যোৱা ৬ ফেব্ৰুৱাৰীৰ পৰা ডিফুত চলি থকা অসম গ্ৰন্থমেলা (Assam Book Fair) ডিফু (Diphu) ২০২৩ৰ আজি চতুৰ্থ দিনত বিশিষ্ট কবি অনুভৱ তুলসী সঞ্চালনাত বহুভাষিক কবি সন্মিলনেৰে গ্ৰন্থমেলাটি জীপাল কৰি তোলা পৰিলক্ষিত হয়৷ কালি সন্ধিয়াৰ কিনকিনীয়া বৰষুণ আৰু চেঁচা বতাহে সেমেকাই তোলাৰ পাছত আজিৰ ফৰকাল বতৰে অসম গ্ৰন্থমেলা, ডিফুত আনন্দমুখৰ পৰিৱেশ সৃষ্টি কৰে৷
অসম প্ৰকাশন পৰিষদ (Assam Prakashan Parishad), সদৌ অসম পুথি প্ৰকাশক আৰু বিক্ৰেতা সংস্থাৰ উদ্যোগত তথা কাৰবি আংলং জিলা প্ৰশাসনৰ সহযোগত ডিফু চৰকাৰী উচ্চতৰ মাধ্যমিক বালক বিদ্যালয় খেলপথাৰত আয়োজন কৰা এই গ্ৰন্থমেলাত আজি বিক্ৰেতাসকলক উৎসাহী কৰিছে যদিও বিক্ৰিৰ হাৰ আশা ব্যঞ্জক নহয় বুলি উদ্যোক্তাসকলে জানিবলৈ দিছে৷
আগন্তুক তিনিদিনত কিতাপ বিক্ৰীৰ পৰিসংখ্যা বৃদ্ধি পাব বুলি আশা প্ৰকাশ কৰি গ্ৰন্থপ্ৰেমীসকলৰ সহযোগিতা কামনা কৰিছে অসম প্ৰকাশন পৰিষদৰ লগতে আন আন প্ৰকাশন গোষ্ঠীসমূহে৷ইপিনে গ্ৰন্থমেলাৰ লংকাম টেৰণ সোঁৱৰণী প্ৰেক্ষাগৃহত আজি বিয়লি ৩ বজাত অনুষ্ঠিত বহুভাষিক কবি সন্মিলন সঞ্চালনা কৰে বিশিষ্ট কবি অনুভৱ তুলসীয়ে৷
ইয়াত কবিতা পাঠ কৰে ছাৰএৎ হাঞ্চে, অৰুণ টেৰণ, হাংমিজি হাঞ্চে, বিজয় শংকৰ বৰ্মন, অপৰাজিতা পূজাৰী, কাদম্বিনী তেৰংপি,মঞ্জু টেৰণপি, গোপাল থাওচেন, জনাৰ্দন পাটৰ মছৰং, মিল’জা বসুমতাৰী, দদেৰে মাইনাও বড়ো, ৰাণা কাফলে, গৌতম ৰয়, হাৰ্ভে কাথাৰ, শৰৎ পাটৰ, প্ৰজ্ঞা পাৰমিতা বৰুৱা, মণিকা টেৰণপী, জুবিলী গগৈ, জুলি বৰুৱা, দেৱৰাজ মিলি, স্বপ্না সৰকাৰ, লাংমিৰ হাঞ্চেপি, ৰিজু কাকতি কোঁচ, ৰশ্মিৰীয়া গগৈ,কৌস্তৱ খাউণ্ড, কামিনী বড়ো, দিপালী আমফিয়ে ৷ সন্ধিয়া মনপৰশা সাংস্কৃতিক কাৰ্যসূচীৰ আঁত ধৰে প্ৰবোধ দাসে৷
