ASSAM TIMES POST
ডিফুঃ নিখিল ভাৰত কংগ্ৰেছ কমিটিৰ তৰফৰ পৰা প্ৰাক্তন মন্ত্ৰী খৰছিং ইংতিক কাৰবি আংলং জিলা কংগ্ৰেছৰ সভাপতি ৰূপে দায়িত্ব অৰ্পণ কৰিছে ৷ সেইদৰে যুৱনেতা তথা কাৰবি আংলং স্বায়ত্ত শাসিত পৰিষদৰ প্ৰাক্তন কাৰ্যবাহী সদস্য অশোক টেৰণক কাৰ্যকৰী সভাপতি ৰূপে দায়িত্ব অৰ্পণ কৰিছে ৷ জিলা কংগ্ৰেছৰ গুৰু দায়িত্ব লাভ কৰা দুয়োজন নেতাক আজি ডিফুস্থিত কংগ্ৰেছৰ মুখ্য কাৰ্যালয়ত সহস্ৰাধিক দলীয় কৰ্মী- সমৰ্থকে বিপুলভাবে আদৰণি আৰু উষ্ম সম্বৰ্ধনা জনায় ৷
জিলা কংগ্ৰেছৰ বিভিন্ন পৰ্যায়ৰ নেতা – কৰ্মীয়ে সম্বৰ্ধনা সভাত উপস্থিত হৈ শীৰ্ষ নেতা দুগৰাকীক হৰ্ষোল্লাসৰ মাজত দললৈ আদৰি আনে ৷ ৰাইজৰ সম্বৰ্ধনা গ্ৰহণ কৰি দলৰ উৰ্দ্ধতন কৰ্তৃপক্ষক ধন্যবাদ জ্ঞাপন কৰাৰ লগতে দায়িত্ব গ্ৰহণৰ পিছত দলটোক কিদৰে জনমুখী কৰিব পাৰিব তাৰ বাবে ব্যৱস্থা গ্ৰহণ কৰিব বুলি মন্তব্য কৰে ৷
এএছডিছিৰ দীঘলীয়া শাসনৰ অন্তত যিদৰে ৰাইজে কংগ্ৰেছক আদৰি লৈছিলতেনেদৰে পৰৱৰ্তী সময়তো ৰাইজৰ আস্থা লাভ কৰিবলৈ কংগ্ৰেছে সক্ষম হব পাৰিব বুলি নেতা গৰাকী আশাবাদী ৷ আনহাতে কাৰ্যকৰী সভাপতি ৰূপে জিলা কংগ্ৰেছৰ দায়িত্ব লাভ কৰা যুৱ নেতা অশোক টেৰণে পৰৱৰ্তী পৰ্যায়ত ৰাইজৰ সহায় – সহযোগিতা কামনা কৰিছে ৷
প্ৰসংগ ক্ৰমে উল্লেখ যোগ্য যে এএছডিচিৰ দীঘলীয়া শাসনৰ পিছত কংগ্ৰেছে শাসনৰ বাঘজৰী চম্ভালী ১৫ বছৰীয়া অবিসম্বাদী হিচাপে ৰাজত্ব চলাইছিল যদিও বিজেপিৰ ঈৰ্শনীয় উত্থানত জিলাখনত কংগ্ৰেছে সকলো নিৰ্বাচনী প্ৰক্ৰিয়াত ব্যৰ্থতা প্ৰদান কৰি থানবান হৈ পৰে ৷ নৱ নিযুক্ত নেতা দুগৰাকীয়ে কেনেদৰে পৰৱৰ্তী সময়ত দলক আগুৱাই নিব সেয়া লক্ষণীয় হৈ পৰিছে।
