পঞ্জাবৰ (Punjab) এখন বিশ্ববিদ্যালয়ত এগৰাকী ছাত্ৰীক দলবদ্ধ ধৰ্ষণৰ অভিযোগক লৈ ক্ষোভ বৃদ্ধি পাইছে। দেওবাৰে গোটেই দিনটো লাভলী প্ৰফেচনেল ইউনিভাৰ্চিটিৰ (Lovely Professional University) চৌহদত অভিযুক্তক শাস্তি প্ৰদানৰ দাবীত উত্তাল পৰিস্থিতিৰ সৃষ্টি হয়। আনকি ৰাষ্ট্ৰীয় ঘাইপথ অৱৰোধ হৈ পৰে। আৰক্ষীৰ সৈতে সংঘৰ্ষত লিপ্ত হয় ছাত্ৰ-ছাত্ৰী। প্ৰতিবাদৰ মাজতে বিশ্ববিদ্যালয় কৰ্তৃপক্ষই ১০ দিনৰ বাবে শ্ৰেণী বন্ধ কৰাৰ সিদ্ধান্ত লৈছে। মিড টাৰ্ম পৰীক্ষা স্থগিত ৰখা হৈছে।
দেওবাৰে বিশ্ববিদ্যালয় কৰ্তৃপক্ষই ছাত্ৰ-ছাত্ৰীসকললৈ প্ৰেৰণ কৰে এক জাননী। ইয়াত কোৱা হৈছে যে ২৮ ছেপ্টেম্বৰ সোমবাৰৰ পৰা ১০ দিনৰ বাবে বিশ্ববিদ্যালয়খনত পাঠদান বন্ধ থাকিব। এই সময়ছোৱাত ছাত্ৰ-ছাত্ৰীসকলে ইচ্ছা কৰিলে ঘৰলৈ যাব পাৰিব। কেম্পাছত থকাৰ সিদ্ধান্ত লোৱাসকলক সাৱধানতা অৱলম্বন কৰিবলৈ কোৱা হৈছে। পঞ্জাব বিশ্ববিদ্যালয়ে ছাত্ৰ-ছাত্ৰীসকলক অপ্ৰয়োজনীয়ভাৱে বাহিৰলৈ ওলাই নাযাবলৈ বা কোনো প্ৰতিবাদী কাৰ্যসূচীত যোগদান নকৰিবলৈ পৰামৰ্শ দিছে। আনহাতে, মধ্যকালীন পৰীক্ষাসমূহ সম্প্ৰতি স্থগিত ৰখাৰ কথাও অধিসূচনাত উল্লেখ কৰা হৈছে। পৰীক্ষাৰ পৰৱৰ্তী তাৰিখ পিছত ঘোষণা কৰা হ’ব।
শনিবাৰে নিশাৰ পৰাই এই ঘটনা আৰম্ভ হয়। বিশ্ববিদ্যালয়খনৰ এগৰাকী ছাত্ৰীক দলবদ্ধ ধৰ্ষণ কৰাৰ বাতৰি অনলাইনত বিয়পি পৰিছিল। সেই কথা জানিব পাৰি ছাত্ৰ-ছাত্ৰীসকল ক্ষুব্ধ হৈ পৰে। দাবী কৰা হৈছে যে ধৰ্ষণকাৰীয়ে শাস্তি নাপাব বুলি ভাবি নিৰ্যাতিতা ছাত্ৰীগৰাকী ঘৰলৈ গৈছিল। ইয়াৰ পিছত ছাত্ৰ-ছাত্ৰীৰ এটা অংশই কেম্পাছলৈ গৈ প্ৰতিবাদ কৰিবলৈ আৰম্ভ কৰে।
অভিযোগ অনুসৰি দিনৰ ১ বজাৰ ভিতৰত কমেও দুহেজাৰ ক্ষুব্ধ ছাত্ৰ-ছাত্ৰী হোষ্টেলৰ সন্মুখত সমবেত হৈছিল। পুৱা ৮ বজাৰ পৰা ৰাষ্ট্ৰীয় ঘাইপথ অৱৰোধ কৰে। ইফালে দলবদ্ধ ধৰ্ষণৰ অভিযোগৰ কোনো ভিত্তি নাই বুলি আৰক্ষীয়ে জানিবলৈ দিয়ে। এনে কোনো ঘটনা সংঘটিত হোৱাৰ কোনো প্ৰমাণ পোৱা নাছিল, অভিযোগো দাখিল কৰা হোৱা নাছিল। কিন্তু তাৰ পাছতো প্ৰতিবাদ অব্যাহত আছিল।
ছাত্ৰ-ছাত্ৰীসকলে ৰাষ্ট্ৰীয় ঘাইপথৰ পৰা অৱৰোধ আঁতৰাবলৈ চেষ্টা কৰাৰ সময়তে আৰক্ষী আৰু ছাত্ৰ-ছাত্ৰীৰ মাজত সংঘৰ্ষৰ সৃষ্টি হয়। অভিযোগ অনুসৰি, আৰক্ষীৰ ওপৰত পানীৰ বটল নিক্ষেপ কৰা হৈছিল। এটা সময়ত আৰক্ষীয়ে সামান্য লাঠিচালনা কৰিবলগীয়া হৈছিল। ৰাষ্ট্ৰীয় ঘাইপথ মুকলি কৰাৰ পিছত ক্ষুব্ধ ছাত্ৰ-ছাত্ৰীসকলে দুখন আৰক্ষীৰ গাড়ীত জুই লগাই দিয়াৰ অভিযোগ উত্থাপন হৈছে। আন চাৰি-পাঁচখন বাহন ভাঙি লণ্ডভণ্ড কৰে। আৰক্ষীয়ে দাবী কৰিছে যে তেওঁলোকৰ কেইবাজনো কৰ্মী আহত হৈছে। ইয়াৰ পিছত অঞ্চলটোত আৰক্ষী বাহিনী বৃদ্ধি কৰা হয়।
দলবদ্ধ ধৰ্ষণৰ অভিযোগৰ পৰিপ্ৰেক্ষিতত দেওবাৰে আৰক্ষীয়ে এফআইআৰ দাখিল কৰে। অৱশ্যে অভিযুক্ত কোন কোন সেয়া জানিব পৰা হোৱা নাই। এই অভিযোগৰ তদন্তৰ বাবে আৰক্ষীয়ে গঠন কৰিছে বিশেষ তদন্তকাৰী দল। চিচিটিভিৰ ফুটেজ আৰু ফৰেনছিক তথ্য পৰীক্ষা কৰি আছে। জলন্ধৰ ৰেঞ্জৰ ডি আই জি নবীন চিংলাই কয় যে অভিযোগ প্ৰমাণিত হ’লে কঠোৰ শাস্তি নিশ্চিত কৰা হ’ব।
