চীনৰ আকাশ হঠাৎ ৰক্তৰ দৰে টিকটিকিয়া ৰঙা হৈ উঠাত আতঙ্ক বিয়পিল। দৃশ্যটি দেখা গৈছে চীনৰ ঝুসান চহৰত। ভিডিওত ধৰা পৰিছে সেই দৃশ্য।
এই ঘটনাক কেন্দ্ৰ কৰি নানা ধৰণৰ জল্পনাও চলিছে। কোনো কোনোৱে দাবী কৰিছে, আকাশ ৰঙা হোৱাৰ ঘটনাই সঙ্কেত দিছে কোনো অশুভ কিবা ঘটিবলৈ আগবাঢ়িছে।
ঝুসানৰ এজন বাসিন্দাই কয়, “এনে ধৰণৰ দৃশ্য আগতে কেতিয়াও দেখা নাই। এই ঘটনাই ইঙ্গিত দিছে যে আগন্তুক সাত দিনৰ ভিতৰত ভূমিকম্প হ’বলৈ আগবাঢ়িছে দেশত।”
কি কাৰণত আকাশ ৰঙা হৈ গৈছে সেয়া পৰীক্ষা কৰিছে ঝুসানৰ বতৰ বিজ্ঞান বিভাগেও। অৱশ্যে এইটো পোহৰৰ প্রতিসৰণৰ কাৰণেই হ’ব পাৰে বুলি তেওঁলোকৰ অনুমান। কিন্তু বিষয়টি সঠিক কি, তাৰ কাৰণ অনুসন্ধানৰ চেষ্টা কৰিছে বতৰ বিজ্ঞানীসকলে।
১৭৭০ চনত এনে ধৰণে আকাশ ৰঙা হৈ গৈছিল। একেৰাহে নদিন ধৰি ৰঙা হৈছিল আকাশ। পিছত জাপানৰ বিজ্ঞানীসকলে দাবী কৰিছিল, এইটো সৌৰজাগতিক ঘটনা। ঝুসানৰ ঘটনা তেনে ধৰণৰে নেকি সেয়া অনুসন্ধান কৰিছে বিজ্ঞানীসকলে।
