ASSAM TIMES POST
ডিফুঃ ভাৰত চৰকাৰৰ ডিজিটেল ইণ্ডিয়াক অনুসৰণ কৰি ষ্টেট বেঙ্ক অফ ইণ্ডিয়াইয়ো গ্ৰাহকক উৎকৃষ্ট সেৱা আগবঢ়াবলৈ কেতবোৰ আধুনিক ডিজিটেল প্ৰডাক্ট আৰম্ভ কৰিছে ৷ এইলৈ শুকুৰবাৰে বিয়লি ডিফু স্থিত ষ্টেট বেঙ্ক অফ ইণ্ডিয়াৰ উদ্যোগত ডিফু ক্লাৱত স্থানীয় গ্ৰাহক আৰু সচেতন লোক সকলক লৈ টাউন হল মীট অনুষ্ঠিত কৰে ৷
টাউন হল মীটৰ মুখ্য অতিথি হিছাপে থাকে এছবিআই গুৱাহাটী এলঅ’চৰ ডিজিএম এন কে পাল, এছবিআইআৰএছইটি আইৰ সঞ্চালক প্ৰশান্ত কুমাৰ শৰ্মা আৰু এছবিআই ডিফু শাখাৰ শাখা প্ৰৱন্ধক ৰাহুল ডি শইকীয়া ৷ টাউন হল মীটৰ আৰম্ভণিতে এছবি আইৰ অনলাইন প্ৰডাক্ট ব্যৱহাৰৰ নেতিবাচক আৰু ইতিবাচক দিশ সমূহক লৈ এছবিআই ডিফু শাখাৰ সহকাৰী শাখা প্ৰৱন্ধক পৰাণ ডেকাই প্ৰজেক্টাৰৰ জৰিয়তে উপস্থিত গ্ৰাহক সকলৰ মাজত সহজ ভাষাৰে বুজাই দিয়ে ৷
এটিএম ব্যৱহাৰ কৰি অনলাইন শ্বপিং বা কেতবোৰ বিত্তীয় লেনদেনৰ সময়ত গ্ৰাহক সকলে গোপন পিন বা পাছৱৰ্ড সমুহ কমন পাছৱৰ্ড হিছাপে লব নালাগে সদায় আনকমন পাছ ৱৰ্ড ব্যৱহাৰ কৰাৰ লগতে এটিএম খনৰ গোপন পিন বা এটিএম খন কাৰো হাতত চমজাই দিব নালাগে বুলি পৰামৰ্শ আগবঢ়ায়৷ চাইবাৰ অপৰাধীয়ে নিজকে বেংকৰ লোক বুলি পৰিচয় দি ফোন কল বা এছএমএছেৰে গ্ৰাহকৰ এটিএমৰ সবিশেষ বিচাৰে তাত ভোলগৈ এটিএম কাৰ্ডখনৰ সবিশেষ প্ৰকাশ কৰিব নালাগে কাৰণ তাৰ বাবে আপোনাৰ একাউণ্টৰ ধন অন্তৰ্ধান হব পাৰে ৷
ইয়াৰোপৰি এছবিআইৰ “ইউন’ এপছ “মোবাইলত ডাউন লোড দি অতি সহজ আৰু নিৰাপদ ভাবে এটিএম অবিহনে নগদ ধন উলিওৱাৰ কৌশল সন্দৰ্ভতো গ্ৰাহক সকলক পৰাণ ডেকাই অৱগত কৰে ৷ ইউন’ এপছৰ জৰিয়তো গ্ৰাহকৰ মোবাইলত ওৱান টাইম পাছৱৰ্ড সৃষ্টি কৰি নিকটৱৰ্তী এটিএমৰ পৰা এটি নোহোৱাকৈ ধন উলিয়াব পাৰি বুলিও জনায় ৷
এছবিআইৰ ডিফু শাখাৰ শাখা প্ৰৱন্ধক ৰাহুল ডি শইকীয়াই পোন প্ৰথমবাৰৰ বাবে ভাৰতত আৰম্ভ হোৱা এছবিআইৰ ইউন’ এপছ অনলাইন লেনদেনৰ এক যুগান্তকাৰী আৰু নিৰাপদ ব্যৱস্থা বুলি মন্তব্য কৰাৰ লগতে ক্ৰমান্বয়ে বৰ্দ্ধিত গ্ৰাহকৰ চাহিদা পূৰণাৰ্থে চহৰ খনত এটিএমৰ সংখ্যা আৰু বেংকৰ কাউণ্টাৰৰ সংখ্যা বৃদ্ধি কৰা হব বুলিও জনায় ৷ ইয়াৰোপৰি উপস্থিত টাউন হল মীটৰ জৰিয়তে মুকলি প্ৰশ্নোত্তৰ পৰ্ব ৰখা হয়, যাৰ জৰিয়তে গ্ৰাহক সকলে বেংক লেনদেনত বিভিন্ন সমস্যাৰ সমাধান বিচাৰি প্ৰশ্ন কৰে আৰু বেংক বিষয়া সকলে তাৰ সমিধান দিয়ে ৷
