অৱশেষত সকলো জল্পনা-কল্পনাৰ অন্ত পেলাই নগাঁও লোকসভাৰ উপ-নিৰ্বাচনৰ বাবে বিজেপিৰ প্ৰাৰ্থী ঘোষণা কৰা হয়। অৱধাৰিতভাৱেই প্ৰাৰ্থিত্ব লাভ কৰিছে প্ৰশাসনীয় পদৰ পৰা কিছুদিন পূৰ্বে স্বেচ্ছামূলক অৱসৰ গ্ৰহণ কৰি বিজেপিত যোগদান কৰা নগাঁও জিলাৰ প্ৰাক্তন আয়ুক্ত দেৱাশীষ শৰ্মাই । শুকুৰবাৰে বিজেপিৰ ৰাষ্ট্ৰীয় সমিতিৰ পৰা দেৱাশীষ শৰ্মাৰ নাম আনুষ্ঠানিক ভাবে ঘোষণা কৰে ৷ উল্লেখ্য যে যোৱা ৮ ছেপ্টেম্বৰত অৱসৰপ্ৰাপ্ত আইএএছ বিষয়া দেৱাশীষ শৰ্মাই বিজেপিত যোগদান কৰিছিল৷ ইয়াৰ পিছতেই চৰ্চা চলি আছিল যে আগন্তুক নগাঁও লোকসভাৰ উপ-নিৰ্বাচনত বিজেপিৰ প্ৰাৰ্থী হিচাপে অৱতীৰ্ণ হ’ব দেৱাশীষ শৰ্মা৷
উল্লেখ্য যে ইতিমধ্যে ঘোষণা কৰা হৈছে নগাঁও লোকসভাৰ উপ-নিৰ্বাচনৰ দিন। ভাৰতৰ নিৰ্বাচন আয়োগে ঘোষণা কৰা অনুসৰি, উপ-নিৰ্বাচনৰ বাবে মনোনয়ন দাখিল কৰাৰ অন্তিম দিন হৈছে ১৬ ছেপ্টেম্বৰ। আনহাতে, ভোটদান হ’ব ৬ অক্টোবৰত ৷
