দিল্লীস্থিত ছ’চিয়েল মিডিয়াৰ এগৰাকী ইনফ্লুৱেন্সাৰক ফল’ৱাৰ বঢ়োৱাৰ প্ৰতিশ্ৰুতি দি বিহাৰৰ মুজাফ্ফৰপুৰত ধৰ্ষণ কৰাৰ অভিযোগ উত্থাপন হৈছে বিহাৰ সশস্ত্ৰ সীমাবলৰ এগৰাকী এএছআইৰ বিৰুদ্ধে। যুৱতীগৰাকীয়ে অভিযোগ কৰে যে মুজাফ্ফৰপুৰৰ এখন হোটেলত এএছআইজনৰ সহকৰ্মীয়ে তেওঁক ধৰ্ষণ কৰাৰ পিছত ঘটনাৰ ভিডিঅ’ বনাই দেখুৱাই ব্লেকমেইল কৰি ২০ হাজাৰ টকা আদায় কৰে। লক্ষ্ণৌৰ আন দুগৰাকী ছোৱালীয়ে এএছআইজনৰ বিৰুদ্ধে অশ্লীল বাৰ্তা প্ৰেৰণ কৰাৰ লগতে যৌন নিৰ্যাতনৰ অভিযোগ উত্থাপন কৰিছে।
দিল্লীৰ যুৱতীগৰাকীয়ে ছ’চিয়েল মিডিয়াত এএছআই বিকাশ কুমাৰক লগ পোৱাৰ অভিযোগ উত্থাপন কৰে। সেই সময়ত এএছআইজনে প্ৰতিশ্ৰুতি দিছিল যে ছ’চিয়েল মিডিয়াত তেওঁৰ ফ’ল’ৱাৰৰ সংখ্যা বৃদ্ধি কৰাত সহায় কৰিব। সেয়ে তেওঁক লগ কৰিবলৈও কোৱা হৈছিল। এএছআইজনৰ কথা বিশ্বাস কৰি যোৱা বছৰৰ ডিচেম্বৰ মাহত তেওঁ দিল্লীৰ পৰা বিহাৰলৈ গৈছিল। ষ্টেচন ৰোডৰ ওচৰৰ হোটেল এখনত তেওঁ আছিল।
অভিযোগ অনুসৰি, এএছআইজনৰ এজন সহযোগী তালৈ আহি তেওঁক ধৰ্ষণ কৰে আৰু তেওঁ এই ঘটনাৰ ভিডিঅ’ বনায়। ইয়াৰ পিছতে ভিডিঅ’টো দেখুৱাই ব্লেকমেইল কৰাৰ লগতে ২০ হাজাৰ টকা আদায় কৰাৰ অভিযোগ। আনহাতে, লক্ষ্ণৌৰ দুগৰাকী যুৱতীয়ে এএছআই বিকাশৰ বিৰুদ্ধে এজাহাৰ দাখিল কৰিছে। ছ’চিয়েল মিডিয়াত তেওঁক লগ পোৱাৰ অভিযোগ। তেতিয়াৰে পৰাই তেওঁ অহৰহ অশ্লীল বাৰ্তা প্ৰেৰণ কৰিবলৈ ধৰে। কেৱল সেয়াই নহয়, তেওঁলোকৰ বিৰুদ্ধে যৌন নিৰ্যাতনৰ অভিযোগো উত্থাপন হৈছে। তিনিগৰাকী যুৱতীয়ে এএছআই আৰু তেওঁৰ সহযোগীৰ বিৰুদ্ধে এজাহাৰ দাখিল কৰে। কিন্তু সেই অভিযোগ প্ৰত্যাহাৰ কৰিবলৈ হেঁচা প্ৰয়োগ কৰা বুলিও দাবী কৰে তিনিওগৰাকী যুৱতীয়ে।
মুজাফ্ফৰপুৰ আৰক্ষীয়ে জনোৱা মতে, অভিযোগৰ তদন্ত অব্যাহত আছে। তদুপৰি অভিযোগৰ তদন্তৰ বাবে এছএছবিয়ে তিনিজনীয়া এখন কমিটী গঠন কৰিছে। এছএছবি ছেক্টৰৰ মুখ্য কাৰ্যালয়ৰ ছেকেণ্ড-ইন-কমাণ্ড ৰাজনীশ কুমাৰ মৰালে কয় যে বাহিনীটোৱে নিজা উদ্যোগত অভিযোগৰ তদন্তৰ বাবে তিনিজনীয়া তদন্ত সমিতি গঠন কৰিছে।
