১২ আগষ্টত পদত্যাগৰ কথা ঘোষণা কৰিছিল টাটা গ্ৰুপৰ অধ্যক্ষ এন চন্দ্ৰশেখৰণে। লগতে তেওঁ টাটা গ্ৰুপৰ ভিতৰত চলি থকা বিশৃংখলতাৰ আভাস প্ৰদান কৰে। ২০ ফেব্ৰুৱাৰীত কাৰ্যকাল শেষ হোৱাৰ পিছত তেওঁ আৰু টাটা ছন্সৰ অধ্যক্ষ নহ’ব বুলি কৈছিল। কিন্তু বৃহস্পতিবাৰে টাটা ছন্সৰ ব’ৰ্ডে এন চন্দ্ৰশেখৰণকে পুনৰ পাঁচ বছৰৰ বাবে অধ্যক্ষ হিচাপে নিযুক্তি দিয়াৰ সিদ্ধান্ত ঘোষণা কৰে। সূত্ৰ অনুসৰি, চন্দ্ৰশেখৰণেও এই সিদ্ধান্ত পুনৰ বিবেচনা কৰি নিজৰ পদত থাকিবলৈ সন্মত হৈছে। কিন্তু টাটা ট্ৰাষ্টে টাটা ছন্সৰ ব’ৰ্ডৰ এই সিদ্ধান্তক ‘অবৈধ’ বুলি অভিহিত কৰিছে। বৃহস্পতিবাৰে টাটা ছন্সৰ ব’ৰ্ডৰ বৈঠকত টাটা ট্ৰাষ্টৰ অধ্যক্ষ নোৱেল টাটাই চন্দ্ৰশেখৰণৰ পুনৰ নিযুক্তিৰ বিৰুদ্ধে একমাত্ৰ ভোটদান কৰে।
প্ৰায় ৩৮.৫ লাখ কোটি টকাৰ টাটা গ্ৰুপৰ মূল কোম্পানী টাটা ছন্স। তেওঁলোকে টিচিএছ, টাটা মটৰ্ছ, এয়াৰ ইণ্ডিয়াকে ধৰি ৩০টা কোম্পানী পৰিচালনা কৰে। টাটা ছন্সত টাটা ট্ৰাষ্টৰ ৬৬ শতাংশ অংশীদাৰিত্ব আছে। যোৱা ফেব্ৰুৱাৰী মাহত টাটা ছন্স ব’ৰ্ডৰ বৈঠকত চন্দ্ৰশেখৰণৰ পুনৰ নিযুক্তিৰ বিৰোধিতা কৰিছিল নোৱেলে। বহুতে বিশ্বাস কৰে যে ইয়াৰ আঁৰৰ কাৰণ আছিল এয়াৰ ইণ্ডিয়াকে ধৰি কেইবাটাও কোম্পানীৰ বৃহৎ লোকচান আৰু টাটা গ্ৰুপৰ শ্বেয়াৰ লিষ্টিঙক লৈ দুয়োৰে মাজত হোৱা মতানৈক্য। বৈঠকত একমতত উপনীত হ’ব নোৱৰাৰ বাবে চন্দ্ৰশেখৰণে নিজেই তেওঁক পুনৰ নিযুক্তি দিয়াৰ সিদ্ধান্ত পিছুৱাই দিছিল। আগষ্ট মাহত দিয়া এক বিবৃতিত তেওঁ টাটা ছন্সৰ অধ্যক্ষ হিচাপে আৰু এটা কাৰ্যকাল কাৰ্যনিৰ্বাহ কৰিবলৈ আগ্ৰহী নহয় বুলি কয়। ইয়াৰ পিছত টাটা ট্ৰাষ্টে তেওঁৰ উত্তৰাধিকাৰী বিচাৰি উলিওৱাৰ প্ৰক্ৰিয়া আৰম্ভ কৰে।
ৰিজাৰ্ভ বেংকে টাটা ছন্সৰ অংশীদাৰিত্ব মুকলি বজাৰত তালিকাভুক্ত কৰাৰ নিৰ্দেশ দিছে। টাটা ছন্সক শ্বেয়াৰ মাৰ্কেটত তালিকাভুক্ত কৰাৰ পক্ষত আছে চন্দ্ৰশেখৰণ। সেই লক্ষ্যৰ দিশতো তেওঁ কাম আৰম্ভ কৰিছিল। নোৱেলৰ শহুৰেক প্ৰয়াত পল্লোঞ্জী মিস্ত্ৰীৰ কোম্পানী শ্বাপূৰজী পল্লোঞ্জী গ্ৰুপৰ মালিকানাধীন টাটা ছন্সৰ ১৮ শতাংশ। তেওঁলোকেও সেইটো বিচাৰে। ব’ৰ্ডৰ বৈঠকত গ্ৰহণ কৰা প্ৰস্তাৱত কোৱা হৈছে, “আৰবিআইৰ প্ৰযোজ্য নিৰ্দেশনা মানি চলিবলৈ পদক্ষেপ লোৱাৰ সিদ্ধান্ত লোৱা হৈছে, এই সন্দৰ্ভত আৰবিআই, টাটা ট্ৰাষ্ট আৰু অন্যান্য সংশ্লিষ্ট পক্ষৰ পৰামৰ্শ বিচৰা হ’ব ।” নোৱেলেও এই প্ৰস্তাৱৰ বিৰোধিতা কৰিছিল। অৱশ্যে বাকী পাঁচজন ব’ৰ্ডৰ সদস্য চন্দ্ৰশেখৰণ, বেণু শ্ৰীনিবাস, হৰিশ মানৱানী, সৌৰভ আগৰৱালা আৰু অনিতা জৰ্জে এই প্ৰস্তাৱ সমৰ্থন কৰাত সেই প্ৰস্তাৱ গৃহীত হয়।
চন্দ্ৰশেখৰণৰ পুনৰ নিযুক্তি সন্দৰ্ভত টাটা ছন্সে এক বিবৃতিত কয়, “টাটা গ্ৰুপলৈ চন্দ্ৰশেখৰণৰ অৱদান আৰু গ্ৰুপৰ বৃহত্তৰ স্বাৰ্থৰ কথা মনত ৰাখি টাটা ছন্স ব’ৰ্ডৰ মনোনয়ন আৰু পাৰিতোষিক সমিতিয়ে তেওঁক ৩ ছেপ্টেম্বৰত অনুষ্ঠিত বৈঠকত তেওঁৰ সিদ্ধান্ত পুনৰ বিবেচনা কৰিবলৈ অনুৰোধ জনাইছে। তেওঁৰ পুনৰ নিযুক্তিৰ পৰামৰ্শ আগবঢ়োৱা হৈছে। পৰৱৰ্তী বৈঠকত বিবেচনাৰ বাবে পৰামৰ্শ দিয়া হৈছে।”
