বিশেষ প্ৰতিবেদন :
বিগত কেইটামান বছৰত ভাৰতীয় বজাৰত বাইকৰ সংখ্যা যথেষ্ট বৃদ্ধি পাইছে৷ কিন্তু বাইক কিনিবলৈ বজাৰলৈ গৈ পেট্ৰলৰ দামৰ ভয়ত পিছুৱাই আহিবলগা হয় বহুতে। বাইকপ্ৰেমীসকল এতিয়া আৰু পেট্রলৰ ভয়ত পিছুৱাই আহিব নালাগে৷ কাৰণ পেট্রল নহয়, দ্ৰুতবেগী বাইকো চলিব বতাহতে! শুনিবলৈ অবাক লাগিলেও এই অসাধ্য সাধনেই কৰিছে লখনৌৰ এক বিজ্ঞানীয়ে৷ ইতিমধ্যেই ইয়াৰ পৰীক্ষাত সফলো হৈছে৷
জানিব পৰা মতে, লখনৌৰ এইগৰাকী বিজ্ঞানীয়ে প্রায় ৯ বছৰ পূৰ্বে এই এয়াৰ ইঞ্জিন আবিষ্কাৰ কৰিছিল৷ তেওঁৰ এই আবিষ্কাৰৰ আঁৰত ডাঙৰ ভূমিকা পালন কৰিছিল গ্লোবেল ৱাৰ্মিঙে৷ তাৰ লগত আছিল সাধাৰণ জনতাৰ টকাৰ সমস্যা৷
এই নতুন এয়াৰ-অ’-বাইক নির্মাণত ভাৰত ৰাজ সিঙে গুৰুত্বপূর্ণ ভূমিকা পালন কৰে বুলি জানিব পৰা গৈছে৷ বর্তমান তেওঁ এখন ইঞ্জিনিয়াৰিং কলেজৰ এছোচিয়েট ডিৰেক্টৰ পদত আছে৷ তেওঁ জনোৱা মতে, তেওঁৰ এই আবিষ্কাৰ যেতিয়া ৰাস্তাত নামিব তেতিয়া প্ৰদূষণ প্রায় ৫০ শতাংশ হ্ৰাস কৰা সম্ভবপৰ হ’ব৷
এই আবিষ্কাৰৰ অন্যতম প্রধান উদ্দেশ্য, পেট্রল-ডিজেলৰ পৰিবর্তে, ইন্ধন বচোৱা কাৰ্যক বহুতেই সাধুবাদ দিছে৷ ইয়াৰ ইঞ্জিনৰ খৰচো বহু কম বুলি জানিব পৰা গৈছে৷ এলুমিনিয়ামৰ চিলিণ্ডাৰ বনাই এয়াৰ-অ’-বাইক লগোৱা হৈছে৷ সৰ্বপ্রথমে এই আবিষ্কাৰক টু হুইলাৰত কামত লগোৱা হৈছে৷ ইয়াত ৫ টকাৰ বায়ু ভৰালেই ৪০ কিলোমিটাৰ পর্যন্ত যাব পাৰি৷
বায়ুত চলিলেও বাইকৰ স্পীডত কোনো প্রভাব নপৰে৷ এয়াৰ-অ’-বাইক ঘন্টাত ৭০-৮০ কিলোমিটাৰ বেগত চলিব পাৰে৷ ভাৰত ৰাজ সিঙে তেওঁৰ এই আবিষ্কাৰৰ অনুমোদনৰ বাবে চৰকাৰলৈ প্রস্তাব প্ৰেৰণ কৰা বুলিও জানিব পৰা গৈছে৷
