নতুন দিল্লীত কাৰ্বি-ডিমাছা ভৱন নিৰ্মাণেৰে বিশ্বৰ দৰবাৰত জনজাতীয় ঐতিহ্য-সংস্কৃতিয়ে নতুন পৰিচয় লাভ কৰিবঃ অমিত শ্বাহ
ASSAM TIMES POST
ll নতুন দিল্লীৰ পৰা কামৰুল খান ll
সোমবাৰে ১৩০ কোটি টকা ব্যয় সাপেক্ষে দেশৰ ৰাজধানী নতুন দিল্লীত ভাৰতৰ কেন্দ্ৰীয় গৃহমন্ত্ৰী অমিত শ্বাহে কাৰ্বি আৰু ডিমাছা ভৱনৰ আধাৰশিলা স্থাপন কৰি আন এক ইতিহাস ৰচনা কৰিলে৷
https://youtu.be/4q_2YoA4Fh8
নতুন দিল্লীৰ দ্বাৰকাৰ ১৩ নং ছেক্টৰৰ ১১ আৰু ১২ নং প্লটত অসমৰ দুই পাৰ্বত্য জিলা ক্ৰমে, কাৰ্বি আংলং আৰু ডিমা হাছাওৰ বাবে কাৰ্বি আৰু ডিমাছা ভৱনৰ আধাৰশিলা স্থাপন কৰি গৃহমন্ত্ৰী অমিত শ্বাহে ভাষণ প্ৰসংগত কয় যে ভৱনৰ আধাৰশিলা স্থাপনৰ কাৰ্যসূচী সামান্য হ’লেও আধাৰশিলাৰ অন্তৰালত থকা কাৰ্বি আৰু ডিমাছাসকলৰ ভাৱনাক শ্ৰদ্ধা জনোৱাটো তেওঁৰ বাবে অধিক মহত্বপূৰ্ণ৷
জনপ্ৰিয় প্ৰধান মন্ত্ৰী নৰেন্দ্ৰ মোডীৰ প্ৰসংগ টানি আনি তেওঁ কয় যে নৰেন্দ্ৰ মোডীয়ে কাৰ্যভাৰ গ্ৰহণ কৰাৰ পাছৰ পৰাই উত্তৰ-পূৰ্বাঞ্চলৰ সৰ্বাঙ্গীন বিকাশত গুৰুত্ব দি আহিছে৷ সন্ত্ৰাস জৰ্জৰিত উত্তৰ- পূৰ্বাঞ্চলত বিকাশৰ গংগা বোৱাই বাটপথৰ পৰা আৰম্ভ কৰি শিক্ষা, চিকিৎসা, বাণিজ্য আদি সকলো দিশতে আমোল পৰিৱৰ্তন সাধিবলৈ সক্ষম হৈছে৷
দেশৰ ৰাজধানী নতুন দিল্লীত কাৰ্বি আৰু ডিমাছা ভৱন নিৰ্মাণে বিশ্বৰ মানচিত্ৰত কাৰ্বি-ডিমাছাসকলৰ ঐতিহ্য আৰু সংস্কৃতিয়ে এক নতুন পৰিচয় লাভ কৰিব৷ কাৰ্বি আংলং আৰু ডিমা হাছাও জিলাৰ প্ৰচুৰ সম্ভাৱনাপূৰ্ণ বনজ সম্পদৰ প্ৰতি লক্ষ্য ৰাখি ভাৰত চৰকাৰক অঞ্চলটোত ঔষধি গৱেষণা কেন্দ্ৰ খুলিবলৈ আহ্বান জনায় গৃহমন্ত্ৰীগৰাকীয়ে৷ ইয়াৰোপৰি কেন্দ্ৰীয় ড’নাৰ মন্ত্ৰী জিতেন্দ্ৰ সিঙৰ উপস্থিতিত গৃহমন্ত্ৰীয়ে উত্তৰ-পূৰ্বাঞ্চলত বহুতো জনকল্যাণমূলক আঁচনি ৰূপায়ণ হৈ থকা বুলি জানিবলৈ দি উত্তৰ-পূৰ্বাঞ্চলৰ গৌৰৱ ভাৰতৰ গৌৰৱ বুলি উদাত্ত ভাষণ প্ৰদান কৰে৷
মুখ্যমন্ত্ৰী সৰ্বানন্দ সোণোৱালে নিজৰ ভাষণত প্ৰধানমন্ত্ৰী নৰেন্দ্ৰ মোডী আৰু গৃহমন্ত্ৰী অমিত শ্বাহৰ উচ্চ প্ৰশংসা কৰি কয় যে দুয়োগৰাকী শীৰ্ষ নেতৃত্বই উত্তৰ-পূৰ্বাঞ্চলক অষ্টলক্ষ্মী হিচাপে মানিলৈ বিকাশমুখী সকলো পদক্ষেপেই গ্ৰহণ কৰিছে৷ ইয়াৰোপৰি দেশৰ সাৰ্বভৌমত্ব আৰু অখণ্ডতা ৰক্ষাৰ্থে জম্মু- কাশ্মীৰৰপৰা ৩৭০ ধাৰাক বিদায় দিয়া কাৰ্যৰ বাবে গৃহমন্ত্ৰীগৰাকীক বাহাদুৰ আখ্যা দিয়ে৷
ৰাজ্য চৰকাৰৰ বিত্তমন্ত্ৰী ডঃ হিমন্ত বিশ্ব শৰ্মা আৰু কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে নিজৰ চমু ভাষণত কেন্দ্ৰীয় চৰকাৰৰ প্ৰশংসাত পঞ্চমুখ হৈ ভৱিষ্যতলৈ এনেদৰে পূৰ্বাঞ্চলৰ লগতে অসম তথা পাৰ্বত্য জিলাখনৰ উন্নয়নমূলক কাম-কাজত সহায়-সহযোগিতা আগবঢ়াই যাবলৈ আহ্বান জনায়৷ আধাৰশিলা স্থাপন কাৰ্যসূচীত পাৰ্বত্য উন্নয়ন মন্ত্ৰী ছুম ৰংহাঙ, ডিমা হাছাও স্বায়ত্তশাসিত পৰিষদৰ মুখ্য কাৰ্যবাহী সদস্য দেবুলাল গাৰ্লোছা, কেন্দ্ৰীয় ৰাজ্যিক মন্ত্ৰী ৰামেশ্বৰ তেলী, পৰিষদ দুখনৰৰ উপাধ্যক্ষ, ইএম, এমএচি আৰু এমএলএ সকল উপস্থিত থাকে৷
উল্লেখ্য কাৰ্বি ভৱন (কাৰ্বি হেমটুন) নিৰ্মাণত ব্যয় হ’ব ১০০ কোটি টকা। ইয়াৰে ৮৫ কোটি টকা গৃহ নিৰ্মাণ, ১৫ কোটি টকা আচবাব আৰু আভ্যন্তৰীণ সাজ-সজ্জাত ব্যৱহৃত হ’ব। অহা দুবছৰৰ ভিতৰত ইয়াৰ নিৰ্মাণ সম্পূৰ্ণ হৈ উঠিব। এয়া হৈ উঠিলে পাহাৰীয়া জিলা দুখনৰ ছাত্ৰ-ছাত্ৰী আৰু ৰোগীসকল উপকৃত হ’ব।
প্ৰসংগক্ৰমে অঞ্চলটোৰ উন্নয়নৰ বাবে হোৱা বুজাবুজিৰ চুক্তি অনুসৰি অনুমোদিত আৰ্থিক পেকেজৰ এটা অংশৰে এই ভৱন নিৰ্মাণত ব্যয় কৰা হৈছে। মন কৰিবলগীয়া যে পূৰ্বৰ সশস্ত্ৰ সংগঠন ইউনাইটেড পিপুলছ ডেমক্ৰেটিক ছ’লিডাৰী (ইউপিডিএছ), ৰাজ্য চৰকাৰ আৰু কেন্দ্ৰীয় চৰকাৰৰ মাজত উক্ত বুজাবুজিৰ চুক্তি স্বাক্ষৰিত হৈছিল।
