এতিয়াৰে পৰা গাড়ী বা বাইকৰ (Car or bike) বৈধ বীমা নাথাকিলে (don’t have valid insurance) তেল ডিপোৰ (Oil depot) পৰা পেট্ৰ’ল বা ডিজেল নাপাবও (Can’t get petrol or diesel) পাৰে। উচ্চতম ন্যায়ালয়ে কেন্দ্ৰীয় চৰকাৰক পৰীক্ষামূলক ভিত্তিত (পাইলট প্ৰজেক্ট) এই ক্ষেত্ৰত কি কৰিব পাৰি সেই বিষয়ে চিন্তা কৰিবলৈ কৈছে। চৰকাৰলৈ এটা পাইলট প্ৰজেক্ট আৰম্ভ কৰাৰ প্ৰস্তাৱ আগবঢ়াইছে। সমগ্ৰ দেশৰ সকলো পেট্ৰ’ল পাম্পৰ বাবে এই প্ৰকল্প কাৰ্যকৰী হ’ব। শীৰ্ষ ন্যায়ালয়ে কয় যে কেন্দ্ৰীয় পথ পৰিবহণ মন্ত্ৰালয় আৰু ভাৰতীয় বীমা নিয়ন্ত্ৰণ আৰু উন্নয়ন প্ৰাধিকৰণে এই প্ৰকল্পত যৌথভাৱে কাম কৰিব। পেট্ৰ’ল বা ডিজেল যোগান ধৰাৰ পূৰ্বে ডিপোৰ কৰ্মচাৰীয়ে সংশ্লিষ্ট বাহনখনৰ বীমা আছেনে নাই সেইটো পৰীক্ষা কৰিব পাৰিব।
উচ্চতম ন্যায়ালয়ৰ প্ৰস্তাৱ অনুসৰি, গাড়ীখনৰ বৈধ বীমা থকাটো বাঞ্ছনীয়। লগতে পেট্ৰ’ল পাম্পৰ কৰ্মচাৰীয়ে বীমা নবীকৰণ কৰা হৈছেনে নাই সেইটোও পৰীক্ষা কৰিবলৈ সক্ষম হ’ব। যদি কোনো বৈধ বীমা নাথাকে তেন্তে তেওঁলোকে সংশ্লিষ্ট বাহনখনক পেট্ৰ’ল বা ডিজেল যোগান নধৰিবও পাৰে। আদালতে যুক্তি দিয়ে যে পথ সুৰক্ষা ব্যৱস্থাৰ অংশ হিচাপে এই ব্যৱস্থা প্ৰৱৰ্তন কৰিব লাগে। অৱশ্যে কেৱল পেট্ৰ’ল পাম্পতে যে গাড়ীখনৰ বীমা পৰীক্ষা কৰা হ’ব এনে নহয়। আদালতে কয় যে যান-বাহন আৰক্ষীয়েও পথত বিষয়টো চোৱা-চিতা কৰিব।
ৰাজপথত অটোমেটিক নম্বৰ প্লেট চিনাক্তকৰণ (এএনপিআৰ) কেমেৰা স্থাপন কৰা হৈছে। যান-বাহন আইনসমূহৰ পৰা সকলো বিচ্যুতি, যেনে সংকেত অমান্য কৰা, পথৰ ভুল ফালে গাড়ী চলোৱা বা দ্ৰুতবেগত গাড়ী চলোৱা আদি কেমেৰাই ধৰা পেলায়। উচ্চতম ন্যায়ালয়ে বীমা সম্পৰ্কীয় বিষয়সমূহ সেই প্ৰযুক্তিৰ সৈতে সংযোগ কৰাৰ প্ৰস্তাৱ আগবঢ়াইছে। উদ্দেশ্য হৈছে যদি কোনো বাহনৰ বৈধ বীমা নাথাকে তেন্তে কেমেৰাত ধৰা পৰিব।
নাকা চেক বা পথ সংযোগস্থলত থিয় হৈ থকা যান-বাহন আৰক্ষীয়ে যাতে গাড়ীখনৰ বীমা পৰীক্ষা কৰিব পাৰে তাৰ বাবে শীর্ষ আদালতে প্রয়োজনীয় পদক্ষেপৰ পৰামৰ্শ আগবঢ়াইছে। উচ্চতম ন্যায়ালয়ে কয় যে কেন্দ্ৰই তৎক্ষণাত বীমা পৰীক্ষা কৰিবলৈ যান-বাহন আৰক্ষীৰ ওচৰত প্ৰয়োজনীয় এপ বা কোনো যন্ত্ৰ ৰাখিব পাৰি নেকি চাব লাগিব।
নতুন গাড়ী কিনাৰ সময়ত তৃতীয় পক্ষৰ বীমা বাধ্যতামূলক। ব্যক্তিগত গাড়ীৰ ক্ষেত্ৰত বীমাৰ সময়সীমা সাধাৰণতে তিনি বছৰ। উচ্চতম ন্যায়ালয়ে এই সময়সীমা চাৰি বছৰলৈ বৃদ্ধি কৰাৰ পৰামৰ্শ আগবঢ়াইছে। আৰু বাইকৰ ক্ষেত্ৰত শীৰ্ষ আদালতে বীমাৰ সময়সীমা পাঁচ বছৰৰ পৰা ছবছৰলৈ বৃদ্ধি কৰাৰ প্ৰস্তাৱ আগবঢ়াইছে।
বৈধ বীমা অবিহনে গাড়ী চলোৱাৰ ধাৰাক লৈ উদ্বেগ প্ৰকাশ কৰিছে উচ্চতম ন্যায়ালয়ে। আদালতে পৰ্যবেক্ষণ কৰে যে ভাৰতত পথত চলাচল কৰা কমেও ৫৬ শতাংশ বাহনৰ বৈধ বীমা নাই। সংসদীয় সমিতিৰ প্ৰতিবেদনৰ উদ্ধৃতি দি উচ্চতম ন্যায়ালয়ে এই পৰিসংখ্যা প্ৰদান কৰে। ইয়াত কোৱা হৈছে যে ৩০ কোটি ৪৮ লাখ বাহনৰ ভিতৰত প্ৰায় ১৬ কোটি ৫৪ লাখ বাহন বীমাৰ অধীনত নাই। ইয়াৰ ফলস্বৰূপে পথ দুৰ্ঘটনাৰ বলি হোৱা লোকসকলে সময়মতে ক্ষতিপূৰণ নাপায় বুলি আদালতৰ মত। ফলত তেওঁলোকে দীঘলীয়া আইনী যুদ্ধত লিপ্ত হ’বলগীয়া হয়। এই সকলোবোৰ দিশ বিবেচনা কৰি উচ্চতম ন্যায়ালয়ে নতুন আঁচনি আৰম্ভ কৰাৰ প্ৰস্তাৱ আগবঢ়ায়।
আদালতৰ মতে, যদি এই ব্যৱস্থা প্ৰৱৰ্তন কৰা হয় তেন্তে বীমাবিহীন বাহনৰ চলাচল ৰোধ কৰা সম্ভৱ হ’ব। ইয়াৰ উপৰি যান-বাহন আইন উলংঘা কৰাৰ প্ৰৱণতাও কমি যাব। তৃতীয় পক্ষৰ বীমাৰ চৰ্তসমূহ যাতে সঠিকভাৱে পালন কৰা হয় তাৰ বাবে এনে আঁচনিৰ প্ৰয়োজন। বৰ্তমান উচ্চতম ন্যায়ালয়ৰ প্ৰস্তাৱসমূহ কাৰ্যকৰী কৰিবলৈ কি কি পদক্ষেপৰ প্ৰয়োজন সেয়া কেন্দ্ৰই পৰীক্ষা কৰিব। কিন্তু যদিহে এই ব্যৱস্থা প্ৰৱৰ্তন কৰা হয়, তেন্তে ই প্ৰথম অৱস্থাত পৰীক্ষামূলকভাৱে ফলপ্ৰসূ হ’ব। অৰ্থাৎ নতুন আঁচনিখন আৰম্ভ হ’লেই পেট্ৰ’ল পাম্পৰ কৰ্মচাৰীয়ে বীমাবিহীন বাহন ঘূৰাই পঠাব নোৱাৰিব। তাৰ পৰিৱৰ্তে সতৰ্ক কৰি দিব।
