ৰাঙলুত দুৰ্বৃত্তৰ গুলীত আহত পেট্ৰল ডিপোৰ মেনেজাৰ : ধন লুট

নগাঁও , ১০ অক্টোবৰ ঃঃ নগাঁও জিলাৰ ৰাঙলুৰ এঘাৰ মাইলস্থিত হিন্দুস্তান পেট্ৰলিয়ামৰ তেল ডিপোৰ সন্মুখত আজি বিয়লি ৫ বজাত অজ্ঞাত বন্দুকধাৰীয়ে ডিপোটোৰ পৰিচালক গৰাকীক গুলী চালনা কৰা ঘটনাই চাঞ্চল্যৰ সৃষ্টি কৰিছে।অজ্ঞাত বন্দুকধাৰীৰ গুলীত গুৰুতৰ ভাবে আহত পৰিচালক জন হ’ল ৰাজকুমাৰ জৈন ।প্ৰাপ্ত খবৰ মতে বিয়লি তেল ডিপোটোৰ পৰিচালক গৰাকীয়ে দিনটোৰ সংগৃহীত ধন লগতলৈ নগাঁও চহৰলৈ আহিবলৈ ৰৈ থকা অৱস্হাতে তিনিখন বাইকত অহা ছয়জনীয়া দুৰ্বৃত্তৰ দলে লোকজনক ঘেৰাও কৰি লৈ টকা ভৰ্তি বেগটো কাঢ়িবলৈ চেষ্টা কৰে।কিন্তু পৰিচালকজনে বেগটো এৰি নিদিয়াত তেওঁলৈ লক্ষ্য কৰি দুৰ্বৃত্তৰ দলটোৱে গুলীচালনা কৰে।দুৰ্বৃত্তৰ দলটোৰ গুলী তেওঁৰ ভৰিত লগাত পৰিচালকজন মাটিত ঢলি পৰে।ফলত তেওঁ মুৰতো আঘাট পায়।আনহাতে পেট্ৰল পাম্পটোৰ কৰ্মচাৰী সকলে সেই দৃশ্য প্ৰত্যক্ষ কৰি দুৰ্বৃত্তৰ দলটোলৈ খেদা মাৰি যায়।তেতিয়া দুৰ্বৃত্তৰ দলটোৱে টকা ভৰ্তি বেগটো কাঢ়ি লৈ পলায়ন কৰে।সেই সময়ত দলটোৱে শূণ্যলৈও গুলীচালনা কৰে।দুৰ্বৃত্তৰ দলটোৱে পাঁচজাই গুলী চালনা কৰা বুলি স্থানীয়লোকে প্ৰকাশ কৰিছে। জানিব পৰামতে বেগটোত ডেৰ লক্ষাধিক টকা আছিল। আহত পৰিচালকজনক উদ্ধাৰ কৰি নগাঁৱলৈ চিকিৎসাৰ বাবে আনে ।পিছত চিকিৎসকৰ পৰামৰ্শ ক্ৰমে লোকজনক উন্নত চিকিৎসাৰ বাবে গুৱাহাটীলৈ প্ৰেৰণ কৰা হয়।ইতিমধ্যে ঘটনাস্থলীত নগাঁও আৰক্ষীৰ শীৰ্ষ কৰ্তৃপক্ষ উপস্থিত হৈছেগৈ।আৰক্ষীয়ে ঘটনা সম্পৰ্কত তদন্ত আৰম্ভ কৰিছে যদিও অপৰাধীক বৰ্তমানলৈকে কৰায়ত্ব কৰিব পৰা নাই। আহত তেল ডিপোৰ মেনেজাৰজনৰ ঘৰ নগাঁও চহৰৰ হয়বৰগাঁৱত বুলি জানিব পৰা গৈছে ।