পুনৰ মধ্যবিত্ত শ্ৰেণীৰ মূৰত ৰাম টাঙোন মাৰি এইবাৰ আকৌ বাঢ়িছে গাখীৰৰ দাম। গুজৰাট কো-অপাৰেটিভ মিল্ক মার্কেটিং ফেডাৰেচন আৰু মাদাৰ ডেইৰীয়ে মঙলবাৰে ঘোষণা কৰে যে অহা ১৭ আগষ্টৰ পৰা অৰ্থাৎ কাইলৈৰ পৰা প্ৰতি লিটাৰ গাখীৰৰ দাম বৃদ্ধি পাব।
গুজৰাট কো-অপাৰেটিভ মিল্ক মাৰ্কেটিং ফেডাৰেচনে জনোৱা মতে, কাইলৈৰ পৰা প্ৰতি লিটাৰত ২ টকাকৈ বৃদ্ধি কৰা হʼব আমুল ব্ৰেণ্ডৰ গাখীৰ। আমুলৰ গ’ল্ড, শক্তি আৰু তাজা গাখীৰৰ দাম বৃদ্ধি পাইছে।
আমুল ব্ৰেণ্ডৰ গাখীৰ উপলব্ধ দেশৰ সকলো ৰাজ্যতে বুধবাৰৰ পৰা কাৰ্যকৰী হʼব নতুন মূল্য। গুজৰাট কো-অপাৰেটিভ মিল্ক ফেডাৰেচনেও গৰুৰ খাদ্যৰ ব্যয় ব্যাপক বৃদ্ধি আৰু গাখীৰ উৎপাদনৰ ব্যয়ৰ বাবে গাখীৰৰ দাম বৃদ্ধি কৰাৰ সিদ্ধান্ত লোৱাৰ কথাও জনাইছে।
আনহাতে, আমুলৰ লগতে মাদাৰ ডেইৰী ব্ৰেণ্ডৰ গাখীৰৰ দামো বৃদ্ধি পাইছে। কোম্পানীটোৱে প্ৰতি লিটাৰত ২ টকাকৈ গাখীৰৰ দাম বৃদ্ধি কৰিছে। বুধবাৰৰ পৰা কাৰ্যকৰী হʼব নতুন মূল্য।
