বিগত কেইবছৰমানৰ পৰা কৰি অহা অভিযোগৰ পিছত এইবাৰ কেন্দ্ৰীয় গৃহমন্ত্ৰী অমিত শ্বাহে (Amit Shah) ‘অনুপ্ৰৱেশ আৰু অন্যান্য কাৰণত দেশৰ জনগাঁথনিগত (Demographic) ক্ষেত্ৰত অস্বাভাৱিক পৰিৱৰ্তনৰ প্ৰভাৱ’ পৰ্যালোচনাৰ বাবে এখন উচ্চ পৰ্যায়ৰ সমিতি গঠন কৰিছে। ছ’চিয়েল মিডিয়াত অমিত শ্বাহে এই কথা ঘোষণা কৰি কয় যে কমিটীৰ অধ্যক্ষ হ’ব অৱসৰপ্ৰাপ্ত ন্যায়াধীশ প্ৰকাশ প্ৰভাকৰ নৱলেকাৰ।
কেন্দ্ৰীয় চৰকাৰে গঠন কৰা কমিটীৰ সদস্যসকলৰ ভিতৰত আছে লোকপিয়ল আয়ুক্ত, প্ৰাক্তন আইএএছ বিষয়া দুৰ্গা শংকৰ মিশ্ৰ, প্ৰাক্তন আইপিএছ বিষয়া বালাজী শ্ৰীবাস্তৱ আৰু অৰ্থনীতিবিদ শমিকা ৰবি। গৃহ পৰিক্ৰমা মন্ত্ৰালয়ৰ যুটীয়া সচিবে (বিদেশ-১) সমিতিৰ সদস্য-সচিব হিচাপে কাম কৰিব বুলি উল্লেখ কৰি অমিত শ্বাহে ছ’চিয়েল মিডিয়াত লিখিছে, “জনগাঁথনিগত পৰিৱৰ্তন দেশৰ বৰ্তমান আৰু ভৱিষ্যত দুয়োটাৰে বাবে এক অতি গুৰুত্বপূৰ্ণ প্ৰত্যাহ্বান আৰু ই সাৰ্বভৌমত্ব, ৰাষ্ট্ৰীয় নিৰাপত্তা, আইন-শৃংখলা, সামাজিক গাঁথনি আৰু জনজাতীয় সম্প্ৰদায়ৰ সুৰক্ষাৰ দৰে বিষয়ৰ সৈতে জড়িত।”
উল্লেখ্য যে বিগত কেইবছৰমানৰ পৰা অমিত শ্বাহে ধাৰাবাহিকভাৱে অভিযোগ কৰি আহিছে যে দেশৰ সীমান্তৱৰ্তী ৰাজ্যসমূহত (বিশেষকৈ বাংলাদেশৰ সীমান্তৱৰ্তী পূব ভাৰতৰ ৰাজ্যসমূহত) অনুপ্ৰৱেশৰ বাবে দেশৰ জনগাঁথনি সলনি হৈছে। ইয়াৰ আঁৰত ‘নিৰ্দিষ্ট পৰিকল্পনা’ই কাম কৰি আছে বুলি তেওঁ দাবী কৰে। যোৱা বছৰ স্বাধীনতা দিৱসৰ দিনা লালকিল্লাৰ পৰা প্ৰধানমন্ত্ৰী নৰেন্দ্ৰ মোদীয়ে দিয়া ভাষণতো অনুপ্ৰৱেশ আৰু জনগাঁথনিৰ কথা উল্লেখ কৰিছিল। নতুন সমিতি গঠনৰ কাৰণ ব্যাখ্যা কৰাৰ সময়তে জনগাঁথনিৰ অভিযোগ পোনপটীয়াকৈ মানি লোৱা হৈছে।
ছ’চিয়েল মিডিয়াত দিয়া পোষ্টটোত অমিত শ্বাহে লিখিছে, “এই কমিটীয়ে অবৈধ অনুপ্ৰৱেশ আৰু অন্যান্য অস্বাভাৱিক কাৰকৰ বাবে সমগ্ৰ ভাৰতত ঘটি থকা জনগাঁথনিগত পৰিৱৰ্তনৰ বিশদ মূল্যায়ন কৰিব আৰু ধৰ্মীয় আৰু সামাজিক সম্প্ৰদায়ৰ অস্বাভাৱিক জনগাঁথনিগত পৰিৱৰ্তনৰ প্ৰকৃতি বিশ্লেষণ কৰিব। ইয়াৰ উপৰি নিৰ্দিষ্ট সময়সীমাৰ ভিতৰত এই সমস্যা সমাধানৰ বাবে এক সুপৰিকল্পিত মতামত দাঙি ধৰিব।”
