নিউজ ডেস্কঃ
পত্নী এগৰাকী স্বাধীন স্বতন্ত্র মানুহ, তেওঁ স্বামীৰ দাসী নহয়। পত্নীয়ে যদি কোনো কাৰণত তেওঁৰ বিবাহ বন্ধনৰ পৰা ওলাই আহিব বিচাৰে তেতিয়াহ’লে তেওঁ আহিব পাৰে। জোৰ কৰি তেওঁক এই বিয়াৰ সম্পর্কত বান্ধি ৰাখিব পৰা নাযায়। এক বিবাহ বিচ্ছেদৰ গোচৰত এই ৰায় দিলে খোদ ছুপ্রিম কোৰ্টে। এজন ব্যক্তিয়ে দেশৰ শীর্ষ আদালতত আবেদন জনাইছিল যেন পত্নীক তেওঁৰ সৈতেই পুনৰ সংসাৰ কৰিবলৈ দিয়াৰ কথা কোৱা হয়।
কিন্তু এই গোচৰৰ ৰায়ত ছুপ্রিম কোর্টত ন্যায়াধীশ সঞ্জয় কিষাণ কাউল আৰু হেমন্ত গুপ্তাৰ খণ্ড বিচাৰপীঠে স্পষ্টকৈ জনায় যে পত্নী কেতিয়াও স্বামীৰ অস্থাৱৰ সম্পত্তি বা দাসী নহয় যে তেওঁক ইচ্ছাৰ বিৰুদ্ধে গৈও স্বামীৰ সৈতে সংসাৰ কৰাৰ কথা কোৱা হ’ব। সংশ্লিষ্ট গোচৰটোত পত্নীগৰাকীয়ে আদালতক জনায় যে ২০১৩ চনত তেওঁলোকৰ বিয়াৰ পিছৰ পৰাই প্রতিনিয়ত যৌতুকৰ বাবে অকথ্য অত্যাচাৰ চলাই আহিছে তেওঁৰ স্বামীয়ে। মাৰধৰ কৰাৰ লগতে প্ৰাণে মৰাৰ ভয়ো দেখুওৱা হয়। আনকি তেওঁৰ পিতৃগৃহৰ লোককো মাৰি পেলোৱাৰ ভাবুকি দিয়া হৈছিল। এই শাৰীৰিক আৰু মানসিক নির্যাতনৰ বাবেই তেওঁ বাধ্য হৈছিল স্বামীৰ ঘৰ এৰিবলৈ।
