ASSAM TIMES POST
গোৱালপাৰাঃ গোৱালপাৰাৰ মাটিয়া থানাৰ অন্তৰ্গত সিধাবাৰীত বৃহস্পতিবাৰে পুৱা মাতৃ-পুত্ৰৰ মুণ্ডহীন মৃতদেহ উদ্ধাৰ হোৱাক লৈ অঞ্চলজুৰি তীব্ৰ চাঞ্চল্যৰ সৃষ্টি হৈছে। আৰক্ষী সূত্ৰৰপৰা জানিব পৰা মতে স্থানীয় লোকে পুৱা সিধাবাৰী অঞ্চলৰ কলিতাপাৰাৰ এটা কালভাৰ্টৰ তলত মুণ্ডহীন মৃতদেহ দুটা প্ৰত্যক্ষ কৰে।
পৰৱৰ্তী সময়ত আৰক্ষীক ঘটনা সম্পৰ্কত অৱগত কৰাত আৰক্ষীয়ে মৃতদেহ দুটা উদ্ধাৰ কৰাৰ পাছত জায়দা ভানু (৩২) আৰু তেওঁৰ ৪ বছৰীয়া পুত্ৰ জামিৰুল ইছলাম বুলি চিনাক্ত কৰা হয়। মাটিয়া অঞ্চলৰ গোসাঁইবড়ীৰ ইয়াকুব আলী নামৰ লোকজনে নিশা তেওঁৰ পত্নী আৰু পুত্ৰক নৃশংসভাৱে হত্যা কৰাৰ সন্দেহ কৰিছে আৰক্ষীৰ লগতে স্থানীয় লোকে।
নিহত মহিলাগৰাকীৰ পৰিয়ালে অভিযোগ কৰা মতে যোৱা কিছুদিনৰ পৰাই তেওঁলোকৰ মাজত কাজিয়া চলি আছিল৷ পত্নী আৰু সন্তানক হত্যা কৰা বুলি অভিযোগ উঠা ইয়াকুব আলী বৰ্তমান পলাতক অৱস্থাত আছে৷
মহিলা গৰাকীৰ পৰিয়ালৰ লোকে মাটিয়া থানাত ইতিমধ্যে তেওঁৰ বিৰুদ্ধে এজাহাৰ দাখিল কৰিছে৷ ইয়াকুব আলীয়ে সঘনে মদ্যপান কৰি পত্নীৰ সৈতে কাজিয়াত লিপ্ত হোৱাৰ কথা সদৰী কৰিছে মৃত মহিলাগৰাকীৰ পৰিয়ালে৷
