তেলেংগানা (Telangana) ৰাজ্যিক পথ পৰিবহণ নিগমৰ এজন পৰিচালকে নিজৰ সততাৰে হৃদয় জয় কৰিলে। হায়দৰাবাদত হজযাত্ৰাৰ বাবে ৰাওনা হোৱা এহাল দম্পতীয়ে প্ৰায় ৩ লাখ টকা বাছত পেলাই থৈ গৈছিল। সেই ধন ঘূৰাই পালে তেওঁলোকে। যোৱা ৫ ছেপ্টেম্বৰ শনিবাৰে সংঘটিত হোৱা এই ঘটনাত ছাদনগৰৰ বাসিন্দা ব্যৱসায়ী জাহাংগীৰ আৰু তেওঁৰ পত্নী হায়দৰাবাদলৈ গৈ আছিল। দম্পতীহালে হজলৈ যাবলৈ সাজু হৈছিল। তেওঁলোকৰ লগত নগদ ৩ লাখ টকা আছিল।
বিপুল পৰিমাণৰ ধন হেৰুৱাই চিন্তিত জাহাংগীৰ খৰধৰকৈ বাছ ষ্টেণ্ডলৈ উভতি আহে। আনহাতে, কৰ্তব্যৰত বাছ পৰিচালক সাৰিতাই বাছৰ ভিতৰত থকা বেগটো দেখি লগে লগে তেওঁ বাছ চালকজনক খবৰ দিয়ে। ইয়াৰ পিছত দুয়ো বেগটো সযতনে ৰাখিলে। জাহাংগীৰ বাছ আস্থান আহি পোৱাত সাৰিতা আৰু নৰসিংহুলুৱে তেওঁৰ দাবীৰ সত্যতা পৰীক্ষা কৰি বেগটো তেওঁৰ হাতত তুলি দিয়ে।
এই ঘটনাত টিজিএছআৰটিচিৰ কৰ্মচাৰী দুজনৰ প্ৰশংসাত সকলো পঞ্চমুখ। তেলেংগানাৰ পৰিবহণ মন্ত্ৰী পোন্নম প্ৰভাকৰে কোনো স্বাৰ্থ নোহোৱাকৈ ধনখিনি নিৰাপদে ঘূৰাই দিয়াৰ বাবে কণ্ডাক্টৰ সাৰিতাক ভূয়সী প্ৰশংসা কৰে। ইতিমধ্যে ছচিয়েল মিডিয়াত এটা পোষ্ট দিছে প্ৰভাকৰে। তাত তেওঁ লিখিছে, “ছাদনগৰ আৰটিচি ডিপোৰ কণ্ডাক্টৰ সাৰিতাক তেওঁৰ সততা আৰু দায়িত্বশীল আচৰণৰ বাবে অভিনন্দন জনাইছোঁ।”
তেওঁ লিখিছে, “ৰাজহুৱা পৰিবহণ সংস্থা এটাত কৰ্তব্য পালন কৰাৰ সময়ত এনে সততা আৰু দায়িত্ব প্ৰদৰ্শন কৰাটো সঁচাকৈয়ে প্ৰশংসনীয়। আৰটিচিৰ কৰ্মচাৰীয়ে প্ৰতিদিনে মমতা আৰু আন্তৰিকতাৰে ৰাইজৰ সেৱা আগবঢ়ায়। এনে কৰ্মচাৰীৰ সততা আৰু নিষ্ঠাই সংস্থাটোৰ সুনাম বৃদ্ধি কৰে। কোনো স্বাৰ্থপৰ উদ্দেশ্য নোহোৱাকৈ যাত্ৰীৰ নগদ ধন নিৰাপদে ঘূৰাই দিয়াৰ বাবে কণ্ডাক্টৰ সাৰিতাক অভিনন্দন জনাইছোঁ। আশাকৰোঁ তেওঁৰ সততা আৰু মানৱীয়তাই আৰটিচিৰ আন কৰ্মচাৰীসকলকো অনুপ্ৰাণিত কৰিব।”
