ASSAM TIMES POST
হাওৰাঘাটঃ ৰাজ্যৰ অন্যান্য প্ৰান্তৰ লগতে কাৰ্বি আংলঙৰ হাওৰাঘাট উন্নয়ন খণ্ডৰ অধীনস্থ কেইবাখনো গাঁৱত মঙলবাৰে পুৱা ৯ বজাৰপৰা ১৭৯টা পিএমএৱাইজি অৰ্থাৎ প্ৰধান মন্ত্ৰী আৱাস যোজনা গ্ৰামীণ আঁচনিৰ আধাৰশিলা স্থাপন কৰা হয়।
হাওৰাঘাট অঞ্চলৰ টোপুৰা গাঁৱৰ নাৰায়ণ লাগৰি, দাসু লাগৰি আৰু দামা ৱাৰিছাবাইৱাৰ গৃহত উপস্থিত থাকি প্ৰতিটোতে এক লাখ ত্ৰিশ হাজাৰ টকা ব্যয় সাপেক্ষে আধাৰশিলা স্থাপন কৰে হাওৰাঘাটৰ বিধায়ক জয়ৰাম ইংলেং আৰু কাৰ্বি আংলং স্বায়ত্তশাসিত পৰিষদৰ স্বাস্থ্য বিভাগৰ কাৰ্যবাহী সদস্য খনছিং ৰংপীয়ে।
তদুপৰি কাৰ্যবাহী সদস্যজনৰ পত্নী চিত্ৰা টেৰণপীয়েও কেইবাটাও গৃহৰ আধাৰশিলা স্থাপন কৰে। ইয়াত খনছিং ৰংপীয়ে কয় যে বিগত কংগ্ৰেছৰ শাসনকালত গাঁৱখনত কংগ্ৰেছ দলে দুখীয়া ৰাইজক চৰকাৰী আৱাসগৃহ দিব পৰা নাছিল।
বহু বছৰ ধৰি বঞ্চিত হৈ থকা শতাধিক লোকক এইবাৰ বিজেপিয়ে একেদিনাই কেৱল এখন গাঁৱতে ৫৯টা পিএমএৱাইজি আঁচনিৰ আধাৰশিলা স্থাপন কৰিলে বুলি কোৱাৰ লগতে হাওৰাঘাটৰ আৰু অন্যান্য গাঁৱত মুঠ ১৭৯টা গৃহৰ একেদিনাই আধাৰশিলা স্থাপন কৰা হৈছে বুলি কয়।
সমান্তৰালভাৱে বিজেপি কৰ্মী চন্দ্ৰ সাগৰ কোচ, তনু বৰা, ৰত্নকান্ত পাঠক, জোনটি বৰা, ৰূপক বৰুৱা ৰবীনচন ইংতি, ছামছিং টেৰণ, টিকেন বৰা আৰু দিলীপ ইংতিয়ে পৃথকে পৃথকে চৰকাৰী গৃহৰ আধাৰশিলা স্থাপন কৰে।
