ASSAM TIMES POST
ইএম খনছিং ৰংপিক মেডিকেল ইএম পদৰ অপসাৰণৰ দাবী বিভিন্ন সংগঠনৰ
ডিফু : কাৰ্বি আংলং স্বায়ত্তশাসিত পৰিষদৰ চিকিৎসা বিভাগৰ কাৰ্যবাহী সদস্য খনছিং ৰংপিৰ বিৰুদ্ধে শেহতীয়াকৈ সৰৱ হৈ পৰিছে জিলাখনৰ কেএছএ, কেএছৱাইচি, কেএফএ আৰু কেএনএই ৷ আজি বিয়লি ডিফু ৰংথিয়াংস্থিত কেএছএৰ মুখ্য কাৰ্যালয়ত সংগঠনসমূহৰ নেতৃবৰ্গই এক সংবাদমেলৰ আয়োজন কৰি ইএম গৰাকীৰ বিৰুদ্ধে কেতবোৰ গুৰুত্বপূৰ্ণ অভিযোগ উত্থাপন কৰিছে ৷ কেএছএৰ সভাপতি বিজয় বে’ আৰু সাধাৰণ সম্পাদক থানছিং তিমুঙে ক’ভিড-১৯ৰ দৰে ভয়াবহ পৰিস্থিতিৰ সময়ত কেএছএকে আদি কৰি বিভিন্ন সামাজিক সংগঠনে অবিৰামভাৱে বিভিন্ন উপস্বাস্থ্য কেন্দ্ৰকে আদি কৰি কোৱাৰেণ্টাইন কেন্দ্ৰসমূহ পৰিদৰ্শন কৰি ৰাইজক বুজোৱাৰ লগতে বিভিন্ন ধৰণে সজাগতা সৃষ্টি কৰিছে ৷
আজি পুৱাৰ ভাগত কে এছএৰ সাধাৰণ সম্পাদক থানছিং তিমুঙে কাৰ্বি আংলং স্বায়ত্তশাসিত পৰিষদৰ চিকিৎসা বিভাগৰ ইএম খনছিং ৰংপিক ফোনযোগে ৰংমংবে’ স্বাস্থ্য কেন্দ্ৰৰটোত কেতবোৰ অভাৱ-অভিযোগৰ বিষয়ে মোবাইল ফোনযোগে অৱগত কৰাৰ লগে লগে ইএম গৰাকীয়ে খঙত অগ্নিশৰ্মা হৈ সামাজিক সংগঠনসমূহে কেৱল ছ’চিয়েল মেডিয়াৰ ফটো পষ্ট দিয়াৰ লগতে প্ৰচাৰৰ বাবেহে কাম কৰে তেওঁলোকৰ আন কোনো কাম নাই বুলি চৰম দূৰ্ব্যৱহাৰ কৰে বুলি অভিযোগ কৰে৷
ইএম গৰাকীয়ে সংগঠনসমূহৰ প্ৰতি প্ৰদৰ্শন কৰা এনে আচৰণ দূৰ্ভাগ্যজনক আৰু গৰিহণাৰ যোগ্য বুলি কয় কেএছএৰ সভাপতি বিজয় বে’ই ৷ জিলা প্ৰশাসন, আৰক্ষী প্ৰশাসন আৰু সামাজিক সংগঠনসমূহৰ যৌথ কমিটিয়ে যি সময়ত ক’ভিড-১৯ৰ প্ৰতিহত কৰাৰ বাবে আগশাৰীৰ সৈনিক হিচাপে বিভিন্ন কোৱাৰেণ্টাইন চেণ্টাৰসমূহ পৰিদৰ্শন কৰি বিভিন্ন অৱস্থাৰ বুজলৈ ৰাইজক শান্ত কৰাৰ লগতে অধিক ক’ভিড বেমাৰী জিলাখনত যাতে নোলায় তাৰ বাবে চেষ্টা চলাইছে, সেই সময়ত ইএম গৰাকীৰ এনে তৰল মন্তব্যত সংগঠনসমূহে আচৰ্য প্ৰকাশ কৰিছে ৷ বিজয় বে’ই অভিযোগ কৰা অনুসৰি বিভিন্ন কোৱাৰেণ্টাইন কেন্দ্ৰসমূহত উপযুক্ত শৌচাগাৰ, পানী আৰু আন্তঃগাঁথনিৰ ব্যৱস্থাৰ অভাৱ লগতে সমাজত মুকলি গণসংক্ৰমন নহ’লেও বহিঃৰাজ্যৰ পৰা অনা লোকসকলক একেলগে ৰখাৰ বাবে সিহতৰ মাজতো গণসংক্ৰমন হোৱাৰ আশংকা কৰিছে নেতাগৰাকীয়ে ৷ আনহাতে, ক’ভিড-১৯ৰ বাবে জিলাখনৰ সামাজিক আৰু ছাত্ৰ সংগঠন সকলে দিন-ৰাতি একাকাৰ কৰি কৰা কামৰ পিছতো ইএম খনছিং ৰংপিৰ সংগঠনসমূহৰ প্ৰতি সামান্য সৌজন্যতা প্ৰদৰ্শন কৰিব নোৱাৰা কাৰ্যক ধিক্কাৰ দিয়ে কাৰবি ফাৰ্মাৰচ এছ’চিয়েচন চমুকৈৰ কেএফঅৰ সভাপতি টিংকু ইংতিয়ে ৷
খনছিং ৰংপি কাৰ্বি আংলং স্বায়ত্তশাসিত পৰিষদৰ এগৰাকী অযোগ্য ইএম বুলি অভিহিত কৰে নেতাগৰাকীয়ে ৷ ইএম গৰাকীক টিংকু ইংতিৰ সৈতে মুকলি আলোচনা কৰিবলৈ প্ৰত্যাহ্বান জনায় ইংতিয়ে ৷ হাঁহ, কুকুৰা, আৰু গাহৰি আদি পোৱালী বিতৰণ ব্যৱস্থাতো কেএফএক ইএম গৰাকীয়ে বাধা প্ৰদান কৰাৰ অভিযোগ কৰিছে টিংকু ইংতিয়ে ৷ খেতিয়কসকলৰ অভাৱ-অভিযোগবোৰ কেএফএই যদি নাচায় তেন্তে কোনে চাব বুলি প্ৰশ্ন কৰে ইংতিয়ে ৷ ইএম ৰংপিয়ে হাতত এখন ফাইললৈ কেৱল পুঁজি সংক্ৰান্তীয় বিষয়সমূহেই চোৱাচিতা কৰে বুলিও অভিযোগ কৰে ৷ সেয়ে আজি সংবাদমেলত উপস্থিত থকা কেএছএ, কেএছৱাইচি, কেএফএ আৰু কেএনএৰ নেতৃবৰ্গসকলে কাৰ্বি আংলং স্বায়ত্তশাসিত পৰিষদৰ চিকিৎসা বিভাগৰ ইএম পদৰ পৰা খনছিং ৰংপিক অপসৰণ কৰি এজন দক্ষ ইএম নিযুক্তি দিবলৈ পৰিষদৰ মুখ্য কাৰ্যবাহী সদস্য তুলিৰাম ৰংহাঙক সংবাদমেল যোগে দাবী জনায়৷
