নিউজ ডেস্কঃ
দেশজুৰি সোমবাৰৰ পৰা দ্বিতীয় পৰ্যায়ৰ টীকাকৰণ আৰম্ভ হৈছে। টীকা পাব ষাঠি ঊর্ধ্বৰ আৰু ৪৫ বছৰৰ বেছি বয়সৰ গুৰুতৰ ৰোগ থকাসকলে। দেশবাসীক টীকা ল’বলৈ সচেতন কৰিবলৈ আজি পুৱাতেই টীকা লয় প্রধানমন্ত্রী মোদীয়ে।
তাত তেওঁক টীকা দিয়ে পুডুচেৰি আৰু কেৰালাৰ দুগৰাকী নাৰ্ছে। টীকা লোৱাৰ আগত ৰসিকতাৰে কথা পাতে কেৰালাৰ ৰোছাম্মা অনিল আৰু পুডুচেৰিৰ পি নিভেদাৰ সৈতে। প্রধানমন্ত্রীক টীকা দিয়াৰ পূৰ্বে অলপতো ভয়ত আছিলেই দুয়োগৰাকী। কিন্তু কথা পতাৰ পিছত সকলো ভয় আঁতৰি যায়। ওলোটাই হাঁহিত বাগৰি পৰাৰ উপক্ৰম হয় দুয়োগৰাকী নাৰ্ছ। কিন্তু কিহৰ কাৰণে ?
সূত্রৰ খবৰ মতে, টীকা দিয়াৰ আগতে প্রধানমন্ত্রীয়ে কয়, ‘ৰাজনীতিকসকলৰ ছাল মোটা। আপোনালোকে পশুক দিয়া ইনজেকচন ব্যৱহাৰ কৰিছে নেকি?’ প্ৰথমতে নাৰ্ছ দুগৰাকীয়ে মোদীৰ এই ৰসিকতা বুজিব পৰা নাছিল। পিছত প্রধানমন্ত্রীয়ে নিজেই সকলো বুজাই দিয়ে। টীকা লোৱাৰ পিছত মোদীয়ে কয়, ‘লগাই দিলা আৰু বুজিও নাপালা।’
উল্লেখ্য, তিনি বছৰ ধৰি এইমছত কাম কৰি আহিছে নিভেদাই। আজি পুৱাতেই জানিবলৈ পাৰে, মোদী আহিছে। তেওঁক টীকা দিয়াৰ পিছত কয়, ‘পিএম ছাৰৰ সৈতে সাক্ষাৎ কৰি বৰ ভাল লাগিল।’
