ASSAM TIMES POST
ডিফু : কাৰ্বি আংলং জিলাৰ সদৰ চহৰ ডিফুৰ সমীপৱৰ্তী বৃহতৰ মাটিপুং আৰু হৰিলালবস্তিৰ ৰাইজক বৃহৎ সকাহ প্ৰদান কৰি আজিৰে পৰা মুকলি হ’ল ষ্টেট বেঙ্ক অফ ইণ্ডিয়াৰ ডিফু শাখাৰ গ্ৰাহক সেৱা কেন্দ্ৰ ৷ ডিফুৰ হৰিলালবস্তি, মাটিপুঙ আৰু শিববাৰী পথৰ সংযোগস্থল মাটিপুঙ তিনি আলিত বদৰুল বৰভূঁঞাৰ তত্বাৱধনাত চলিবলগীয়া এছবিআইৰ গ্ৰাহক সেৱা কেন্দ্ৰটিৰ আজি পুৱাৰ ভাগত ফিটা কাটি শুভ উদ্ধোধন কৰে এছবি ডিফু মুখ্য শাখাৰ শাখা প্ৰৱন্ধক ৰাহুল ডি শইকীয়াই ৷
গ্ৰাহক সেৱা কেন্দ্ৰটি মুকলি কৰি দিয়া ভাষণ প্ৰসংগত এছবিআই ডিফু শাখাৰ শাখা প্ৰৱন্ধক ৰাহুলডি শইকীয়াই কয় যে, ডিফু চহৰৰ দৰে এখন ব্যস্ততম চহৰ আৰু ইয়াৰ পাৰ্শৱৰ্তী এলেকাৰ বৃহৎ সংখ্যক গ্ৰাহকৰ বোজা চহৰখনত থকা দুখন এছবিআই শাখাই বহন কৰাত অসুবিধা হয় ৷ সেয়ে এলেকাটোত এইখনকলৈ দুখন চিএছপি স্থাপন কৰা হৈছে ৷ এই চিএছপিৰ সহায়ত এলেকাটোৰ ৰাইজে সৰু-সুৰা লেনদেনৰ বাবে একাউণ্ট খোলাৰ লগতে ছাত্ৰ-ছাত্ৰীসকলৰ জলপানীৰ বাবে চৰকাৰৰ তৰফৰ পৰা অহা ধনৰ বাবেও একাউণ্ট খুলিব পাৰিব লগতে চিএছপিসমূহত জীৱন বীমা আৰু বিভিন্ন সা-সুবিধা লাভ কৰিব পাৰিব ৷
সমাজৰ সকলো স্তৰৰ মানুহৰ মাজত বেংক সেৱা উপলব্ধ কৰোৱাটোৱেই চিএছপিৰ মূল লক্ষ্য বুলি কয় প্ৰৱন্ধকজনে ৷ আজিৰ উদ্ধোধনী অনুষ্ঠানত ডিফু মছজিদ কমিটিৰ সাধাৰণ সম্পাদক তথা সমাজ সেৱক মজাহাৰুল ইছলাম, সমাজ সেৱক তথা শিক্ষকদ্বয় নিতাই দাস, অতুল কলিতা, সমাজ সেৱক মফজিল আলী বৰভঁঞা আৰু কাৰ্বি আংলং বিল্ডিং এণ্ড আদাৰ্চ কণষ্ট্ৰাকছন ৱৰ্কাৰ্ছ ইউনিয়নৰ সাধাৰণ সম্পাদক আচমত আলী উপস্থিত থাকে ৷
