আমেৰিকাই (America) পুনৰ শুল্ক যুদ্ধ (Tariff war again) আৰম্ভ কৰিব নেকি? আমেৰিকাৰ চিনেটৰৰ এটা দলে এক প্ৰস্তাৱ আগবঢ়াইছে। দলটোৱে ঘোষণা কৰিছে নতুন নিষেধাজ্ঞা বিধেয়ক। বিধেয়কখনত ৰাছিয়াৰ পৰা তেল ক্ৰয় কৰাৰ বাবে ভাৰত (India) আৰু চীনকে (China) ধৰি পাঁচখন দেশৰ ওপৰত ১০০ শতাংশ পৰ্যন্ত (100%) শুল্ক আৰোপ কৰাৰ প্ৰস্তাৱ (Proposal to impose a tariff) দিয়া হৈছে। হোৱাইট হাউছেও এই নতুন বিধেয়কখনক সমৰ্থন কৰিছে। আগষ্টৰ পূৰ্বে হয়তো গৃহীত হ’ব পাৰে আমেৰিকাৰ নতুন বিধেয়ক। মঙলবাৰে এই নতুন বিধেয়কখন ঘোষণা কৰে আমেৰিকাৰ চিনেটৰ ৰিচাৰ্ড ব্লুমেন্থালে।
তেওঁ কয়, “ৰাছিয়াৰ পৰা তেল ক্ৰয় কৰা মূল পাঁচখন দেশৰ ওপৰত নিৰ্দিষ্ট শুল্ক আৰোপ কৰা হৈছে। সৰ্বোচ্চ শুল্কৰ পৰিমাণ ১০০ শতাংশ হ’ব পাৰে। অৱশ্যে এই ক্ষেত্ৰত কিছু ৰেহাই আছে।” ভাৰত আৰু চীনৰ উপৰি আমেৰিকাই শ্লোভাকিয়া, হাংগেৰী আৰু আজাৰবাইজানৰ ওপৰত নতুন শুল্ক আৰোপ কৰাৰ কথা চিন্তা কৰিছে। নতুন বিধেয়কখনত কেৱল তেল ক্ৰয় কৰা দেশেই নহয়, ৰাছিয়াৰ পৰা প্ৰাকৃতিক গেছ ক্ৰয় কৰা দেশসমূহৰ বিৰুদ্ধেও ব্যৱস্থা গ্ৰহণ কৰা হৈছে।
যোৱা বছৰৰ এপ্ৰিল মাহত প্ৰয়াত ৰিপাব্লিকান চিনেটৰ লিণ্ডচে গ্ৰেহামে আমেৰিকান কংগ্ৰেছত শুল্ক বিধেয়ক উত্থাপন কৰিছিল। বিধেয়কখনত উল্লেখ কৰা হৈছে যে যদি কোনো দেশে আমেৰিকাৰ নিষেধাজ্ঞাৰ পিছতো ৰাছিয়াৰ সৈতে বাণিজ্য অব্যাহত ৰাখে তেন্তে দেশখনৰ পৰা আমদানি কৰা সামগ্ৰীৰ ওপৰত ৫০০ শতাংশ শুল্ক আৰোপ কৰা হ’ব। অৱশ্যে সেই বিধেয়ক এতিয়াও কাৰ্যকৰী হোৱা নাই। আমেৰিকাই যি নতুন বিধেয়কৰ কথা কৈছে সেয়া উক্ত বিধেয়কখনৰ সংশোধনী।
আমেৰিকাৰ চিনেটৰ সূত্ৰ অনুসৰি, ২৬ জন লোকে নতুন সংশোধনী বিধেয়কখনৰ প্ৰস্তাৱ আগবঢ়াইছে। আগন্তুক দিনত সেই সংখ্যা বৃদ্ধি পাব পাৰে। আমেৰিকান কংগ্ৰেছত গৃহীত হোৱা বিধেয়কখনক লৈ আশাবাদী চিনেটৰৰ এটা অংশ। ইতিমধ্যে ট্ৰাম্প প্ৰশাসনে শুল্ক নীতিক লৈ আদালতত বিপৰ্যয়ৰ সন্মুখীন হৈছিল। ৰাষ্ট্রীয় জৰুৰীকালীন অৱস্থাত ব্যৱহৃত আইন প্রয়োগ কৰি ট্রাম্পে বিভিন্ন দেশৰ ওপৰত আমদানি শুল্ক আৰোপ কৰাটো অবৈধ বুলি ৰায় দিছিল৷ ইয়াৰ পিছতে ট্ৰাম্পে সাময়িকভাৱে ১০ শতাংশ শুল্ক ঘোষণা কৰে। শেহতীয়াকৈ সেই শুল্ক নীতিও আদালতত বিপৰ্যয়ৰ সন্মুখীন হৈছে। তেনে পৰিস্থিতিত আমেৰিকাই পুনৰবাৰ ভাৰতকে ধৰি কেইবাখনো দেশৰ ওপৰত অতিৰিক্ত শুল্ক আৰোপ কৰাৰ কথা চিন্তা কৰিছে।
