অৱশেষত চৰকাৰে ককৰোচ জনতা পাৰ্টিৰ (চিজেপি) সৈতে আলোচনাত বহিবলৈ চৰকাৰ ৰাজী হৈছে। সোমবাৰে চিজেপিৰ সংসদ ভৱন অভিযানৰ মাজতেই চৰকাৰৰ তৰফৰ পৰা তেওঁলোকৰ সৈতে যোগাযোগ কৰা বুলি দাবী কৰা হৈছে। চিজেপিৰ মুখ্য মুখপাত্র সৌৰভ দাস আৰু আন এগৰাকী মুখপাত্র আশুতোষ ৰাঙ্কা কেন্দ্ৰীয় মন্ত্ৰী জেপি নাড্ডাক সাক্ষাৎ কৰিবলৈ যাব।
ইফালে অনশনত থকা সোনম ৱাংচুকেও অভিযানত যোগ দিয়াৰ ইচ্ছা প্ৰকাশ কৰিছে। তেওঁ চিকিৎসালয়ৰ পৰা কিছু সময়ৰ বাবে ছুটি বিচাৰি আবেদন জনায়।
কিন্তু চিজেপি সন্দর্ভত চৰকাৰৰ ফালৰ পৰা আনুষ্ঠানিকভাৱে কোনো বক্তব্য দিয়া হোৱা নাই। কিন্তু সৌৰভে কয় যে নাড্ডাই তেওঁলোকৰ লগত আলোচনাত বহিব। তাৰ বাবে সময়ো দিছে। তেওঁ জনোৱা অনুসৰি, পুৱা নাড্ডাক সাক্ষাৎ কৰিবলৈ ককৰোচৰ দুই প্ৰতিনিধি ৰওনা হৈছে।
ছ’চিয়েল মিডিয়াত সৌৰভে লিখিছে, ‘‘মই আৰু আশুতোষ ৰাঙ্কা ককৰোচ জনতা পাৰ্টিৰ হৈ জেপি নড্ডাৰ সৈতে দেখা কৰিবলৈ যাওঁ। পুৱা চৰকাৰে আমাৰ সৈতে যোগাযোগ কৰিছিল। আমাৰ দাবী খুব স্পষ্ট। যুৱ প্ৰজন্মই যথেষ্ট সংখ্যাত সমবেত হৈছে।’’
উল্লেখযোগ্য যে শিক্ষাত দুর্নীতি আৰু নীটৰ প্ৰশ্নকাকত ফাদিলৰ বিৰুদ্ধে কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত ২৮ জুনৰ পৰা সোনম ৱাংচুকে দিল্লীৰ যন্তৰ-মন্তৰত অনশনত বহিছিল। তেওঁ ককৰোচ পাৰ্টীৰ দাবীসমূহকো সমৰ্থন কৰিছিল।
যোৱা শনিবাৰে অনশনৰ ২১সংখ্যক দিনত সোনমক প্ৰতিবাদস্থলীৰ পৰা আৰক্ষীয়ে উঠাই লৈ গৈছিল। তাৰ পিছত তেওঁক দিল্লীৰ চফদৰজং হাস্পতালত ভৰ্তি কৰোৱা হয়। তেওঁক বেআইনীভাৱে আটক কৰি ৰখাৰ অভিযোগ তুলিছে।
ইফালে হাস্পতাল কৰ্তৃপক্ষক সোমবাৰে পুৱাই তেওঁ এখন পত্ৰ প্ৰদান কৰে। পত্ৰখনত সঞ্চালকক উদ্দেশ্য কৰি লিখা হৈছে, ‘‘মই আজি ভালে আছোঁ। মোৰ স্বাস্থ্য সূচকসমূহো স্বাভাৱিক। সাময়িকভাৱে হ’লেও অনুগ্ৰহ কৰি মোক হস্পিটেলৰ পৰা যোৱাৰ অনুমতি দিয়ক, যাতে মই সংসদ ভৱন অভিযানত যোগদান কৰিব পাৰোঁ।’’
