ASSAM TIMES POST
ডিফুঃ পাহাৰীয়া জিলা কাৰবি আংলঙৰ সদৰ চহৰ ডিফুৰ জীয়ৰী বন্দিতা টেৰণপীয়ে ৰাজনীতি বিজ্ঞানত পিএইছডি লাভ কৰি সদৰ চহৰখনলৈ গৌৰৱ কঢ়িয়াই আনিছে ৷ শুকুৰবাৰে অসম বিশ্ব বিদ্যালয় ডিফু চৌহদত বন্দিতা টেৰণপী মৌখিক পৰীক্ষাত উত্তীৰ্ণ হোৱাৰ পিছত বিশ্ববিদ্যালয় খনৰ উপাচাৰ্য শিৱাশিষ বিশ্বাসে বন্দিতা টেৰণপীৰ ডক্টৰেট ডিগ্ৰী ঘোষণা কৰে ৷
ডক্টৰেট ডিগ্ৰী লাভ কৰাৰ লগে লগে বন্দিতাৰ ডিফুৰ লৰুলাংছ’স্থিত বাসভৱনত এক উৎসৱ মূখৰ পৰিবেশৰ সৃষ্টি হয়৷ বহু শুভাকাংখীয়ে বন্দিতাৰ বাসভৱনলৈ গৈ ডঃ বন্দিতা টেৰণপীক শুভেশ্ছা আৰু শুভ কামনা জ্ঞাপন কৰা পৰিলক্ষিত হয় ৷ সাংবাদিকৰ সাক্ষাতকাৰত বন্দিতা টেৰণপীয়ে তাইৰ সফলতাৰ বাবে প্ৰথমে ভগৱানক কৃতজ্ঞতা জ্ঞাপন কৰে ৷ তাই কয় যে, তাই অসম বিশ্ববিদ্যালয় ডিফু চৌহদৰ পৰা ৰাজনীতি বিজ্ঞান বিভাগত ” ফাংছনিং অফ কাৰবি আংলং অট’নমাছ কাউঞ্চিল আৰু ডিমা হাছাও অট’নমাছ কাউঞ্চিলৰ ষ্টাডি অন দা ষ্টেট ৰিলেছনশ্বীপৰ ওপৰত গৱেষণা কৰিছিল ৷
বন্দিতাই বিশ্ববিদ্যালয়খনৰ ৰাজনীতি বিজ্ঞান বিভাগৰ মুৰব্বী অধ্যাপক কেচি দাসৰ তত্বাৱধনাত গৱেষণাত ব্ৰতী হৈ ডিফুলৈ গৌৰৱ কঢ়িয়াই আনিবলৈ সক্ষম হয় ৷ বন্দিতা টেৰণপীয়ে নৱ প্ৰজন্মক সামাজিক আৰু ৰাজনৈতিক সমস্যাত গুৰুত্ব আৰোপ কৰিবলৈ আহ্বান জনায়, কাৰণ সমাজৰ উন্নয়ণ হলেহে ৰাজনীতিৰ উন্নয়ণ সম্ভৱ বুলি কয় বন্দিতা টেৰণপীয়ে ৷ বন্দিতা টেৰণপীয়ে প্ৰাথমিক শিক্ষা আহৰণ কৰে ডিফু ডনবস্ক’ হাইস্কুলৰ পৰা, স্নাতক হয় বোকাজান ইষ্টাৰ্ণ কলেজৰ পৰা আৰু স্নাতকোত্তৰ আৰু পিএইছ ডি লাভ কৰে অসম বিশ্ব বিদ্যালয় ডিফু চৌহদৰ পৰা ৷
বন্দিতা টেৰণপী বৰ্তমান হোজাই ৰবীন্দ্ৰ নাথ ঠাকুৰ বিশ্ব বিদ্যালয়ৰ ৰাজনীতি বিজ্ঞানৰ সহকাৰী প্ৰৱক্তা ৰূপে সেৱা আগবঢ়াই আহিছে ৷ বন্দিতা টেৰণপী ডিফুৰ ৰতন টেৰণ আৰু অনুমাই ইংতিপীৰ জ্যেষ্ঠ কণ্যা ৷ পিতৃ ৰতন টেৰণ কাৰবি আংলং স্বায়ত্ত শাসিত পৰিষদৰ কাৰ্যবাহী সদস্য আৰু বিজেপি পূব কাৰবি আংলঙৰ সভাপতি পদত অধিষ্ঠিত ৷
