ পৰা গৈ প্ৰধানমন্ত্ৰীয়ে এইমছ-গুৱাহাটীৰ উদ্বোধনী কাৰ্যসূচীত অংশগ্ৰহণ কৰিব।
প্ৰধানমন্ত্ৰীয়ে এইমছৰ চৌহদৰ পৰা আন তিনিখন চিকিৎসা মহাবিদ্যালয়ো উদ্বোধন কৰিব। সেইকেইখন হৈছে নগাঁও, কোকৰাঝাৰ আৰু নলবাৰী।
প্ৰধানমন্ত্ৰী মোদীয়ে ১৪ এপ্ৰিলত ৰাজ্যিক ৰেচন কাৰ্ডৰ গৰাকীসকলক প্ৰতীকী প্ৰকাৰে আয়ুষ্মান কাৰ্ড বিতৰণ আৰম্ভ কৰিব। উল্লেখ্য যে ৰাজ্য চৰকাৰে শেহতীয়া বাজেটত মুখ্যমন্ত্ৰী শীৰ্ষক স্বাস্থ্য বীমা আঁচনিৰ ওপৰত গুৰুত্ব আৰোপ কৰিছিল
সেয়া হৈছে কেন্দ্ৰীয় চৰকাৰৰ আয়ুষ্মান ভাৰত আঁচনিৰ আৰ্হিত আয়ুষ্মান অসম। 14 এপ্ৰিলৰ ভিতৰত 1.10 কোটি ৰেচন কাৰ্ড ধাৰকৰ বাবে আয়ুষ্মান কাৰ্ড প্ৰস্তুত কৰা হ’ব। ৰাজ্যত হিমন্ত বিশ্ব শৰ্মাৰ মিত্ৰজোঁট চৰকাৰৰ দুবছৰ পূৰ্তি উপলক্ষে স্বাস্থ্য আঁচনিখন ১০ মে’ত আৰম্ভ হ’ব।
তাৰ পিছত প্ৰধানমন্ত্ৰীয়ে আই আই টি গুৱাহাটীত স্থাপিত হ’বলগীয়া এখন বিশ্বমানৰ গৱেষণা হস্পিটেল ভাৰ্চুৱেলি মুকলি কৰিব। এই হস্পিটেলখন অসম চৰকাৰ আৰু আই আই টি গুৱাহাটীৰ যৌথ উদ্যোগত প্ৰতিষ্ঠা হ’ব।
ইয়াৰ পিছত মোদীয়ে হেলিকপ্টাৰেৰে খানাপাৰা ভেটেৰিনাৰী খেলপথাৰত অৱতৰণ কৰি তাৰ পৰা পোনে পোনে কলাক্ষেত্ৰলৈ ৰাওনা হ’ব। শ্ৰীমন্ত শংকৰদেৱ কলাক্ষেত্ৰত ১.৪৫ বজাত প্ৰধানমন্ত্ৰীয়ে গুৱাহাটী উচ্চ ন্যায়ালয়ৰ মহাৰজত জয়ন্তীৰ সামৰণী অনুষ্ঠানত অংশগ্ৰহণ কৰিব।
এই অনুষ্ঠানৰ সামৰণিৰ পিছত মোদীয়ে গৈ কইনাধৰাৰ ৰাজ্যিক অতিথিশালাত কিছু সময় জিৰণি ল’ব। তাৰ পৰা তেওঁ সৰুসজাই ষ্টেডিয়ামলৈ ৰাওনা হ’ব।
তাৰ পৰা তেওঁ নামৰূপৰ অসম পেট্ৰ’কেমিকেল লিমিটেডৰ 500 TPD-Methanol প্ৰকল্প, ৰংঘৰৰ সৌন্দৰ্যবৰ্ধন প্ৰকল্পৰ উদ্বোধন আৰু পলাশবাৰী-শুৱালকুচি সংযোগী চাৰিলে’নযুক্ত দলঙৰ আধাৰশিলা ভাৰ্চুৱেলি স্থাপন কৰিব। ইয়াৰ পিছত তেওঁ অসমৰ ইতিহাসৰ বিৰল আৰু ঐতিহাসিক মুহূৰ্তৰ সাক্ষী হ’ব প্ৰধানমন্ত্ৰী নৰেন্দ্ৰ মোদী। অসমৰ প্ৰায় ১১ হাজাৰ ঢুলীয়া-নাচনীৰ ১৫ মিনিটজোৰা বিহুনাচৰ পোনপটীয়া অনুষ্ঠান উপভোগ কৰিব মোদীয়ে।
