সুদীৰ্ঘ ৩৩ বছৰ নগাঁও কলেজত (Nagaon College) শিক্ষকতা কৰি আজি অৱসৰ গ্ৰহণ কৰা শিক্ষা প্ৰতিষ্ঠানখনৰ উপাধ্যক্ষ (Vice Chairman) ৰামপ্ৰসাদ পৌৰেলক কলেজখনৰ শিক্ষক পৰিষদৰ তৰফৰ পৰা সম্বৰ্ধনা জ্ঞাপন কৰা হয় ।
এই উপলক্ষে নগাঁও কলেজ(অট’নমাচ)ৰ ভূগোল বিজ্ঞান বিভাগৰ অধ্যাপক ধ্ৰুৱজ্যোতি বৰুৱাৰ সভাপতিত্ব অনুষ্ঠিত সম্বৰ্ধনা সভাত মহাবিদ্যালয়খনৰ ৰাজনীতি বিজ্ঞান বিভাগৰ অধ্যাপক ড০ ৰঞ্জিত কুমাৰ মজিন্দাৰে ড০ পৌৰেলৰ কৰ্মজীৱনৰ লগতে তেওঁৰ সৈতে থকা সৌহাদ্যপূৰ্ণ সম্পৰ্কৰ কথা ব্যক্ত কৰে।
ড: পদ্মেশ্বৰ সেনাপতিয়ে আঁত ধৰা সভাখনত ড: পৌৰেলৰ কৰ্মজীৱনৰ সহকৰ্মী কেইবা গৰাকী অধ্যাপক অধ্যাপিকাই নিজ ভাষণত সদ্য অৱসৰী উপাধ্যক্ষ গৰাকীৰ গুণৰাজিৰ বিষয়ে উল্লেখ কৰে। আনহাতে ড: ৰামপ্ৰসাদ পৌৰেলৰ শৈশৱ কালৰ পৰা আৰম্ভ কৰি কৰ্মজীৱন সামৰি নগাঁও কলেজ শিক্ষক পৰিষদে প্ৰস্ত্তত কৰা এখনি তথ্য চিত্ৰ সভাত পৰিবেশন কৰা হয়।
নগাঁও কলেজ শিক্ষক পৰিষদৰ দ্বাৰা আয়োজিত সম্বৰ্ধনা সভাত বিদ্যয়ী উপাধ্যক্ষ ড০ পৌৰেলে নগাঁও কলেজৰ লগত থকা তেওঁৰ আত্মিক সম্পর্কৰ কথা উল্লেখ কৰি অৱসৰৰ পাচতো শিক্ষা প্ৰতিষ্ঠানখনৰ লগত জড়িত থকাৰ ইচ্ছা ব্যক্ত কৰে । উল্লেখ্য যে ১৯৯০ বৰ্ষৰ ৩১ মে’ত বুৰঞ্জী বিভাগৰ প্ৰবক্তা হিচাপে কৰ্মত যোগদান কৰা ড: ৰামপ্ৰসাদ পৌৰেলৰ সহজ সৰল ব্যক্তিত্বই শিক্ষা প্ৰতিষ্ঠানখনৰ শিক্ষক-কৰ্মচাৰী আৰু ছাত্ৰ-ছাত্ৰীসকলক মুগ্ধ কৰি আহিছে।
