নিউজ ডেস্কঃ
দেশত ওমিক্রন আতঙ্কৰ লগতে সম্ভাৱনা সৃষ্টি হৈছে কোভিডৰ তৃতীয় ঢৌৰ আগমনৰ। ফেব্রুৱাৰী মাহত তৃতীয় ঢৌৰ প্রকোপ সৰ্বাধিক হ’ব পাৰে বুলি অনুমান বিশেষজ্ঞ মহলৰ। এইবাৰ নির্দিষ্ট তাৰিখ উল্লেখ কৰি উক্ত ধাৰণাক অধিক দৃঢ় কৰিলে কানপুৰ আইআইটিয়ে।
কানপুৰ আইআইটিৰ গৱেষকসকলৰ অনুমান, ওমিক্রনৰ প্রভাৱতেই দেশত তৃতীয় ঢৌ আহিব পাৰে। ৩ ফেব্রুৱাৰীৰ ভিতৰতই সেয়াই সৰ্ববৃহৎ আকাৰ ধাৰণ কৰিব। ‘ৰডমিক্স’ নামৰ এখন অনলাইন পত্রিকাত প্রকাশিত গৱেষণাৰ ৰিপোর্ট অনুযায়ী, ‘বিশ্বজোৰা ট্রেণ্ড অনুসৰণ কৰি ৰিপোর্টটোৱে পূর্বাভাস দিছে যে ভাৰতত তৃতীয় ঢৌ আৰম্ভ হ’ব ডিচেম্বৰৰ মাজমানৰ পৰা আৰু ইয়াৰ প্রকোপ সৰ্বাধিক হ’ব ফেব্রুৱাৰীৰ আৰম্ভণিৰ ভিতৰতে।’
কেৱল অন্যান্য দেশৰ পৰিসংখ্যা নহয়, আইআইটিৰ গৱেষকসকলে ভাৰতত ইয়াৰ আগৰ দুটা ঢৌৰ খতিয়ান পর্যালোচনা কৰিছে। তেওঁলোকে জনাইছে যে সংক্রমণ শিখৰত উপনীত হ’বলৈ তেওঁলোকৰ পর্যবেক্ষণৰ প্রথম দিনৰ পৰা ৭৩৫ দিন লাগে। প্রথম দিনটো হ’ল ২০২০ চনৰ ৩০ জানুৱাৰী। উক্ত দিনাই ভাৰতত প্রথম কৰোনা সংক্রমণ হৈছিল। এই হিচাবত তৃতীয় ঢৌ আৰম্ভ হোৱাৰ কথা ২০২১ৰ ১৫ ডিচেম্বৰৰ পৰা। তৃতীয় ঢৌৱে সর্বোচ্চ শিখৰ স্পৰ্শ কৰিব ৩ ফেব্রুৱাৰীৰ ভিতৰতেই।
আইআইটি কানপুৰৰ গৱেষক দলৰ সদস্যসকল গণিত আৰু পৰিসংখ্যা বিভাগৰ। ইয়াৰে তিনিগৰাকী সদস্য হৈছে প্রসাদ ৰাজেশভাই, শুভ্রশঙ্কৰ ধৰ আৰু শলভ।
