ASSAM TIMES POST
ডিফুঃ অলপতে আৰম্ভ হবলগীয়া অসম পাৰ্বত্য চিকিৎসা মহাবিদ্যালয়ৰ তৃতীয় আৰু চতুৰ্থ বৰ্গৰ কৰ্মচাৰীৰ নিযুক্তি প্ৰক্ৰিয়াৰ ক্ষেত্ৰত ৰাজ্য চৰকাৰে গ্ৰহণ কৰা ভূমিকাৰ বিৰুদ্ধে সৰৱ হৈ পৰিছে জিলাখনৰ কেইবাটাও দল- সংগঠন ৷ কেএছএ, কুইয়া,কেএছৱাইচি,কেএফএ আৰু কেএনএৰ তৰফৰ পৰা ডিফু ৰংথিয়াংস্থিত কাৰবি ছাত্ৰ সন্থাৰ মুখ্য কাৰ্যালয়ত এক সংবাদ মেলৰ আয়োজন কৰি মহাবিদ্যালয়খনৰ নিযুক্তি প্ৰক্ৰিয়াত কেতবোৰ অনিয়ম সংঘটিত হোৱাৰ গুৰুতৰ অভিযোগ উত্থাপন কৰে৷
কাৰবি আংলঙত অলপতে অনুষ্ঠিত হোৱা লিখিত পৰীক্ষাৰ পিছত তৃতীয় আৰু চতুৰ্থ বৰ্গৰ কৰ্মচাৰী নিযুক্তিৰ মৌখিক পৰীক্ষাৰ স্থান নিশাটোৰ ভিতৰতে গুৱাহাটীলৈ স্থানান্তৰিত কৰা হল বুলি কৈ ইয়াৰ বাবে আচৰ্য প্ৰকাশ কৰে সংগঠন কেইটাই ৷ চৰকাৰৰ এনে সিদ্ধান্তৰ আঁৰৰ ৰহস্য কি বুলি প্ৰশ্ন উত্থাপন কৰে এনে সিদ্ধান্তক গৰিহণা দিয়ে ৷ এনে বুজন সংখ্যক নিবণুৱাক একেবাৰত সংস্থাপন দিয়াৰ সুযোগ কাৰবি আংলং বাসীয়ে দুনাই নাপায় মন্তব্য কৰি সংগঠনৰ নেতৃবৰ্গই লগতে কয়যে, এই সুযোগ থলুৱা খিলঞ্জীয়া যুৱক সকলে পোৱাৰ বিপৰীতে বাহিৰা প্ৰাৰ্থীয়ে পালে কাৰবি আংলং স্বায়ত্ত শাসিত মৰ্যদাৰ ওপৰত মাধমাৰ সোধোৱা হব বুলিও ক্ষোভ উজাৰে ৷
কাৰবি আংলং স্বায়ত্ত শাসিত পৰিষদৰ সৈতে কোনো আলোচনা নকৰাকৈ কেনেদৰে মৌখিক পৰীক্ষাৰ স্থান গুৱাহাটীলৈ সলনি কৰা হল বুলি মন্তব্য কৰি পৰিষদ চৰকাৰখনে নিজৰ স্বায়ত্ত শাসনৰ মৰ্যদা ৰক্ষা কৰিবলৈ সক্ষম হৈছেনে নাই ৰাজহুৱা কৰিবলৈ আহ্বান জনাইছে সংগঠন সমূহে ৷ ৰাজ্যৰ স্বাস্থ্য মন্ত্ৰী ডাঃ হিমন্ত বিশ্ব শৰ্মাই ৰাজহুৱা সভাত কাৰবি আংলং স্বায়ত্ত শাসিত পৰিষদে তৃতীয় আৰু চতুৰ্থ বৰ্গৰ পদ সমূহ পূৰ কৰাৰ দায়িত্ব লাভ কৰিব বুলি ঘোষণা কৰাৰ পিছতো নিশাৰ ভিতৰতে সেই ক্ষমতা কৰ্তন কৰা হল বুলি কটাক্ষ কৰে ৷
আনহাতে আজি পুৱাৰ ভাগত কাৰবি আংলং স্বায়ত্ত শাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙৰ সৈতে হোৱা আলোচনা কালত সংগঠন কেইটাই পূৰ্বে কৰা দাবী অনুসৰি চিকিৎসা মহাবিদ্যালয় খনৰ ৯০ শতাংশ পদত থলুৱা প্ৰাৰ্থীক নিযুক্তি প্ৰদানৰ দাবী কৰা হয় আৰু আলোচনা সৌহাৰ্দপূৰ্ণ হয় বুলিও সংগঠনৰ নেতা সকলে মন্তব্য কৰে ৷ ইয়াৰোপৰি ডিফু চিভিল হাস্পাতালৰ চতুৰ্থ বৰ্গৰ ঠিকাভিত্তিক কৰ্মচাৰীৰ নিযুক্তিৰ বিষয়টো বিবেচনা কৰা হৈ আছে বুলি মুখ্য কাৰ্যবাহী সদস্য গৰাকী সংগঠন সমূহক জানিব দিয়ে বুলি উল্লেখ কৰে ৷
