ASSAM TIMES POST
নতুন দিল্লীঃ উচ্চতম ন্যায়ালয়ে মঙলবাৰে মহাৰাষ্ট্ৰৰ আস্থা ভোটৰ বাবে সময়সীমা বান্ধি দিয়ে বুধবাৰে সন্ধিয়া ৫ বজা। বিধায়কৰ শপতগ্ৰহণৰ পাছত সন্ধিয়া ৫ বজাৰ লগে লগে মহাৰাষ্ট্ৰৰ আস্থা ভোট সম্পন্ন হ’ব লাগিব বুলি উচ্চতম ন্যায়ালয়ে স্পষ্টভাৱে কয়।
মহাৰাষ্ট্ৰৰ ৰাজ্যপাল ভগত সিং কুছয়াৰীয়ে ভাৰতীয় জনতা পাৰ্টিক মহাৰাষ্ট্ৰৰ পৰৱৰ্তী চৰকাৰ গঠন কৰিবলৈ নিমন্ত্ৰণ কৰা কাৰ্যক প্ৰত্যাহ্বান জনাই শিৱ সেনা, কংগ্ৰেছ আৰু নেচনেলিষ্ট কংগ্ৰেছ পাৰ্টি (এনচিপি)য়ে যুটীয়াভাৱে সৰ্বোচ্চ ন্যায়ালয়ত দাখিল কৰা আবেদনৰ ভিত্তিতে ছুপ্ৰিম ক’ৰ্টে এই নিৰ্দেশনা প্ৰদান কৰিলে। সেয়েহে নিয়ম অনুসৰি বুধবাৰে প্ৰথমে ৰাজ্যপালে বিধান সভাৰ প্ৰ-টেম অধ্যক্ষক শপত বাক্য পাঠ কৰাব।
তাৰ পাছত, প্ৰ-টেম অধ্যক্ষই মহাৰাষ্ট্ৰ বিধান সভাৰ ২৮৭ গৰাকী বিধায়কক শপত বাক্য পাঠ কৰোৱাব। ইয়াৰ পাছতে আস্থা ভোটৰ বাবে ওৱান-লাইন হুইপ জাৰি কৰা হৈছে আৰু সেয়ে ভোট দান আৰম্ভ হ’ব। ইয়াত কোনেও গোপন বেলটৰ ব্যৱহাৰ কৰিব নোৱাৰিব আৰু সমগ্ৰ প্ৰক্ৰিয়া ৫ বজাৰ পূৰ্বে সমাপ্ত হ’বই লাগিব। সৰ্বোচ্চ ন্যায়ালয়ে গোটেই প্ৰক্ৰিয়াটোৰ লাইভ টেলিকাষ্ট কৰিবলৈয়ো নিৰ্দেশ প্ৰদান কৰে।
