প্রধানমন্ত্রী নৰেন্দ্র মোদীয়ে (PM Modi) প্রায় ৩২০০ কিলোমিটাৰ দূৰৈৰ দ্বীপৰাষ্ট্র ছিচিলিৰ সৈতে ভাৰতৰ সম্পর্ক গঢ়ি তুলিছে৷ তেওঁ বুজাই দিলে যে ভাৰত মহাসাগৰে দুয়োখন দেশৰ মাজত দূৰত্ব সৃষ্টি কৰা নাই।
ইয়াৰ বিপৰীতে ই দুয়োখন দেশক অধিক ওচৰ চপাই আনিছে। দেওবাৰে ছিচিলিৰ ৰাষ্ট্ৰীয় বিধানসভাত দিয়া ভাষণত তেওঁ দুয়োখন দেশৰ সম্পৰ্কৰ গভীৰতাৰ ওপৰত আলোকপাত কৰে। আনহাতে, বিশ্বৰ বিভিন্ন দেশৰ সংসদত ২০ বাৰ বক্তৃতা প্ৰদান কৰা একমাত্ৰ ভাৰতীয় প্ৰধানমন্ত্ৰী হিচাপে পৰিগণিত হৈছে মোদী।
পূব আফ্ৰিকাৰ দ্বীপৰাষ্ট্ৰখনৰ স্বাধীনতাৰ সোণালী জয়ন্তী উদযাপনৰ বিশেষ অতিথি হিচাপে প্ৰধানমন্ত্ৰীক আমন্ত্ৰণ জনোৱা হৈছে। শনিবাৰে তিনিদিনীয়া ভ্ৰমণসূচীৰে তেওঁ ছিচিলিত উপস্থিত হয়। দেওবাৰে মোদীক দেশখনৰ ‘গাৰ্ডিয়ান অফ দা ব্লু হৰাইজন’ সন্মানেৰে সন্মানিত কৰা হয়। ছিচিলিৰ ৰাষ্ট্ৰপতি পেট্ৰিক হাৰ্মাইনে মোদীক এই সন্মান প্ৰদান কৰে।
পিছত দেশৰ সংসদত দিয়া ভাষণৰ সময়ত মোদীয়ে এই সন্মানৰ বাবে ছিচিলিৰ জনসাধাৰণক ধন্যবাদ জ্ঞাপন কৰে। প্ৰধানমন্ত্ৰী হোৱাৰ পিছৰে পৰা মোদীয়ে আন্তঃৰাষ্ট্ৰীয় কূটনীতিত ভাৰতৰ গুৰুত্ব বৃদ্ধিৰ উদ্যোগ লৈছে।
তেওঁৰ প্ৰধানমন্ত্ৰিত্বৰ অধীনত যোৱা ১২ বছৰত আন্তঃৰাষ্ট্ৰীয় ক্ষেত্ৰখনত ভাৰতৰ গুৰুত্ব বাঢ়িছে। ছিচিলিৰ ৰাষ্ট্ৰীয় বিধানসভাত প্ৰধানমন্ত্ৰীৰ ভাষণৰ পিছত ভাৰত চৰকাৰে কয় যে বিদেশী সংসদত ২০ বাৰ ভাষণ দিয়া প্ৰথমজন ভাৰতীয় প্ৰধানমন্ত্ৰী হিচাপে পৰিগণিত হৈছে মোদী।
২০১৪ চনত ক্ষমতালৈ অহাৰ পিছত তেওঁ ফিজি, অষ্ট্ৰেলিয়া, নেপাল আৰু ভূটানৰ সংসদত ভাষণ দি আহিছে। ছিচিলিৰ সংসদত দিয়া এই ভাষণ আছিল বিদেশী সংসদত তেওঁৰ ২০ সংখ্যক ভাষণ। এই ১২ বছৰত তেওঁ দুবাৰকৈ আমেৰিকাৰ কংগ্ৰেছত বক্তৃতা প্ৰদান কৰিছে। এইবাৰ তেওঁ ইজৰাইলৰ সংসদতো ভাষণ দিছে।
ইয়াৰ উপৰি প্ৰধানমন্ত্ৰীয়ে ব্ৰিটেইন, আফগানিস্তান, ইথিওপিয়া, নামিবিয়া, ট্ৰিনিদাদ এণ্ড ট’বাগো, ঘানা, গায়ানা, মালদ্বীপ, উগাণ্ডা, মংগোলিয়া, মৰিচাছ আৰু শ্ৰীলংকাৰ সংসদতো ভাষণ দিছে।
দেওবাৰে ছিচিলিৰ সংসদত দিয়া ভাষণৰ আৰম্ভণিতে মোদীয়ে দ্বীপৰাষ্ট্ৰখনৰ সাধাৰণ জনতাক সম্ভাষণ জনায়। তেওঁ কয়, “এই সংসদত ভাষণ দিয়া প্ৰথমজন ভাৰতীয় প্ৰধানমন্ত্ৰী হোৱাটো মোৰ বাবে এক বৃহৎ সন্মান। মই আপোনালোকৰ বাবে লৈ আহিছোঁ ১৪০ কোটি ভাৰতীয়ৰ শুভেচ্ছা।”
প্ৰধানমন্ত্ৰীয়ে ছিচিলিৰ সৈতে ভাৰতৰ দীৰ্ঘদিনীয়া বন্ধুত্বৰ কথাও স্মৰণ কৰে। দ্বীপৰাষ্ট্ৰখনৰ স্বাধীনতাৰ ৫০ বছৰীয়া জয়ন্তী উপলক্ষে তেওঁ কয়, “আমাৰ বন্ধুত্ব ৫০ বছৰ আগতে আৰম্ভ হোৱা নাছিল। এই বন্ধুত্ব বহু আগতেই আৰম্ভ হৈছিল। ১৭৭০ চনৰ আগষ্ট মাহত। সেই সময়ত টেলমেক জাহাজত চেণ্ট এন্ন দ্বীপত উপস্থিত হোৱাসকলৰ ভিতৰত পাঁচজন ভাৰতীয়ও আছিল। ইয়াৰ ফলত আৰু বহুতে অনুসৰণ কৰাৰ পথ প্ৰশস্ত হৈছিল।”
উল্লেখ্য যে প্ৰধানমন্ত্ৰী হোৱাৰ পিছত ভাৰত মহাসাগৰ অঞ্চলত মোদীয়ে প্ৰথম ভ্ৰমণ কৰা দেশখন আছিল ছিচিলি। প্ৰধানমন্ত্ৰীয়ে দেওবাৰে দিয়া ভাষণত উক্ত ভ্ৰমণৰ কথাও উল্লেখ কৰে।
১১ বছৰ আগৰ সেই ভ্ৰমণৰ কথা স্মৰণ কৰি তেওঁ কয়, “মই ভাবোঁ ভাৰত মহাসাগৰ অঞ্চলৰ বাবে আমাৰ পৰিকল্পনাত ছিচিলিৰ বিশেষ স্থান আছে। সেইবাবেই মই ইয়ালৈ আহিলোঁ। এতিয়া এটা দশকৰ পিছত পুনৰ ইয়ালৈ উভতি অহাৰ পিছত মোৰ বিশ্বাস আগতকৈ অধিক শক্তিশালী হৈছে।” ভাৰত আৰু ছিচিলিৰ ভৌগোলিক দূৰত্ব দুয়োখন দেশৰ সম্পৰ্কত বাধাৰ সৃষ্টি নহ’ব বুলিও প্ৰধানমন্ত্ৰীয়ে স্পষ্ট কৰি দিয়ে।
তেওঁ কয়, “যদিও ছিচিলিক ভাৰত মহাসাগৰ অঞ্চলৰ কেইটামান দ্বীপ হিচাপে মানচিত্ৰত দেখুওৱা হৈছে, আমাৰ বাবে ই বহুত ডাঙৰ। আমি ছিচিলিক এনে এখন দেশ হিচাপে দেখিবলৈ পাওঁ, যাৰ দিগন্ত উপকূলৰ বহু ওপৰলৈকে বিস্তৃত হৈ আছে। ভাৰত মহাসাগৰে ছিচিলিক ভাৰতৰ পৰা আঁতৰাই ৰাখিব পৰা নাই। ই আমাক আৰু ওচৰলৈ লৈ গৈছে।”
