অৰুণাচল প্ৰদেশৰ (Arunachal Pradesh) চাংলাং জিলাৰ ভাৰত-ম্যানমাৰ সীমান্তত (Indo-Myanmar border) নিৰাপত্তা বাহিনীয়ে টহল দি থকা অৱস্থাত হঠাতে এক ভয়ংকৰ আক্ৰমণৰ ঘটনা সংঘটিত হয়। এই আক্ৰমণত নিহত হৈছে এজন অসম ৰাইফলছৰ জোৱান। ইতিমধ্যে অসম ৰাইফলছে এই মৃত্যুৰ ঘটনাৰ কথা উল্লেখ কৰি ছ’চিয়েল মিডিয়াত এক শোকবাৰ্তা প্ৰকাশ কৰিছে।
স্থানীয় সূত্ৰৰ পৰা জানিব পৰা মতে, মঙলবাৰে পুৱা প্ৰায় ৬.৩০ বজাত এই আক্ৰমণ সংঘটিত হয়। সেই সময়ত ২১ অসম ৰাইফলছৰ জোৱানসকলে সীমান্তত কাম চলি থকা এলেকা এটাত টহল দি আছিল। সেই সময়তে হোৱা অতৰ্কিত আক্ৰমণত মৃত্যু হয় অসম ৰাইফলছৰ জোৱানজনৰ। তেওঁৰ নাম জাংকোকাই কুকি (৪২) বুলি জানিব পৰা গৈছে । আনহাতে, আন কেইবাজনো জোৱান আহত হয়। আহত জোৱানকেইজন সামৰিক চিকিৎসালয়ত চিকিৎসাধীন হৈ আছে।
কিন্তু হঠাৎ কোনে আৰু কিয় এই আক্ৰমণ সংঘটিত কৰিলে সেই বিষয়ে এতিয়াও স্পষ্ট তথ্য লাভ কৰা হোৱা নাই। সংবাদ মাধ্যমৰ সূত্ৰ অনুসৰি, প্ৰথম অৱস্থাত এনএছচিন-কে-ৱাইএন (NSCN K-YA) গোটৰ বিদ্ৰোহীয়ে এই আক্ৰমণ চলোৱা বুলি ধাৰণা কৰা হৈছে। ম্যানমাৰ সীমান্ত অঞ্চলতো বিদ্ৰোহী গোটটোৰ ঘাটি আছে। নিশ্চিত তথ্যৰ সন্ধানত নিৰাপত্তা বাহিনীয়ে অঞ্চলটোত অভিযান আৰম্ভ কৰিছে।
উল্লেখ্য যে উক্ত বিশেষ অঞ্চলটোত সক্ৰিয় বিদ্ৰোহী সংগঠনৰ গতিবিধি আৰু চাংলাং জিলাৰ ভাৰত-ম্যানমাৰ সীমান্ত অঞ্চলৰ স্পৰ্শকাতৰ পৰিস্থিতি একাধিক পক্ষই নিৰীক্ষণ কৰি আছে। ইয়াৰ মাজতে এই আক্ৰমণ সংঘটিত হয়।
