প্ৰধানমন্ত্ৰী নৰেন্দ্ৰ মোদীৰ চৰকাৰে মহিলা সংৰক্ষণ (Women reservation) আৰু লোকসভাৰ আসন বৃদ্ধিৰ সন্দৰ্ভত ১৩১ সংখ্যক সাংবিধানিক সংশোধনী বিধেয়ক (Constitutional Amendment Bill) লোকসভাত গৃহীত কৰিব নোৱাৰিলে (Not passed in the Lok Sabha)। দুদিনীয়া বিতৰ্কৰ অন্তত শুকুৰবাৰে বিয়লি বিধেয়কখনত ভোটগ্ৰহণ হয়। বিধেয়কখনৰ সপক্ষে ২৯৮টা ভোট পৰাৰ বিপৰীতে বিৰুদ্ধে পৰে ২৩০ টা। মুঠ ৫২৮ গৰাকী সাংসদে ভোটদানত অংশগ্ৰহণ কৰে। সংবিধান সংশোধনী সন্দৰ্ভত বিধেয়কখন গৃহীত কৰিবলৈ দুই তৃতীয়াংশ সংখ্যাগৰিষ্ঠতাৰ প্ৰয়োজন। কিন্তু সেয়া লাভ কৰাত ব্যৰ্থ হয় মোদী চৰকাৰ।
বৃহস্পতিবাৰৰ পৰা আৰম্ভ হোৱা সংসদৰ তিনিদিনীয়া বিশেষ অধিৱেশনত তিনিখন বিধেয়ক গৃহীত কৰাৰ ক্ষেত্ৰত কেন্দ্ৰ সক্ৰিয় হৈ পৰিছিল। কেন্দ্ৰীয় আইন মন্ত্ৰী অৰ্জুন ৰাম মেঘৱালে উত্থাপন কৰা তিনিখন বিধেয়কৰ ভিতৰত প্ৰথমখন হৈছে ১৩১ সংখ্যক সংবিধান সংশোধনী বিধেয়ক (আনুষ্ঠানিকভাৱে ‘নাৰী শক্তি বন্দন অধিনিয়ম’ নামেৰে জনাজাত) লোকসভা আৰু বিভিন্ন ৰাজ্যৰ বিধানসভাৰ এক তৃতীয়াংশ আসন মহিলাৰ বাবে সংৰক্ষণৰ বাবে (লোকসভাত সাংসদৰ সংখ্যা ৮৫০লৈ বৃদ্ধি কৰাৰ বিষয়টো ইয়াত অন্তৰ্ভুক্ত), দ্বিতীয়খন হৈছে লোকসভা সভাৰ আসন সীমা নিৰ্ধাৰণ বিধেয়ক। তৃতীয়খন হ’ল কেন্দ্ৰীয়শাসিত অঞ্চল আইন সংশোধনী বিধেয়ক (কেন্দ্ৰীয়শাসিত অঞ্চলত আসন বৃদ্ধিৰ বাবে)। ইয়াৰ লগে লগে কেন্দ্ৰই উত্থাপন কৰা আন দুখন বিধেয়কো উঠাই লয়।
