১৫ হাজাৰ লোকক হত্যা কৰাৰ (Killer man) পৰিকল্পনা কৰি মুম্বাইত গ্ৰেপ্তাৰ হোৱা ফয়াজ প্ৰেমজী পুনেৰ পৰা মুম্বাইলৈ আহিছিল। তাতে ডংৰিত এখন হোটেল ভাড়াত লৈছিল। তেওঁ নিজৰ ‘লক্ষ্য পূৰণ’ৰ বাবে শুকুৰবাৰৰ এটি সমদল বাছি লৈছিল।
আৰক্ষীয়ে জনোৱা মতে, প্ৰেমজীয়ে ১৫ দিন ধৰি প্ৰস্তুতি চলাইছিল। তেওঁ প্ৰায় ১৫ হাজাৰ কেপচুলত এন্দুৰৰ বিষ ভৰাইছিল। ইয়াৰ পিছত সেইবোৰ পোনে পোনে মুম্বাইলৈ লৈ যায়।
তদন্তকাৰী সূত্ৰৰ মতে, জেৰাৰ সময়ত প্ৰেমজীয়ে দাবী কৰে যে ইয়াক হত্যা বুলি কোৱাটো সঠিক নহ’ব, তেওঁ এক ‘মহান কাম’ কৰিবলৈ ওলাইছে। এনডিটিভিৰ প্ৰতিবেদন অনুসৰি, বিবাহ বিচ্ছেদৰ পিছত তেওঁৰ আচৰণত অস্বাভাৱিক পৰিৱৰ্তন হোৱা বুলি দাবী কৰিছে চুবুৰীয়াই। প্ৰতিবেদন অনুসৰি, ১৫ দিন পূৰ্বে প্ৰেমজী মুম্বাইলৈ আহিছিল।
তদন্তকাৰীয়ে সন্দেহ কৰিছে যে তেওঁ হোটেলত বহি থকাৰ সময়তে সমগ্ৰ কামটোৰ পৰিকল্পনা কৰিছিল।আৰক্ষীৰ সূত্ৰ অনুসৰি, প্ৰেমজীৰ পৰা উদ্ধাৰ হৈছে ১৪,৯০০টা কেপচুল। তেওঁৰ উদ্দেশ্য আছিল কেৱল এইবোৰ বিতৰণ কৰা। কিন্তু তেওঁ জানিছিল যে এই কাম অকলে কৰা সম্ভৱ নহয়।
তদন্তকাৰীয়ে সন্দেহ কৰিছে যে তেওঁ এই কেপচুল বিতৰণৰ বাবে দুজনমান লোকক ব্যৱহাৰ কৰিছিল। কিন্তু তেওঁ কাক ভাড়াত লৈছিল আৰু কিমান কেপচুল তেওঁলোকৰ হাতত গতাই দিছিল সেইটো বিচাৰি উলিওৱাটো এতিয়া আৰক্ষীৰ বাবে এক ডাঙৰ প্ৰত্যাহ্বান।
তদন্তকাৰীয়ে প্ৰেমজীক জেৰা কৰি সকলো তথ্য আহৰণৰ চেষ্টা চলাইছে।
প্ৰেমজীৰ ঘৰ পুনেৰ বিমান নগৰত। দেউতাকে ৰং কৰা কাৰখানাত কাম কৰে। মাক আৰু ভনীয়েক ইৰাণত থাকে। তদন্তকাৰীৰ সূত্ৰ অনুসৰি, প্ৰেমজীয়ে যোৱা বছৰ ইৰাণ আৰু ইৰাকো ভ্ৰমণ কৰিছিল। তাত দুমাহ কাম কৰে।
২০১৯ চনৰ পৰা ২০২৫ চনৰ ভিতৰত তেওঁ কেইবাবাৰো ইৰাণ আৰু ইৰাক ভ্ৰমণ কৰিছিল। কিন্তু পিছত স্থায়ীভাৱে পুনেলৈ উভতি আহিছিল। উল্লেখ্য যে শুকুৰবাৰে মুম্বাইত সমদলত প্ৰেমজীয়ে বিষাক্ত কেপচুল বিতৰণ কৰে। আৰক্ষীয়ে জনোৱা মতে, তেওঁ বিতৰণ কৰা কেপচুল সেৱন কৰি কেইবাজনো লোক অসুস্থ হৈ চিকিৎসালয়ত ভৰ্তি হয়।
অৱশ্যে তেওঁলোকৰ অৱস্থা সুস্থিৰ। আৰক্ষীৰ সূত্ৰ অনুসৰি, শুকুৰবাৰে সমদল কৰি প্ৰেমজীয়ে কেপচুল বিতৰণ কৰি আছিল। বিতৰণ কৰাৰ সময়ত তেওঁ দাবী কৰিছিল যে এই কেপচুলবোৰ সেৱন কৰিলে বিষ নিৰাময় হ’ব আৰু ৰোগ প্ৰতিৰোধ ক্ষমতা বৃদ্ধি পাব। বহুতে তেওঁক বিশ্বাস কৰি কেপচুলবোৰ লৈ যায়।
আনকি দুই-এজনে কেপচুলবোৰ খাইছিলো। প্ৰেমজীয়ে কিবা এটা বিতৰণ কৰা দেখি সমদলত উপস্থিত থকা একাংশ মহিলাই তেওঁৰ ওপৰত সন্দেহ কৰি আৰক্ষীক সতৰ্ক কৰি দিয়ে। ইয়াৰ পিছতে আৰক্ষী আহি প্ৰেমজীক গ্ৰেপ্তাৰ কৰে।
