মণিপুৰত অব্যাহত আছে অশান্তিকৰ পৰিৱেশ। বিগত ২৪ ঘণ্টাত দুটা পৃথক ঘটনাত কুকি জনগোষ্ঠীৰ চাৰিজন লোকক গুলীয়াই হত্যা কৰা হৈছে। গুলীচালনাত এটা শিশুও আহত হয়। কোনে এই আক্ৰমণ সংঘটিত কৰিছিল সেয়া এতিয়াও স্পষ্ট হোৱা নাই। অৱশ্যে কুকি সংগঠনসমূহে অভিযোগ কৰিছে যে নগা জনগোষ্ঠীয়ে এই আক্ৰমণ সংঘটিত কৰিছে। কিন্তু প্ৰতিবেদন প্ৰকাশৰ সময়লৈকে কোনো সংগঠনে হত্যাকাণ্ডৰ দায়িত্ব স্বীকাৰ কৰা নাই। দুয়োটা ঘটনা সংঘটিত হৈছে মণিপুৰৰ তামেনলং জিলাত। প্ৰথমটো আছিল দেওবাৰে পুৱা প্ৰায় ৫.৩০ বজাত। তামেনলং জিলাৰ টলেন গাঁৱত অচিনাক্ত দুষ্কৃতিকাৰীৰ এটা দলে কুকি দম্পতীক আক্ৰমণ কৰে। বন্দুকধাৰীৰ আক্ৰমণত মহিলাগৰাকীৰ থিতাতে মৃত্যু হয়। তেওঁৰ স্বামী আৰু ছয় বছৰীয়া শিশুটি গুলীৰ আঘাতত আহত হোৱাত চিকিৎসালয়লৈ লৈ যোৱা হয়। চিকিৎসাৰ সময়ত মৃত্যু হয় স্বামীৰো। শেহতীয়া তথ্য অনুসৰি, দম্পতীহালৰ সন্তানৰ শৰীৰৰ পৰা গুলী বাহিৰ কৰা হৈছে আৰু তেওঁ এতিয়াও চিকিৎসালয়ত ভৰ্তি হৈ আছে।
আনহাতে, দুপৰীয়া তামেনলঙৰ লংপি গাঁৱত পুনৰ কুকি জনগোষ্ঠীৰ দুজন লোকক আক্ৰমণ কৰা হয়। এগৰাকী মহিলাও আক্ৰমণৰ বলি হয়। দুষ্কৃতিকাৰীয়ে দুয়োকে গুলীয়াই হত্যা কৰে। দেওবাৰে সংঘটিত এই ঘটনাৰ পিছত জিলাখনত এগৰাকী মহিলাৰ সন্ধান পোৱা হোৱা নাই বুলি দাবী কৰিছে এটা কুকি নাগৰিক সংগঠনে।
মণিপুৰৰ মুখ্যমন্ত্ৰী য়ুমনান খেমচান্দ সিঙে এই হত্যাকাণ্ডৰ গৰিহণা দিয়ে। মণিপুৰৰ মুখ্যমন্ত্রীগৰাকীয়ে কয়, “এনে কাপুৰুষালিৰ আক্রমণ সহ্য কৰা নহ’ব।” অৱশ্যে এই ঘটনাৰ লগত কোন বা কিয় জড়িত সেয়া এতিয়াও স্পষ্ট হোৱা নাই। আৰক্ষীয়ে জনোৱা মতে, অভিযুক্তক চিনাক্ত কৰাৰ প্ৰচেষ্টা অব্যাহত আছে।
উল্লেখ্য যে ১৯৯২ চনৰ পৰা মণিপুৰত কুকি আৰু নগা জনগোষ্ঠীৰ মাজত সংঘাতৰ সৃষ্টি হৈছে। বিভিন্ন হিচাপ অনুসৰি, সেই সংঘাতত ১০০০ৰো অধিক লোকৰ মৃত্যু হৈছে। পিছলৈ ২০২৩ চনৰ মে’ মাহত মেইটেই আৰু কুকিৰ মাজত সংঘাতৰ সৃষ্টি হয়। সেই সংঘাতত ২৬০ৰো অধিক লোকে প্ৰাণ হেৰুৱাইছে। সংঘাত আৰম্ভ হোৱাৰ প্ৰায় ২১ মাহৰ পাছত ২০২৫ চনৰ ৯ ফেব্ৰুৱাৰীত মণিপুৰৰ তদানীন্তন মুখ্যমন্ত্ৰী এন বীৰেণ সিঙে পদত্যাগ কৰে। চাৰিদিন পিছত ১৩ ফেব্ৰুৱাৰীত ৰাজ্যত ৰাষ্ট্ৰপতিৰ শাসন জাপি দিয়া হয়। ইয়াৰ প্ৰায় এবছৰৰ পাছত ২০২৬ চনৰ ৪ ফেব্ৰুৱাৰীত ৰাষ্ট্ৰপতিৰ শাসন প্ৰত্যাহাৰ কৰি বিজেপিৰ য়ুমনাম খেমচান্দ সিঙৰ নেতৃত্বত নতুন চৰকাৰ গঠন কৰা হয়।
